2 NOFOAIGA TUPU 33 - Tuvalu Revised Bible

Ko Manase te Tupu o Iuta(2Tupu 21.1-9)

1A Manase ne fai mo tupu o Iuta ka ko sefululua ei tausaga o tena olaga. Ne nofo a ia i te nofogaaliki i Ielusalema i tausaga e limasefulu lima.

2Iele 15.4 A Manase ne agasala ki te Aliki me ne tautali i amioga masei a tino o malo kola ne afuli keatea ne te Aliki mai i te fenua o Kanana, i te taimi ne o'mai ei tena fenua o nofo i ei.

3Ne toe faite aka foki ne ia a koga tapuaki fapaupau kola ne ofa ne tena tamana ko Hesekia. Ne faite ne ia a fata-fai-taulaga mo fai tapuakiga ki a Paala, ne faite foki ne ia a fakatusa o te atua fafine ko Asaila, kae tapuaki atu ki fetu.

42NTupu 6.6 Ne faite ne ia a fata-fai-taulaga fapaupau i loto i te Faletapu, te koga ne fai mai ei te Aliki me ko te koga e tapuaki atu ei a tino ki a ia ki te se gata mai.

5Ne faite foki ne ia ne fata-fai-taulaga i malae fono kola e lua, o te Faletapu, mo fai tapuakiga ki fetu.

6Ne ta ne ia ana tama tagata i te Vanu ko Hinomo, mo fai a taulaga sunu. Ne fai ne ia a amioga fakataulaitu, kae kalaga sale ki tino poto i fakamatala mea ka tupu, mo tino fakatu agaga. Ne agasala malosi eiloa a ia ki te Aliki, tena ne kaitaua ei te Aliki.

71Tupu 9.3-5; 2NTupu 7.12-18 Ne tuku ne ia se fakatusa i te Faletapu, te koga ne fai ki ei te faipatiga a te Atua, i tena faiatuga ki a Tavita mo tena tama tagata ko Solomona penei: “i konei, i Ielusalema i te Faletapu tenei, ko te koga tela ko oti ne filifili ne au mai i kogā koga katoa o te sefululua matakaiga o Isalaelu, ke fai mo koga e tapuaki mai ei a tino ki a au.

8Kae kafai e tautali a tino Isalaelu ki aku fakatonuga, kae tausi a Tulafono katoa kola ne avatu ne taku tavini ko Mose ki a latou, ko se afuli ei ne au a latou keatea mai te fenua tenei ne tuku ne au ki olotou tupuga.”

9Ne taki ne Manase a tino Iuta ki te agasala tela e silia atu i agasala kola e fai ne malo kola ne afuli keatea ne te Aliki mai i te fenua o Kanana, i te taimi ne olo atu ei ki ei tena fenua.

Manase ko Salamo

10E ui eiloa ne fakaasi mai ne te Aliki ki a Manase mo tena fenua a te mea e tau o fai ne latou e sao ei latou, kae ne seki fia fakalogo eiloa latou.

11Tena la, ne talia ei ne te Aliki ke vau te kautau a Asulia o puke a Iuta. Ne puke fakapagota ne latou a Manase, fakalave ki kafilo, saisai ki seni, kae ave ki Papelonia.

12Ne mafuli atu a ia ki te Aliki tena Atua mo te fakamaulalo, o fakamolemole ki ei mo se fesoasoani, me i a ia ko puapuaga.

13Ne talia ne te Atua a te talo a Manase, toetuku ei ne ia ke foki ki Ielusalema o toetu i tena tulaga fakatupu. Ona ko te mea tena, ko iloa tonu ei ne Manase i te Aliki ko te Atua eiloa.

14Tena la, ne toe avaka ne Manase te maluga o te pui tafa ki tua, i te feitu ki te saegala o te Fa'kai o Tavita, e kamata mai i te kogā koga i te vanu, i tafa o te vaitafe foliki ko Kaiona i te feitu ki matu o te Mataloa o ika mo te kogā laukele o te fa'kai e igoa ko Ofele. Ne tuku atu foki ne ia ne ofisa o kautau ke takitaki i potukau i fa'kai fakaolo o Iuta.

15Ne ave keatea ne ia mai i te Faletapu a atua fakaatea, mo te fakatusa tela ne tuku ne ia ki kona, ke oko foki eiloa ki fata-fai-taulaga fapaupau i luga i te mauga tena e tu ei te Faletapu, pela foki i nisi koga i Ielusalema; ne ave ne ia a mea katoa kona ki tua o te fa'kai, pei keatea ei ne ia.

16Ne toe faite fakalei aka ne ia a te fata-fai-taulaga tela e fai ei tapuakiga ki te Aliki, kae ofo atu ne ia i ei a taulaga fakafetai. Ne fakatonu ne ia a tino katoa o Iuta ke tapuaki atu ki te Aliki, te Atua o Isalaelu.

17E ui eiloa a tino e tumau o ofo olotou taulaga i nisi koga tapuaki, kae e ofo eiloa ne latou ki te Aliki.

Ko Gata te Nofoaiga a Manase(2Tupu 21.17-18)

18A nisi tala e uiga ki a Manase, tena talo ne fai ki te Atua, mo fekau a pelofeta kola ne folafola mai ki a ia i te igoa o te Aliki, te Atua o Isalaelu, e fakamaugina katoa i te tusi o Te Tala Tukufakasolo o Tupu o Isalaelu

19A te talo a te tupu mo te tali a te Atua, mo te tala o agasala ne fai ne ia kae koi tuai ei a ia o salamo — ko amioga masei ne fai ne ia, ko koga tapuaki fapaupau mo te fakatusa o te atua fafine ko Asaila kola ne faite ne ia, mo te tupua tela e tapuaki a ia ki ei‐a mea katoa kona e fakamau i te tusi o Te Tala Tukufakasolo o Pelofeta.

20Ne mate atu Manase kae ne tanu i te palesi; ne sui a ia ne tena tama tagata ko Amoni o fai mo tupu.

Ko Amoni te Tupu o Iuta(2Tupu 21.19-26)

21A Amoni ne fai mo tupu o Iuta ka ko luasefulu lua ei ona tausaga. Ne nofo a ia i te nofoaga tupu i Ielusalema i tausaga e lua.

22Ne agasala a ia ki te Aliki e pela eiloa mo tena tamana ko Manase; ne tapuaki a ia ki tupua kola ne tapuaki ki ei tena tamana.

23Ne seki salamō a ia o fuli atu ki te Aliki e pela mo tena tamana; ne silia atu te fai agasala o ia i lo tena tamana.

24Ne lamalama a ia ne ana ofisa, tamate eiloa ne latou a ia i te palesi.

25Ne tamate ne tino Iuta a ofisa kola ne olo o tamate a Amoni, kae fakasopo ne latou a Iosia, te tama tagata a Amoni, ke fai mo tupu.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help