LOMA 11 - Tuvalu Revised Bible

Ko te Alofa 'Nau o te Atua ki a Isalaelu

1 Fili 3.5 Tela la, ko fesili atu au: ne 'teke ne te Atua ona tino tonu? Ikai, e se pena! Au se tino Isalaelu, se mokopuna o Apelaamo, se tino foki o te matakaiga o Peniamina.

2E seki 'teke eiloa ne te Atua ona tino tonu kola ko leva ne ana iloagina. E se iloa ne koutou a muna a te Tusi e uiga ki te tala ki a Elia i tena 'moliga i a Isalaelu ki te Atua ke fakasala?

31Tupu 19.10,14“Te Aliki, ko oti ne tamate ne latou au pelofeta, kae ofa foki ne latou au fata-fai-taulaga; ka ko au eiloa e tokotasi tenei koi toega, ka ko taumafai foki latou o tamate au.”

41Tupu 19.18Kae se a te tali a te Atua ki a ia? “Ko oti ne faka'toe ne au a te fitu afe o tino kola e seki tapuaki ki te atua loi ko Paala.”

5Tela la, e isi ne mo tino ne toega ki aso nei, kola ne filifiligina i te alofa tauanoa.

6Kae kafai ne fai i luga i te alofa tauanoa, ko tona uiga ne seki fakavae i olotou galuega, me kafai ne fai i luga i fakavae o galuega, ko se taku ei te alofa tauanoa, se alofa tauanoa.

7Kae se a la? Ne se maua ne tino Isalaelu a te mea tela ne 'salagina. Ne maua fua ne tino filifilia, ka ko te tokoukega ne faka'tuli.

8Teu 29.4; Isa 29.10E pela mo muna a te Tusi, “Ko tuku atu ne te Atua te agaga o te moe ki a latou, mo mata ke se matea ne latou, mo taliga foki ke se lagona ne latou, ke oko mai eiloa ki te aso tenei.”

9Sala 69.22,23Muna a Tavita:

“Ke fai olotou 'kaiga mo malei,

Se lua e 'to ei latou ki lalo, kae se fakasalaga foki ki a latou!

10Ke pouli foki olotou mata, ko te mea ke se mafai ne latou o matea se mea;

Ka ke fakamakau foki olotou tua, ke oko eiloa ki te se gata mai.”

11Tenei la, au e fesili atu ki a koutou. Ne tapatu sala olotou vae, ko te mea ke pa'ku latou? Ikai, e se pena! Tela la, ona ko te lotou ofa tulafono, ko oko mai ei foki te fakaolataga ki fenua fakaatea, ko te mea ke kaisano Isalaelu.

12Kafai ne fai te agasala a tino Iutaia mo auala e manuia i ei te lalolagi, io me ko te lotou paku mo auala e manuia i ei a fenua fakaatea, kati la ko se atafai eiloa i te uke o fakamanuiaga manafai ne 'kau katoa ki ei tino Iutaia!

Ko te Fakaolataga mō Tino o Fenua Fakaatea

13Nei, au e faipati ki tino o fenua fakaatea! Au se apositolo mo tino o fenua fakaatea, kae fakamatamata faeloa au ki taku galuega,

14ke fakakaisano ei ne au oku tino Iutaia, ko te mea ke fakaola ne au ne mo tino mai i a latou.

15Ne 'teke ne te Atua a tino Iutaia, kae talia ne ia a fenua fakaatea. Kae kafai e oko mai a te taimi e talia ei ne te Atua a tino Iutaia, ka faka'tu ake latou mai te mate ki te ola se gata mai.

16Kafai ko te katiga falaoa ne ofogina atu ke fai mo taulaga o mea muamua katoa e tapu, e pena foki te falaoa katoa; kae kafai foki te aka e tapu, e pena foki kaula.

17A nisi kaula o te olive 'toki ko oti ne 'fati keatea mai te olive, kae faka'piki atu te kaula o te olive vao ki te olive 'toki, e sui ei a kaula ne 'fati keatea. Fenua fakaatea, a koutou e pau eiloa mo te kaula o te olive vao tela ne faka'piki ki te olive 'toki, i te mea ko kau fakatasi nei koutou i te malosi mo te olaga maumea o tino Iutaia.

18Sa fakamatamata ki kaula. Kafai e fakamatamata koe ki ei, ke masaua la ne koe, me se ko koe e taofi ne koe te aka, ka ko te aka e taofi ne ia koe.

19Kae ka muna mai koutou, “Ne 'fati keatea kaula ko te mea ke faka'piki au ki ei.”

20E tonu tena. Ne 'fati keatea ona ko te lotou se fakatuanaki, kae ke tumau eiloa koutou i te fakatuanaki. Tela la, sa fakamata'mata ki ei, kae 'tau koutou o ma'taku.

21Me kafai ne seki fakaola ne te Atua a kaula tonu ne 'tupu mai i ei, e se fakaolagina foki koe.

22Mafaufau faka'lei ake ki te alofa kaimalie mo te kaitaua o te Atua: ko te kaitaua ki a latou kola ne pa'ku, ka ko te alofa kaimalie o te Atua mō koe, manafai e mautakitaki faeloa koe i tona alofa kaimalie, i te mea mana 'kati ei koe ke to keatea.

23Kae kafai ko nisi tino e se tumau i te lotou fakatuanaki, ka faka'piki ki ei, me i te Atua e isi sona mana o toe faka'piki latou.

24I te mea kafai ne 'kati koe keatea mai te olive vao tela ne tupu mai ei koe, kae faka'piki ki te olive 'toki, tela e seki tupu mai ei koe, ka faigofie atu manafai ko toe faka'piki a maga kona ki olotou olive tonu, kola ne 'tupu mai ei.

Ko te Alofa 'Nau o te Atua ki Tino Katoa

25Oku taina, e isi se mea tonu tenei e 'funa, tela e manako au ke iloa ne koutou; i te mea mana fia 'poto ei koutou: a te loto makeke o tino Isalaelu e se tumau, kae ka tumau eiloa ke oko ki te taimi ko ifo ei tino katoa o fenua fakaatea ki te Atua.

26Isa 59.20,21Tela la, ka fakaolagina Isalaelu katoa, e pela eiloa mo muna ne tusi:

“E vau te Fakaola mai Siona,

Ka ave foki ne ia keatea te amio masei mai i te fanauga a Iakopo.

27 Isa 27.9 Me e tenei eiloa taku feagaiga mo latou,

Manafai ko ave ne au keatea olotou agasala.”

28Ona ko te 'teke o tino Iutaia ki te Tala 'Lei, ko fai ne latou mo fili o te Atua ona ko koutou. Ona ko te lotou filifilia ne te Atua, ko fai nei latou mo ana fanau fagasele ona ko olotou tupuga.

29Me i meaalofa a te Atua mo tena kalaga, e se mafai eiloa o 'fuli.

30E pela eiloa mo koutou, ne se faka'logo ki te Atua; kae nei ko oti ne maua ne koutou a te alofa 'nau, ona ko te se faka'logo o tino Iutaia.

31Tela la, ko oti nei ne se faka'logo ki ei, ko te mea ke maua foki ne latou a te alofa 'nau tela ne fakaasi atu ki a koutou.

32I te mea ne fai ne te Atua a tino katoa ke se faka'logo, ko te mea ke isi sona alofa 'nau ki luga i tino katoa.

Ko Tavaega ki te Atua

33 Isa 55.8 Tapa! Ko oko eiloa i te 'poko o te maukoloa, mo te poto mo te malamalama o te Atua! E faigata o sukesukegina ana fakamasinoga, e faigata foki o iloa ona auala. E pela mo muna a te Tusi:

34 Isa 40.13 “Ko oi e iloa ne ia te mafaufau o te Aliki?

Ko oi foki e pulepule fakatasi mo ia?

35 Iopu 41.11 Ko oi foki se tino ne fai meaalofa ki a ia,

Ko te mea ke toe taui mai?”

36 1Koli 8.6 A mea katoa ne aumai i te Atua, ne ui mai foki i a ia, kae e a ia foki. Ke i a ia te vikiga ki te se gata mai. Amene.