LUKA 20 - Tuvalu Revised Bible

Ko te Fesili e Uiga ki te Pule a Iesu(Mata 21.23-27; Male 11.27-33)

1I te aso e tasi, ka koi nofo Iesu i te Fale Tapu, e akoako atu kae folafola atu a te Tala 'Lei ki tino, ne o'mai ki a ia faitaulaga sili mo faiakoga o te Tulafono, fakatasi mo toeaina,

2kae fai mai ki a ia, “Fai mai ki a matou me se a te pule e fai ei ne koe a mea konei? Ko oi ne avatu ne ia ki a koe a te pule tena?”

3Ne tali atu a ia, “E fesili atu foki ne au se fesili: taku mai ki a au,

4a te papatisoga a Ioane ne aumai mai te lagi io me mai tino?”

5Ne fakatau mafaufau kae fai'pati latou i a latou eiloa penei: “Kafai e fai atu tatou, ‘Mai te lagi,’ ka fai mai a ia, ‘Ai a la e se talitonu ei koutou ki a ia?’

6Kafai foki e fai atu tatou, ‘Mai tino,’ ka peipei tatou ki fuafatu ne tino katoa; me ko talitonu latou i a Ioane se pelofeta.”

7Tela la, ne tali mai latou me se iloa ne latou me maifea.

8Ne fai atu a Iesu ki a latou, “E se taku atu foki ne au, me se a te pule e fai ei ne au a mea konei.”

Ko te Tala Fakatusa e Uiga ki Tino Ga'lue i te Togavine(Mata 21.33-46; Male 12.1-12)

9 Isa 5.1 Ne taku atu ne Iesu ki tino a te tala fakatusa tenei: “Ne toki ne te tagata te togavine, kae ne tuku atu ki tino ga'lue, kae fano a ia ki se isi fenua mo se taimi tai leva atu.

10Ko oko ki te taimi o te taukai vine, uga ei ne ia se tavini ki tino galue, ke maua mai ei ne fuagavine; kae ne kini a ia ne tino ga'lue, kae tuli keatea e aunoa mo se mea.

11Ne toe uga atu foki ne ia te sua tavini, ne kini foki kae ta fakamasei ne latou, toe afuli foki keatea e aunoa mo se mea.

12Ne toe uga atu foki ne ia te tokotolu o tavini, ne ta foki kae afuli keatea ne latou.

13Ne fai ake ei a te tino tela e o ia te togavine, ‘Se a te mea ka fai ne au? Ka uga atu ne au taku tama tagata fagasele; kati la ka āva latou ki a ia.’

14Ka ko te laveaga ne tino galue a ia, ne fai ake latou pela, ‘Tenei te tama tagata a te tino e o ia te togavine; ke tamate ne tatou, ko te mea ke fai ma tatou te togavine.’

15Ne afuli ne latou a ia keatea mo te togavine kae tamate.

“Se a nei la te mea ka fai ne te tino e o ia te togavine ki a latou?

16Ka vau a ia o tamate a tino galue kona, kae tuku atu te togavine ki nisi tino.” Ne lagona ne tino kola ne fakalogo'logo ki ana pati, kae fai mai, “Sa fai pena.”

17Sala 118.22 Ne kilokilo atu a Iesu ki a latou kae fesili atu, “Se a te uiga o te muna tenei ko tusi mai?

‘Ko te fatu ne tiakina ne tufuga fai fale,

Ko fai nei mo fatu sili i te taua.’

18So se tino e siga ki luga o te fatu tena, ka fatifati a ia; kafai foki e to te fatu tena ki luga i se tino, ka malukuluku eiloa a ia.”

Ko te Fesili e Uiga ki te 'Togiga o Lafoga(Mata 22.15-22; Male 12.13-17)

19Ne taumafai faiakoga o te Tulafono mo faitaulaga sili o puke a Iesu i te taimi tena, me ne iloa ne latou, ne taku atu ne ia te tala fakatusa tena e fakasino ki a latou; kae ne ma'taku latou i te vaitino.

20Tela la, ne kilo'kilo ei latou mo se taimi nofoga malie, ke uga atu ne latou ne tino alamati, kola e leake eiloa tino me amiotonu, ke fakalogo'logo faka'lei ki ana muna, ko tuku atu ei ne latou a ia ki te pule a te kovana.

21Ne fesili mai latou ki a ia, “Te Faiakoga, ko iloa ne matou i a koe e faipati kae akoako mai ki a matou mo te tonu, e se fakailoga ne koe se tagata, kae akoako mai foki ne koe a te ala o te Atua.

22Se mea 'tau i a matou o avatu lafoga ki a Kaisala, me ikai?”

23Ka ko iloa 'lei ne Iesu te togafiti a latou kae fai atu,

24“Fakaasi mai ki a au se tupe siliva. E oi te ata tena e tusi i ei?” Ne fai mai latou, “E o Kaisala.”

25Ne fai atu a ia ki a latou, “E 'tau mo koutou o fai te otou tiute ki te Malo, pela foki mo otou tiute ki te Atua.”

26Ko se mafai ne latou o puke a ia i kona i mua o tino, ona ko ana muna; kae ne ofo latou ki tena tali, 'nofo 'mu ei latou.

Ko te Fesili e Uiga ki te Toetu mai te Mate(Mata 22.23-33; Male 12.18-27)

27 Galu 23.8 Ne o'mai nisi o Satukaio ki a Iesu ko latou kola e fai mai me seai se toetu mai te mate.

28Teu 25.5 Ne fai mai latou ki a ia penei, “Te Faiakoga, ne tusi mai ne Mose a te tulafono tenei mo matou: ‘Kafai se tagata ko mate tena taina, kae ola tena avaga kae se afu, e 'tau i te tagata tena o avaga ki te fafine tena, ke tupu ei se gafa o tena taina.’

29E isi se tautaina e tokofitu; ne avaga te toekimua, kae ne mate se afu.

30Avaga ei te tokolua ki te fafine,

31pena foki te tokotolu; ne pena katoa eiloa te tokofitu, ne 'mate kae se afu.

32Ka ko te fafine, ne mate fakamuli ifo.

33Tela la, i te taimi e toe'tu mai ei tino 'mate, ko oi ka avaga mo ia? I te mea ne a'vaga katoa ki ei te tokofitu!”

34Ne fai atu a Iesu ki a latou, “A tagata mo fafine o te olaga nei e a'vaga,

35ka ko tagata mo fafine kola e aoga ki ei te toetu mai te mate, kae ola i te ola se gata mai, e se a'vaga.

36E pela latou mo agelu e se mafai o 'mate. A latou ko tama a te Atua, me ko oti ne toe fakatu ake latou mai te mate.

37Eso 3.6 Ko fakamaonia foki ne Mose i tino 'mate ka toe faka'tu ake i te ola. I te tala tela i te lakau ne ka, ne faipati ei Mose, i te Aliki, ‘Ko te Atua o Apelaamo, ko te Atua o Isaako, ko te Atua foki o Iakopo.’

38E se se Atua o tino 'mate, kae o tino ola; me i tino katoa e ola mo ia.”

39Kae ne tali mai nisi o faiakoga o te Tulafono, “Te Faiakoga, ko oko eiloa i te 'lei au muna.”

40I te mea ko se toe fakamalosi latou o fai mai nisi fesili ki a ia.

Ko te Fesili e Uiga ki te Keliso(Mata 22.41-46; Male 12.35-37)

41Ne fai atu a Iesu ki a latou, “E mafai pefea o fai mai tino i te Keliso ko te tama a Tavita?

42Sala 110.1 Me ne fai mai eiloa Tavita i te tusi o Salamo:

‘Ne fai mai te Aliki ki toku Aliki,

Nofo i toku feitu fakaatamai ko toku feitu taua,

43Ke oko ki te taimi e fai ei ne au ou fili mo mea e tuku ei ou vae.’

44Ne taku mai pena ne Tavita i a ia ko tena Aliki; e mafai la pefea o fai te Keliso mo tama a Tavita?”

Ko Polopoloakiga a Iesu ke Fakaeteete Latou ki Faiakoga o te Tulafono(Mata 23.1-36; Male 12.38-40)

45Ne faipati atu a Iesu ki ona soko, ka koi fakalogo'logo mai ki a ia tino katoa:

46“A koutou eiloa i faiakoga o te Tulafono kola e fia olo sale mo olotou gatu 'loa, kae ma'nako ke fakaaloalogina latou i malae, e fia 'nofo foki i nofoga sili i fale tapuaki mo koga sili i 'kaiga;

47ko latou foki kola e oti sale ei a mea i fale o fafine ko 'mate olotou avaga, kae fia iloa latou i faiga o 'talo 'loa. A te lotou fakasalaga, ka sili atu eiloa i te masei!”