NAUMA 3 - Tuvalu Revised Bible

1Kalofa eiloa i te fa'kai ta tino mo te loi,

E fonu i te maumea tela ka 'fao kae puke malo!

2Faka'logo ki te pa'ke mai o kiniga o solofanua,

Te gulu mai o teka o kaliota,

Te fakatau'tele o solofanua mo

Te mapunapuna o kaliota!

3Tino faka'tele solofanua ko tele ki mua,

A pelu mo tao ko ma'lapu!

A tino mate ko tafola,

Mo foitino mate o tino e se lausia

Ka ko lakalaka fua latou ne tino!

4A Nineva e pela me se fafine tali tagata.

E taulekaleka kae fonu i togafiti fakataulaitu;

Ne fakatogafiti kae fakapologa ne ia a malo, tela la, ka fakasala ei a ia ne te Atua.

5Fai mai te Aliki Maluga,

“Ka fakasala ne au a koe e Nineva!

Ka ave ne au keatea ou lavalava ke nofo fuafua koe kae fakaasi atu ke matea a koe ne malo,

Ke iloa ne latou tou masiasi.

6Ka fai fakamasei ne au a koe

Kae ufi koe ki mea masei.

Ko fenua ka kilo atu mo te takalialia ki a koe.

7A latou katoa kola e matea ne latou a koe ka 'poi.

Ka fai olotou muna penei, ‘A Nineva ko masei valevale!

Ko oi e fia alofa ki a ia?

Ko oi ka fia fakamafanafana ki a ia?”’

8A koe Nineva, e a, e sili ake koe i a Tepesi, te laumua o Aikupito? E isi foki sena vaitafe, e pela me se pui e puipui ei a ia. A te vaitafe o te Naila ko tena lafiga.

9Ne pule ne ia a Sutana mo Aikupito. E seai se gataga o tena malosi; a Lipia ko tena taugasoa.

10Kae ne ave eiloa latou i te tafeaga. I tulimanu katoa o auala, a olotou tamaliki ko 'ta ke mate. A olotou takitaki foki ko oti ne saisai ki seni kae tufatufa atu ki takitaki kola ne puke ne latou a latou.

11Ka ko koe Nineva ka konā fakatakalialia! Ka taumafai foki koe o sola keatea mai i ou fili.

12A ou olo katoa ka pela mo lakau ko mati ko 'pala olotou fuataga; kafai e lu, ko olotou fuataga ka tatela tonu ifo ki tou gutu!

13Ko au sotia ko pela mo fafine, mo tou fenua foki ko tu fakasau fua i mua o ou fili. Ka sunu fakamasei a fiti i mua o ou mataloa ki te afi.

14Fakatoka ne vai ke uke i a koe ka siko, kae fai ke ma'losi ou olo! Lakalaka te pela ke makeke mō faite a puliki, kae fakatoka faka'lei a mea faite puliki!

15Me pefea eiloa au mea e fai, kae ka 'sunu eiloa koe ke mate, io me tamate i te taua. Ka fulu faka'ma koe e pela mo fuaga saito ko kai fakapalele ne sē akelise.

Ne tokouke koutou pela me ne sē akelise!

16Ne tokouke atu foki otou tino fai pisinisi i fetu o te lagi! Kae nei ko galo atu latou e pela mo sē akelise ko fola olotou kapakau o eva keatea.

17Ko tino maluga o koutou ko pela me se fuifuiga sē akelise e nofo i loto i pui i aso moko. Ka ko te taimi e sae ake ei te la, ko eva atu ei keatea kae seai se tino e iloa ne ia te koga ko lele ki ei!

18Te Tupu o Asulia, a ou kovana ko mate, mo ou aliki maluga ko moe i te moe e se toe ala mai! A tou fenua ko salalau i luga i mauga, kae seai se tino e mafai ne ia o toe fakafoki mai latou.

19E seai se fō ki ou pakiaga, e se mafai foki o mafu. A tino katoa kola e lagona ne latou te tala i tou malaia, e pati olotou lima i te fia'fia. E a, e isi se tino ne sao mai i au fakasauaga?