LEVITIKO 25 - Tuvalu Revised Bible

Ko te Fitu o Tausaga(Teu 15.1-11)

1 Eso 23.10,11 Ne faipati mai te Aliki ki a Mose i luga i te Mauga o Sinai kae fakatonu atu ki a ia

2ke tuku atu a fakatonuga konei ki tino Isalaelu. Kafai ko ulu atu koutou ki loto i te fenua tena ka tuku atu ne te Aliki, e tau mo koutou o fakaaloalo ki te Aliki o se fai ne otou galuega i otou fatoaga i te fitu o tausaga.

3E ono tausaga e toki fatoaga ei koutou, e velevele ei otou togavine, e fakaputu ei a fua o otou lakau kaina,

4ka ko te fitu o tausaga e tau o seai eiloa ne galuega e fai ki te laukele, me se tausaga ko oti ne fakatapu mo te Aliki. Sa toki otou fatoaga, sa velevele otou toga vine.

5Sa katigina a saito kola ne ola ake eiloa i a latou, sa olo foki o tae mai a fuagavine mai otou toga vine kola e seki velevele, a te mea nei se tausaga e tau o malolo ei te laukele.

6E tiga eiloa e seki fakagalue te laukele i te tausaga tena, kae ka fua mai eiloa ne ia ne meakai ma koutou, otou tavini, otou galuega, tino fakaalofa e nofo tasi koutou,

7otou manu fagai, mo manu vao ei i te otou fenua. A mea katoa e fua mai i te laukele e lei i te kai.

Ko te Tausaga o te Fakafokiga o Mea

8Fatele te fitu tausaga ki te fitu, ko fasefulu iva tausaga.

9I te po sefulu o te fitu o masina, ko te Aso tena o te Faka'maga, masaua o uga se tino ke ili te pu ke lagona i te fenua katoa.

10Ko te faiga tena e fakakese ei te limasefulu tausaga, ko te tausaga e tuku atu ei te saolotoga ki tino katoa i te fenua. I te tausaga tenei, a mea katoa a tino kola ne fakatau atu ki nisi tino ka toe fakafoki atu ki a latou, io me ki olotou fanau. A tino foki kola ne fakatau atu ke fai mo pologa ka toe foki atu ki olotou kaiga.

11E se tau mo koutou o toki otou fatoaga io me kati ne koutou a saito kola ne ola ake eiloa i a latou, io me olo o tae a fuagavine i otou toga vine kola e seki velevele.

12A te tausaga katoa e tau o faka'malu ne koutou: a koutou e kai fua ki mea kola e ola ake eiloa i a latou i fatoaga.

13I te tausaga tenei, a mea katoa a tino kola ne togi atu ki nisi tino ka toe fakafoki atu katoa ki a latou.

14Tela la, kafai e togi atu ne koe se manafa o koe ki se tino Isalaelu, io me e togi ne koe se manafa mai i a ia, masaua o fai mo te fakamaoni.

15A te togi e tau o fua faka'lei ki te uke o tausaga kola e mafai ne te laukele o fua mai ne fuaga lakau, kae seki oko ki te Tausaga o te Fakafokiga o Mea.

16Kafai e uke tausaga mai mua o te Tausaga o te Fakafokiga o mea, ko tena uiga e tau foki o lasi te togi o manafa, kae kafai e mutana, e mutana foki te togi o manafa, me i te mea tela ne togi atu ko te uke foki tena o lakau e fua mai i te manafa tena.

17Sa fakaloiloi ne koutou te sua taina Isalaelu, kae ma'taku ki te Aliki te otou Atua.

Ko Feitu Faiga'ta o te Fitu o Tausaga

18Faka'logo ki tulafono mo fakatonuga a te Aliki ko te mea ke nofo koutou i te fenua mo te saogalemu.

19Ka fua mai ne te laukele ona fuataga, ko uke ei a meakai a koutou, tena ko nofo ei koutou mo te tokagamalie.

20E isi ne tino ka fesili aka pela me ne a olotou mea ka kai i te fitu o tausaga, me ko seai ne lakau e toki, seai foki ne fuaga e fakaputu.

21Ka fakamanuia ne te Aliki te ono o tausaga ko te mea ke fua mai a lakau e lava ei meakai mo tausaga e lua.

22Kafai ko toki otou lakau i te valu o tausaga, ka ko koutou e kaikai eiloa ki meakai kola ne kati ne koutou i te ono o tausaga. Tela la, e lava eiloa otou meakai ke oko eiloa ki te taimi e kati ei te taukai i te valu o tausaga.

Ko te Faka'fokiga o Mea

23Ke mo a e togi atu ne koutou otou manafa i se feitu fakatumau, me e se o koutou a te laufenua; e o te Atua a manafa, ka ko koutou e pela me ne tino fakaalofa kola ne talia ke fakaaoga ne koutou a manafa.

24Kafai ko oti ne fakatau se laumanafa, e tau eiloa o isi se taliaga mo te tino e o ia te manafa o toe togi mai, mai te tino ne nofo mo ia.

25Kafai se tino Isalaelu ko oko eiloa i te mativa tela ko togi atu ei tena manafa ke maua se mea mo ona ola, ko te kaiga pili eiloa o ia e tau o toe togi mai ne ia.

26A te tino e seai ne ana kaiga e mafai eiloa ne ia o toe togi mai tena manafa fakamuli, manafai ko maumea a ia.

27I te feitu tena, e tau o togi atu ne ia ki te tagata tela ne togi ne ia tena manafa, te aofaki e fetaui tonu mo tausaga mai mua o te Tausaga o te Fakafokiga o Mea, te tausaga tela ka fakafoki atu ei tena manafa.

28Kae kafai e se lava tena tupe o fakafoki mai tena manafa, ko tena uiga e nofo eiloa mo te tagata ne togi ne ia ke oko eiloa ki te sua Tausaga o te Fakafokiga o Mea, i te tausaga tena, ka toe fakafoki atu eiloa a te manafa ki te tino e o ia te manafa.

29Kafai se tino ne fakatau atu tena fale e tu i loto i se fa'kai e isi se pui, e mafai ne ia o toe togi mai, mai te tino ne fakatau atu ne ia ki ei, i se tausaga e tasi.

30Kae kafai ko seke te tausaga e tasi kae seki togi mai eiloa ne ia, ko tena uiga ko seai sena saolotoga o toe togi mai, tela la, a tena fale ko fai eiloa mo kope tonu o te tino ne fakatau ne ia ki ei, pela foki tena fanau. E se toe fakafoki mai ki a ia i te Tausaga o te Fakafokiga o Mea.

31A fale i fa'kai kola e seai ne 'pui, a te faiga ki ei e pau eiloa mo te faiga ki manafa; a te tino e o ia tonu te fale e isi sena saolotoga o togi mai ne ia te fale. Kafai e oko ki te Tausaga o te Fakafokiga o Mea, e toe fakafoki atu eiloa ki a ia a te fale.

32A tino sa Levi e saoloto fua o toe togi mai ne latou a kope o latou kola ne togi atu ki nisi tino i so se taimi, i fa'kai kola e galue ei latou.

33Kafai se fale o se tino sa Levi ne fakatau atu ne ia i se fa'kai o fa'kai konei, kae seki toe togi mai eiloa ne ia, e fakafoki atu eiloa ki a ia i te Tausaga o te Fakafokiga o Mea, me i fale kola e nofo ei a tagata sa Levi i fa'kai kona, ko kope totino eiloa o latou.

34Ka ko te koga laukele moukuā i tafatafa o fa'kai o sa Levi e se tau eiloa o fakatau atu keatea; a te mea tena ko te tofi eiloa o latou ki te se gata mai.

Ko te Fesoasoani ki Tino Ma'tiva

35 Teu 15.7,8 Kafai se taina Isalaelu e nofo pili mai ki a koe, kae ko mativa, ko se maua ne ia o tausi a ia, e tau o tausi ne koe e pela mo te tausiga a koe ki se tino e fakagalue ne koe, ko te mea ke nofo mai eiloa a ia i ou tafa.

36Sa fai ne koe ke togi mai ne ia au mea ne fai mo ia, kae mataku ki te Atua o tuku ei tou taina Isalaelu ke nofo eiloa i ou tafa.

37Eso 22.25; Teu 23.19,20 Sa fai ne koe ke togi fakaopoopo mai ne ia a te tupe ne tuku ne koe ki a ia, kae sa taumafai o sala se tupe silia ma koe i meakai kola e togi ne koe ki a ia.

38A te mea tenei se fakatonuga a te Aliki tou Atua, tela ne aumai ne ia koutou mai Aikupito ke tuku atu mo koutou te fenua o Kanana tenei, kae ke fai foki a ia mo Atua o koutou.

Ko te Fakasaolotoga o Pologa

39 Eso 21.2-6; Teu 15.12-18 Kafai se taina Isalaelu e nofo pili ki a koe, kae ko oko eiloa i tena mativa tela ko togi atu a ia ke fai mo au pologa, masaua ke sa fakagalue ne koe a ia e pela me se pologa.

40Ka nofo te tagata tena i a koe e pela me se tagata galue se tumau, kae ka galue a ia mo koe ke oko eiloa ki te sua Tausaga o te Fakafokiga o mea.

41I te taimi tena, ka foki atu a te tagata tena mo ana tamaliki ki tena kaiga o nofo i te laukele o ana tupuga.

42A tino Isalaelu ko pologa a te Aliki, kola ne aumai ne ia mai Aikupito; e se tau o togi atu ke fai mo pologa.

43Sa fai fakamasei ki a latou, kae masaua o ma'taku ki te otou Atua.

44Kafai e ma'nako koutou ki ne pologa, olo o togi mai otou pologa mai malo e tuakoi ki a koutou.

45E mafai foki o togi mai ne koutou a tamaliki a tino fakaalofa kona e nofo tasi koutou. A tamaliki pena, kona ne fa'nau i otou fenua e mafai o fai mo pologa a koutou.

46E mafai foki o tuku ne koe a latou ki au fanau kae ka tavini latou ki ei i aso e ola ei latou. Kae ke mo a eiloa e fai fakamasei ne koutou otou taina Isalaelu.

47Kafai se tagata fakaalofa e nofo tasi koutou ko maumea, kae e isi se tino Isalaelu ko mativa kae ko togi atu a ia ke fai mo pologa a te fakaalofa tena, io me se tino i tena kaiga,

48e isi eiloa sena saolotoga ke toe togi mai a ia ke saoloto.

49E tau se taina o ia, io me se taina o tena tamana io me ko te tuagaene o tena matua, io me se fai taina o ia, io me se kaiga pili o ia o toe togi mai a ia i te tagata fakaalofa tena. Kafai ko isi ne ana tupe, e mafai foki ne ia o togi tena saolotoga.

50E tau mo ia o fai ki te tagata tela ne togi ne ia a ia ke lau ne laua a tausaga, e kamata mai i te taimi ne fakatau atu ei a ia ke oko ki te sua Tausaga o te Fakafokiga o Mea, ko fakamau ei ne laua se togi o tena saolotoga, kae galue ki te togi e maua ne ia i tena tulaga ko te tino galue se tumau.

51-52E tau o toe fakafoki mai ne ia se vaega o te togi e fua ki tausaga koi toe,

53e pela eiloa me ne togi a ia ke galue i se tausaga e tasi. E se tau mo tena pule o fai fakamasei a ia.

54Kafai e se saoloto eiloa a ia i se feitu i feitu konei, kae e saoloto eiloa a ia mo ana tamaliki i te Tausaga o te Fakafokiga o Mea.

55A te tino Isalaelu e se mafai o fai mo pologa tumau, me i tino Isalaelu ko pologa a te Aliki. Ne aumai ne ia latou mai Aikupito; a ia ko te Aliki te olotou Atua.