IOPU 28 - Tuvalu Revised Bible

Ko Vikiga o te Poto

1E isi ne koga kola e keli ei te siliva;

E isi foki ne koga e faka'ma ei te aulo.

2E keli ne tagata a te fiti mai i te laukele,

Kae sunu a fatu ke liua mai ei te palasi.

3A tagata e olo o sukesuke te pouliga matolu eiloa.

E sukesuke i koga ki loto o te lalolagi kae keli kaupapa i te pouliga.

4A tagata e keli ne latou a te vili tela e keli ei a fatu taua, i te koga e seki oko eiloa ki ei ne tino,

Te koga e seai ne tino e nofo i ei.

I kona e galue ei latou kae mau eiloa olotou lima ki lopu i lua.

5A meakai e maua mai i te laukele; i lalo ifo o te laukele tena,

A mea katoa i ei ko masei valevale.

6A fatu i te lalolagi e maua mai i ei a te safaila,

A te aulo e maua mai i te pefu o fatu kona.

7E seai se oka e matea ne ia a te auala ki koga kona e keli ei a fatu taua,

E seai foki se valatua kai eva eiloa i luga i ei.

8E seai eiloa se leona io me se manu fekai ne olo sale i auala kona.

9A tagata e keli ne latou a kaupapa makeke,

E keli ne latou a mauga ke to keatea mai i olotou fakavae.

10I te keli atuga a latou i loto i kaupapa, ne maua ei ne latou a fatu taua.

11Ne keli eiloa latou ke oko ki te pogai o vaitafe,

Ke aumai ki te mainaga a mea funa.

12E maua i fea ne tatou a te poto?

E maua i fea ne tatou a te malamalama?

13A te poto e se maua i tagata; e seai se tino e iloa tonu ne ia te aoga o te poto.

14A koga poko o te moana mo te tai e fai mai me e galo foki te poto i koga kona.

15E se mafai o togi ki siliva mo aulo.

16A te aulo mo fatu taua tafasili i te gali e se lava foki mo togi ki ei a te poto.

17E taua atu i te aulo, e taua atu i te tiā aulo,

Io me ko te kilasi tafasili i te gali.

18A te 'taua o te poto e silia atu i fatu o te tai,

Io me ko kilasi io me ko lupi.

19A te topasi tafasili i te gali, pela foki te tina aulo,

E se taitai o pau mo te poto i te taua.

20E maua mai i fea a te poto? E maua mai i fea te malamalama?

21E seai se mea ola e mafai ne ia o lavea te poto, ke oko foki eiloa ki te manu tela e eva i luga.

22Ke oko foki eiloa ki te mate mo te masei valevale,

E fakaasi mai ne laua me ne tala fua ne lagona ne laua kae se ko te mea katoa.

23Ko te Atua fua tokotasi e iloa ne ia a te auala ki te poto,

Ko ia fua e iloa ne ia te koga e maua ei te poto,

24Me e lavea ne ia a feitu e fa o te lalolagi e lavea ne ia a mea katoa i lalo ifo o te lagi.

25I te taimi ne tuku mai ei ne te Atua a te malosi ki te matagi, kae fuafua ne ia a te lasi o te tai;

26I te taimi ne iku ei i te Atua a te koga ka faka'to ei te vaiua, mo te auala tela ka olo i ei a fatili;

27Tena te taimi ne lavea ei ne ia a te poto,

Kae tofotofo ne ia me e pefea a tena taua.

Ne talia ne ia a te taua o te poto.

28 Sala 111.10; Faata 1.7; 9.10 Muna a te Atua ki tagata, “Kafai e manako koutou ke maua

ne koutou te poto, e tau koutou o tapuaki atu ki te Aliki.

Ka fia maua ne koe te malamalama,

E tau mo koe o fulitua keatea mai i te faiga o amioga masei.”