IELEMIA 15 - Tuvalu Revised Bible

Ko Malaia Tino Iuta

1

7I fa'kai katoa i luga i te fenua,

A koutou e pei sale fua ne au ki te matagi

E pela me ne kausaito.

Toku fenua, ne ta fakamasei ne au koutou,

Ne tamate ne au otou tamaliki

Me e seki fakagata eiloa otou amioga masei.

8E tokouke atu a fafine ko mate olotou avaga i te otou fenua

I lo one o te matafaga.

Ne tamate ne au a tamataene o te otou fenua i te taimi koi malosi ei,

Kae fai ne au olotou matua ke tigaina.

Ne ta fakapalele ne au latou.

9A te matua tela ne galo ana tamaliki e tokofitu, ko matapo,

Kae ko taumafai ke manava a ia.

A tena fiafia ko fuli ki te pouliga;

Ko masiasi kae mafatia te loto.

Ka tuku atu ne au otou fili ke tamate ne latou a nisi o koutou kona koi ola.

Ko au, te Aliki, tena ne faipati atu.”

Ielemia ko Fakaasi tena loto se malie

10Au ko oko eiloa i toku fanoanoa! Ai a ne aumai ei au ne toku matua ki te lalolagi tenei? Au e fakakinau faeloa mo tino katoa i te fenua. E seki ai eiloa ne tupe kai tuku fakakaitalafu atu ne au ki se tino, seai foki se tupe kai kaitalafu ne au mai i se tino; ka ko tino katoa e muna tuku faeloa ne latou a au.

11Te Aliki, ke taunu olotou muna fakamalaia manafai e tonu e seki tavini fakamaoni atu au ki a koe, manafai foki e seki fakamolemole atu au ki a koe e uiga mo oku fili i taimi e maua ei latou ne fakalavelave.

12(E seai se tino e mafai o fati ne ia te fiti, kae maise te fiti mai i matu tela e palu tasi mo te palasi.)

13Muna a te Aliki ki a au, “Ka uga mai ne au a te fili ke ave keatea ne latou a te maumea mo te koloa o toku fenua, ko te mea ke fakasala latou ona ko agasala ne fai ne latou i luga i te fenua.

14Ka fai ne au latou ke tavini atu ki olotou fili i te fenua fakaatea, me i toku kaitaua e pela me se afi tela e ka faeloa ki te se gata mai.”

15Tena kae fai atu au penei, “Te Aliki, a koe e malamalama. Manatua mai au kae fesoasoani mai. Talia mai ke taui atu ne au ki tino kola ne o'mai o fakasaua au, e tusa mo te lotou mea ne fai mai ki a au. Na fakasalagina latou i te mea ma taunu ei te lotou fakamoemoega o tamate au. Masaua i au e muna maseigina ne tino i a au e tavini ki a koe.

16Ne faipati mai koe ki a au, kae ne fakalogo fakalei eiloa au ki au muna katoa ne fai. Te Aliki te Atua Malosi, au e o koe, tela la, au muna e aumai ne ia te fiafia ki toku loto.

17E seki fakamaumau oku taimi o nofo tasi mo nisi tino, o katakata kae fiafia. Au ne fakalogo eiloa ki au fakatonuga, ne nofo tokotasi eiloa au kae ko oko eiloa i toku ita.

18Ai a e puapuaga faeloa ei au? Ai a se mafai ei o lei oku pakiaga? Ai a e se lei ei? A koe e loto eiloa o faka'ita au e pela me se vaitafe foliki tela e masa pakupaku i te tau vela?”

19Ne tali mai te Aliki penei, “Kafai e foki mai koe, e toe puke mai eiloa ne au a koe, kae e toe fai eiloa koe mo aku tavini. Kafai e se faipati valevale koe, kae folafola eiloa ne koe te fekau aoga, kae ka toe fai koe mo aku pelofeta. A tino ka foki mai ki a koe, tela la, e se fita koe o fano ki a latou.

20Ka fai ne au a koe ke pela me se pui palasi makeke. Ka taua atu latou ki a koe, kae e se mafai o fakatakavale ne latou a koe. Au e fakatasi atu ki a koe o puipui kae tausi a koe.

21Ka fakasao ne au a koe mai i te malosi o tino amio masei. Ko au, te Aliki, tena ne faipati atu.”