SALAMO 81 - Tuvalu Revised Bible

Ko te Pese mo te Aso Fakailoga

1Kalaga mo te fiafia ki te Atua te 'tou 'puiga;

Usu atu vikiga ki te Atua o Iakopo

2Kamata te pese, kae ta samupelini;

Ta mai ne pese gali i kitala mo faili.

3 Nume 10.10 Ili te pu mō te aso fakailoga;

i taimi e sae ei te masina, mo taimi e sulu ei.

4A te mea tenei se tulafono ki a Isalaelu

Se fakatonuga foki mai te Atua o Iakopo.

5Ne tuku atu ne ia te mea tena ki te fenua o Isalaelu,

i tena fanatuga o fai taua ki te fenua o Aikupito.

Ne lagona ne au se leo fou e fai mai penei,

6“Ne ave ne au keatea amoga 'mafa i otou tua;

Ne tuku foki ne au ki lalo otou amoga 'mafa.

7 Eso 17.7; Nume 20.13 Kafai ko maua koutou ne fakalavelave,

Ko ka'laga mai ei koutou ki a au,

Kae ka fakaola ne au a koutou.

E tali atu au ki a koutou mai toku koga muni i te afā;

Ne tofotofo foki ne au koutou i te vai o Melipa.

8Toku fenua, fakalogo mai ki aku polopolokiga;

Isalaelu, ko oko eiloa toku manako ke fakalogo mai koe ki a au!

9 Eso 20.2,3; Teu 5.6,7 Se 'tau eiloa mo koutou o tapuaki atu ki se atua fakaatea.

10Au ko te Aliki te Atua o koutou,

tela ne aumai ne ia koutou mai te fenua o Aikupito.

Faka'maga otou gutu ke fagai ne au koutou.

11“Ka ko toku fenua ko se fia saga mai eiloa ki a au;

A Isalaelu foki, ko se fakalogo mai ki a au.

12Tela ne tuku atu ne au latou ke olo mo olotou loto makeke,

Ke fai eiloa te mea e 'loto latou ki ei.

13Ko oko eiloa toku manako ki toku fenua ke faka'logo mai ki a au,

Mo toku manako foki ke tautali mai ki a au!

14Ka fakatakavale fakavave eiloa ne au olotou fili,

Kae fakatakavale foki tino katoa e ita ki a latou.

15A tino kola e takalialia ki a au, ka ifo i te ma'taku i oku mua;

A te olotou fakasalaga e seai se gatamaiga.

16Ka fagai ne au koutou ki saito tafasili i te lei,

Kae fakama'kona foki ne au koutou ki hani.”