HOSEA 8 - Tuvalu Revised Bible

Ko Fakamalaia ne te Aliki a Isalaelu

1Muna a te Aliki, “Fakatagi te pu o te fili! A te fili ko oko mai ki luga i toku fenua e pela me ne aeto! Ko oti ne ofa ne oku tino a te feagaiga tela ne fai ne au mo latou, kae ko oti foki ne teke ki aku akoakoga.

2E ui eiloa e fakaigoa ne latou a au ko te lotou Atua, kae taofi pela i a latou ko oku tino kae iloa foki ne latou a au,

3kae ko oti eiloa ne tiaki ne latou te mea tonu. Mai i olotou uiga kona, tela ka afuli ei latou o ta ne olotou fili.

4“E filifili ne toku fenua a olotou tupu i a latou eiloa. E filifili ne latou a takitaki, kae seki fakamaoni ne au. E faite ne latou a tupua ki olotou siliva mo aulo — mo te lotou malaia eiloa.

5Au e takalialia ki te pulumakau aulo tela e tapuaki ki ei a tino o te fa'kai o Samalia. Ko oko eiloa toku kaitaua ki a latou. Ko afea e fakagata ei olotou tapuakiga ki tupua?

6E faite ne te kamuta Isalaelu a te tupua, kae se se atua! A te pulumakau aulo tela e tapuaki ne tino i Samalia ka tuki fakalikiliki!

7Ne toki ne latou te matagi, kae fua mai, se afā lasi eiloa! A te fatoaga saito tela e se matua e se mafai o maua se falaoa mai i ei. Kae kafai e isi se falaoa e maua mai i ei, ka kai eiloa ne tino fakaatea.

8A Isalaelu ko pau fua mo nisi malo kae ko se aoga e pela me se ulo ko pala.

9A tino Isalaelu ko oko eiloa i te lotoma'keke e pela me ne asini vao, tela ko olo eiloa latou ki te koga e manako latou ki ei. Ne olo latou ki Asulia ki se fesoasoani, kae togi foki ne latou a nisi malo ke o'mai o puipui latou.

10Kae nei, ka fakamaopoopo mai ne au a latou ke fakasala. Ko pili nei kae migoi latou i te mae, mafai ko vau te tupu o Asulia o fakasaua latou.

11“Ko te uke o fata-fai-taulaga e faite ne tino Isalaelu mo te faka'maga o olotou agasala, ko te uke foki tena o koga e fai agasala ei latou!

12E tusi ne au ki lalo a akoakoga e se maua o lau mo tino Isalaelu, kae teke ne latou me manatu pela me ne akoakoga kese kae mai fenua fakaatea.

13E ofo mai ne latou a taulaga ki a au, kae kai ne latou a kano o manu o te taulaga. Ka ko au, te Aliki, ko se fiafia ki a latou, kae nei ka masaua ne au a olotou agasala kae fakasala latou e tusa mo olotou agasala; ka toe faka'foki ne au a latou ki Aikupito!

14“A tino Isalaelu e faite ne latou a palesi, kae ko puli eiloa i a latou a ia tela ne faite ne ia a latou. Ko oti ne faite ne tino Iuta a fa'kai mo olotou olo. Kae ka aumai ne au a te afi tela ka sunu ei a palesi mo olotou fa'kai.”