GALUEGA 18 - Tuvalu Revised Bible

Ko te Galuega i Kolinito

1I te otiatuga i kona, ne tuku ne Paulo a Atenai kae fano ki Kolinito.

2I kona ne fetaui ei laua mo te Iutaia e igoa ki a Akuila, ne fanau i Pono, kae ne fatoa o'mai mo tena avaga ko Pisila mai Italia, ona ko te fakatonuga a te Kaisala ko Kalaotia ke se toe iai se Iutaia e nofo i Loma. Tela, fano ei Paulo o asi ki a laua.

3Ne nofo Paulo i ei, kae ga'lue fakatasi foki mo laua i te faiga o faleie, me tena te galuega e ola ei a ia.

4E finau malosi sale a ia i loto i fale tapuaki i Sapati takitasi, ko te mea ke tali'tonu a tino Iutaia mo tino Eleni.

5I te okomaiga a Sila mo Timoteo mai Maketonia, ne tuku atu katoatoa te malosi o Paulo o folafola atu a te muna, e takutonu atu ei ki tino Iutaia i a Iesu ko te Keliso.

6Ne 'teke ne latou a ia, kae muna masei atu ki ei. Ne tuetue atu ei ne Paulo te pefu mai ana gatu, kae fai atu, “Ke i luga i otou ulu otou toto. Ka ko au nei e 'ma eiloa i te mea tena, kae i te aso nei au ka fano ki fenua fakaatea.”

7Ne tuku ne ia latou, kae fano o nofo i te fale o te tino o fenua fakaatea e igoa ki a Taitusi Tiasitasi, se tagata e tapuaki ki te Atua, kae tu pili tona fale ki te fale tapuaki.

8A Kilipo ko te pule o te fale tapuaki, a ia foki mo tona kaiga katoa e talitonu ki te Aliki. E tokouke foki a tino Kolinito ne lagona ne latou a te muna, ne talitonu ki ei, kae ne papatisogina foki latou.

9E isi se fakaasiga ne oko ki a Paulo i te sua po, tela ne fai atu ei te Aliki ki a ia penei: “Sa mataku, faipati eiloa kae sa fakavaivai,

10i a au e fakatasi eiloa mo koe, e seai se tino ka fakamasei ne ia koe, me i te tokoukega o tino konei i te fa'kai tenei, ko oku tino.”

11Ne nofo Paulo i kona i te tasi mo te afā tausaga; o akoako atu te muna a te Atua ki tino.

12I te sopoga a Kaliona mo fai te Kovana o Eleni, ne 'luku fakatasi a tino Iutaia, puke fakapagota ei ne latou a Paulo o avatu ki mua o te fono,

13olotou muna, “A te tagata tenei, e taumafai o 'taki malo ne ia a tino ke tapuaki ki te Atua, i ala kola e 'teke atu ei ki tulafono.”

14I te taimi tela ne fai o faipati atu ei a Paulo, ka ko fai atu a Kaliona ki te kau Iutaia, “Moi fai e isi ne faifaiga masei io me ne tulafono ne ofa ne te tagata tenei, e penei ko kau atu au ki a koutou tino Iutaia.

15Kae ona ko te mataupu tenei e finau ei koutou e uiga ki muna, igoa mo otou tulafono, e i a koutou eiloa te fakatokaga faka'lei; me i a au e se ko te famasino o feitu kona.”

16Tela, atuli ei ne ia latou ke olo keatea mai te fono.

17Ne puke ne latou a Sosene te pule o te fale tapuaki, kae kini ne latou i mua o te fono, ka ko Kaliona e se fia saga lele eiloa ki ei.

Ko Toe Foki ki Anitioka

18

19Ne oko atu latou ki Efeso, tuku ei ne Paulo a Pisila mo Akuila i kona, kae fano ki loto i te fale tapuaki o finau mo te kau Iutaia, e uiga ki te malo o te Atua.

20Ne fakatagi atu latou ki a Paulo, ke 'nofo latou i se taimi tai leva atu, kae ne seki loto a ia ki ei.

21Tela, fakamavae ei latou, fai atu ei a ia: “Kafai e loto ki ei te Atua, ka toe foki mai au ki a koutou.” Malaga atu ei a ia mai Efeso.

22I tena okoatuga ki Kaisaleia, fano ei ki Ielusalema ke fetaui latou mo te Ekalesia, oti fano ei ki Anitioka.

23Ne tai leva eiloa tena nofoga i ei, kae ne fano sale i koga katoa i Kalatia mo Felukia o fakamalosi atu ki tino talitonu katoa.

Ko Apolo i Efeso mo Kolinito

24E isi se tagata Iutaia e igoa ki a Apolo, ne fanau i Alesania, kae ne vau ki Efeso; se failauga poto kae poto foki i muna o te Tusi.

25Ne akoakogina a ia i Ala Tonu o te Aliki; kae loto malosi foki a ia o akoako tonu atu a mea tonu e uiga ki a Iesu. E ui eiloa i mea kona, ka ko te papatisoga fua a Ioane e iloa ne ia.

26Ne kamata a ia o faipati mo te loto malosi i te fale tapuaki. I te 'logoga a Pisila mo Akuila i a ia, ave ei ne laua a ia ki te fale o akoako atu faka'lei ki a ia a Ala Tonu o te Atua.

27Ko tonu i a Apolo ke fano a ia ki Eleni, tela tusi ei ne taina talitonu i Efeso a te tusi ki taina talitonu i Eleni, ke talia ake ne latou a ia. I tena okoatuga ki kona, ne fesoasoani malosi eiloa a ia ki tino kola ko talitonu e alatu i te alofa tauanoa o te Atua.

28Ona ko tena finau malosi, ne fakatakavale ei ne ia a tino Iutaia i finauga i mua o tino, ne fakatalitonu atu foki ne ia mai te Tusi i a Iesu ko te Keliso.