SALAMO 92 - Tuvalu Revised Bible

Ko te Pese o Tavaega

1Te Aliki, se mea sili i te 'lei o avatu a fakafetai ki a koe,

O usu atu a pese o tavaega ki tou malu,

Ko te Atua Tafasili i te Maluga.

2Ko folafola atu a tou alofa tumau i taeao katoa,

Mo tou fakamaoni foki i po katoa,

3O usu pese ki lakau ta'ta

Fakatasi mo te leo malie o te kitala.

4Te Aliki, au ko fiafia ona ko au galuega 'mana;

Ko usu pese ei au mo te fiafia ona ko au mea ne fai.

5Te Aliki, ko oko eiloa i te sili o au galuega!

Ko oko eiloa i te 'loto o ou mafaufauga!

6Tenei sua mea e se mafai ne se tino valea o iloa;

E se mafai foki o malamalama i ei se tino supa:

7A tino amio ma'sei ka lau olaola pela me ne mouku,

Latou foki kola e fai mea 'se e mafai o maumea;

Ka ko te lotou ikuga e fulu faka'ma keatea,

8Me ko koe te Aliki, ko te pule sili i te maluga ke oko

eiloa ki te se gata mai.

9Ko iloa ne matou me ka 'mate katoa ou fili,

Mo tino amio ma'sei katoa ka fakatakavalegina.

10Ko oti ne fai ne koe au ke malosi pela me se pulumakau vao;

Ko oti ne fakamanuia ne koe au ki te fiafia.

11Ko oti ne lavea ne oku mata te takavalega o oku fili,

Ko oti foki ne lagona ne au te tagi o tino amio ma'sei.

12A tino amio'tonu ka 'tupu olaola pela mo pama lau olaola;

A latou foki ka olaola lei pela mo alasi o Lepanona.

13A latou pela me ne lakau ne 'toki i te fale o te Aliki,

E lauolaola i loto i te Faletapu o te tou Atua,

14E tiga eiloa te leva o te olaga o latou,

Kae fua mai faeloa.

E lau usiusi kae malosi i taimi katoa.

15Te mea nei e fakaasi mai i te Aliki e amiotonu;

A ia ko toku puiga, e seai eiloa se 'se i a ia.