ISAIA 43 - Tuvalu Revised Bible

Ko Tauto te Atua ke Fakasao tena Fenua

1Isalaelu, a te Aliki tela ne faite ne ia

Koe ko fai mai penei,

“Sa mataku, e fakasao ne au a koe.

Ne fakaigoa ne au koe, a koe e a aku.

2Kafai e ui atu koutou i loto i vai 'poko,

Au e fakatasi atu eiloa ki a koutou;

Ka se toe taotaomaki koutou ne otou fakalavelave.

Kafai e ui atu koutou i loto i te afi,

E se mafai koutou o 'paku;

Ka se mafai koutou o pakia i tofotofoga faigata kola e feagai mo koutou.

3Au ko te Aliki te otou Atua,

Te Atua tapu o Isalaelu,

Tela ne fakasao ne ia koutou.

Ka tuku atu ne au Aikupito ke fakasaoloto ei koutou;

Pela foki a Sutana mo Sepa,

4Ka tuku atu ne au a malo ko te mea ke fakasao otou ola,

Me i a koutou e taua ki a au,

Ka ko au e alofa ki a koutou kae tuku atu

Ne au te tulaga fakaaloalogina.

5Sa mataku, au e fakatasi mo koutou!

“E fakafoki mai ne au ou tino mai i fenua i te saegala,

Pela foki mai i te togala.

6Ka faipati atu au ki matu ke tiakina mai latou

Pela foki ki saute ke sa taofigina latou.

Tuku mai oku tino ke foki mai mai i fenua mao,

Mai i kogā koga katoa o te lalolagi.

7A latou ko oku tino tonu,

Ne faite ne au latou ke aumai ne

Latou te fakaaloalo ki a au.”

Isalaelu ko te Molimau a te Aliki

8Muna a te Atua,

“Aumai oku tino ki te fono.

E isi ne olotou mata kae e kivi;

E isi ne olotou taliga kae e se logo!

9Fai atu ki fenua ke o'mai ki te fono.

Ko oi se atua i a latou e mafai o valo ne

ia te mea ka tupu i aso fakamuli?

Ko oi i a latou ne valo ne ia a te mea tenei ko tupu nei?

A atua konei ke aumai olotou molimau

Ke fakamaoni ei i latou e 'tonu,

Ke molimau ki olotou pati me e 'tonu me ikai.

10“Tino Isalaelu, koutou ko aku molimau;

Ne filifili ne au koutou ke fai mo aku tavini,

Ko te mea ke iloa ne koutou au,

Kae talitonu mai foki ki a au,

Kae ke malamalama foki koutou i a au

Ko te Atua e tokotasi.

E seai aka foki se atua i oku tafa;

E seki ai eiloa mai ana mua,

E se toe ai foki eiloa ki te se gata mai.

11“Ko au tokotasi ko te Aliki,

Ko au fua e mafai ne au o fakasao koutou.

12Ne valo ne au te mea ka tupu,

Ka oti aka, ko vau ei au o fesoasoani ki a koutou.

E seai eiloa se atua fakaatea kai fai ne ia se mea pena;

A koutou ko aku molimau.

13Au ko te Atua ki te se gata mai.

E seai se tino e mafai o sao mai i toku malosi;

E seai se tino e mafai o fuli ne ia a te mea e fai ne au.”

Ko Sola mai i Papelonia

14A te Atua tapu o Isalaelu,

Te Aliki tela ne fakasao ne ia koutou,

Ne fai mai penei,

“Ka uga atu ne au se kautau o taua atu ki Papelonia,

Ko te mea ke fakasao koutou;

Ka ofa ki lalo ne au a mataloa o te fa'kai,

Ka ko te ka'laga fiafia o ona tino ka fuli ki te tagi.

15Au ko te Aliki, te otou Atua tapu.

Ne faite ne au koutou tino Isalaelu,

Tela la, au ko te otou tupu.”

16I aso mua, ne fai ne te Aliki se auala i loto i te tai,

Se auala i loto i te vai.

17Ne taki ne ia te kautau malosi eiloa o 'ta ke mate,

Se kautau e uke olotou kaliota mo solofanua.

E 'siga ifo latou se toetu eiloa,

Ko mate atu pela me se ulaga o te moli gako tela ne tamate.

18Ka ko te Aliki ne fai mai penei,

“Sa taofi mau ki mea ne tupu i taimi ko teka

Io me tausi ki mea ne fai i aso mua eiloa.

19Onoono mai ki te mea fou tenei ka fai ne au.

Tenei e tupu nei, e mafai o lavea atu nei ne koutou!

Ka fai ne au se auala i loto i te vao,

Kae tuku atu ne vaitafe mō koutou i kona.

20Ke oko foki eiloa ki manu vao ka fakaaloalo mai ki a au;

A tiakolo mo ositelite ka tavae ne latou a au,

Manafai ko faite ne au a vaitafe ke tafe i loto i te toafa,

Mo toku fenua filifilia.

21A latou ne faite ne au mo oku,

Tena la, ka usu ne latou a pese e tavae ei au!”

Ko te Agasala a Isalaelu

22Muna a te Aliki,

“Isalaelu, a koutou ko fiu i a au;

A koutou e seki tapuaki mai ki a au.

23E seki aumai ne koutou otou mamoe

Mo fai otou taulaga sunu;

E seki fakaaloalo mai koutou ki a au i otou taulaga.

E seki fakafi'ta ne au koutou o fai 'soko atu

Ke aumai otou taulaga,

Io me fai 'soko atu ke sunu mai mea manogi.

24E seki togi ne koutou ne mea manogi mō oku

Io me fakafiafia au ki gako o otou manu vae fa;

Kae ne fakafi'ta fua ne koutou au ki otou agasala;

Au ko fiu i otou mea 'se e fai sale.

25E ui i feitu kona, ka ko au ko te Atua tela

E fakamagalo ne au otou agasala;

Ne fai ne au te mea tenei me i toku uiga e pena eiloa.

Ka se fakasala ne au koutou i otou agasala.

26“Tatou ka olo ki te fono; fakaasi mai a mea kona e se malie ei koutou!

Aumai te otou mataupu ke fakatalitonu ei i a koutou e tonu!

27A te otou tupuga taumua eiloa ne agasala;

A otou takitaki ne agasala mai ki a au,

28Mo otou tino pule ne fakalai'lai ne latou toku fale tapuaki.

Tena, ne fakamalaia ei ne au Isalaelu;

Ne tuku atu ne au oku tino ke fakamasiasigina.”