1 TUPU 11 - Tuvalu Revised Bible

Ko Fulitua Solomona ki te Atua

1

23Ne fai foki ne te Atua a Lesona te tama tagata a Eliata ke fai fili ki a Solomona. A Lesona ne sola mai i tena matai ko Hatatesa, te Tupu o Sopa,

24kae nei ko fai mo takitaki o se potukau faomea. A te mea tenei, ne tupu i te otiga ne fakatakavale ne Tavita a Hatatesa kae 'ta valevale foki a taugasoa o latou ko te kau Sulia. A Lesona mo tena kau ne olo o nofo i Tamaseko; i kona ne fai ei a ia ne tena kau mo tupu o Sulia.

25A ia ko te fili eiloa o Isalaelu i aso o Solomona.

Ko te Tautoga a te Atua ki a Ielopoamo

26A te sua tino ne fai fili atu ki a Solomona ko tena ofisa e tokotasi e igoa ki a Ielopoamo, te tama tagata a Nepata, mai Seleta i Efalaima. A tena matua ko Selua, se fafine ko mate tena avaga.

27Tenei la te tala o te tekega o Solomona.

A Solomona e fai te fakalaugatasiga o te laukele i te feitu ki te saegala o Ielusalema kae toe faite fakalei a te 'pui o te fa'kai.

28A Ielopoamo se tagata malosi, kae i te mateaga ne Solomona me ko oko eiloa i te galue malosi, tena ne fakasopo ei ne ia ke fai mo takitaki o te kau galue katoa i te kogā laukele o te matakaiga o Manase, mo te matakaiga o Efalaima.

29I te aso e tasi, a Ielopoamo e fanatu mai i Ielusalema kae fakafetaui atu ki a ia i te auala a te pelofeta ko Aita mai Sailo.

30Ne tapale aka a Aita i te gatu loa fou e pei ei a ia, saesae ne ia ki potumea e sefululua,

31kae fai atu ki a Ielopoamo penei, “Puke atu e sefulu potumea, me i te Aliki te Atua o Isalaelu ko fai atu penei ki a koe, ‘Ka ave keatea nei ne au a te malo mai i a Solomona, kae ka avatu ne au ki a koe ke fai koe mo takitaki o te sefulu matakaiga.

32E tasi eiloa te matakaiga e nofo mo Solomona, me i au e alofa i taku tavini ko Tavita, pela foki mo toku fa'kai ko Ielusalema tela ko oti ne filifili ne au mai fa'kai katoa i luga i Isalaelu ke fai mo oku.

33Ka fai ne au a te mea tena, me i a Solomona ko fulitua mai ki a au o tapuaki atu ki atua fakaatea: ko Asitate, te atua fafine o Saitonu; ko Kemoso, te atua o Moapi; mo Milikoma, te atua o Amoni. A Solomona ko oti ne se fakalogo mai ki a au; ko oti nei ne fai ne ia se mea 'se kae ko oti foki ne se tausi ki tulafono mo fakatonuga, e pela mo tena tamana ko Tavita ne tausi eiloa ki aku tulafono mo fakatonuga.

34Ka se ave keatea katoa ne au a te malo mai i a Solomona; a ia e fai eiloa mo tupu ke oko ki tena mate. A te mea tena e fai ne au ona eiloa ko taku tavini ko Tavita tela ne filifili ne au kae ne fakalogo eiloa ki aku tulafono mo fakatonuga.

35Ka ave keatea ne au a te malo mai lima o te tama tagata a Solomona, kae avatu ne au e sefulu matakaiga ke pule koe i ei,

36kae ka taofi ne au e tasi te matakaiga ke nofo mo te tama tagata a Solomona, ko te mea ke isi faeloa se tino i te gafa o Tavita e tupu i Ielusalema te fa'kai ne filifili ne au ke tapuaki mai sale i ei a tino ki a au.

37Ielopoamo, ka fai ne au a koe mo tupu o Isalaelu, kae ka pule koe i luga i kogā laukele katoa kola e manako koe ki ei.

38Kafai e fakalogo mai koe ki a au kae tausi ki aku tulafono mo fakatonuga e pela mo taku tavini ko Tavita, kae ka fakatasi atu faeloa au ki a koe. Ka fai ne au a koe mo tupu o Isalaelu, kae fai foki a tino o tou gafa ke fai foki mo tupu i ou tua, e pela mo te mea ne fai ne au mō Tavita.

39Ka fakasala ne au a tino i te gafa o Tavita ona ko te agasala a Solomona, kae e se tumau te fakasalaga tena.”’

40Ne taumafai Solomona o tamate a Ielopoamo, ka ko Ielopoamo ne sola o nofo i te Tupu o Aikupito ko Sesaka. Ne nofo eiloa a ia i kona ke oko eiloa ki te taimi ne mate ei Solomona.

Ko te Mate o Solomona(2NTupu 9.29-31)

41A nisi mea aka katoa a Solomona ne fai, mo tena tofi mo tena poto e fakamau katoa i te tusi tenei: Te Tala Tuku fakasolo o Solomona.

42E tusa mo te fasefulu tausaga ne fai ei a ia mo tupu o Isalaelu kātoa, kae ne nofo eiloa a ia i Ielusalema

43Ne mate atu a ia kae ne tanu eiloa i te Fa'kai o Tavita. A ia ne sui ne tena tama tagata ko Leopoamo o fai mo tupu.