ISAIA 14 - Tuvalu Revised Bible

Ko te Fokimaiga mai i te Tafeaga

1A te Aliki ka toe alofa ki tena fenua ko Isalaelu, kae toe filifili ne ia ke fai mo ona tino tonu. Ka toetuku atu ne ia latou ke nofo i te lotou fenua, kae ka o'mai foki a tino o fenua fakaatea o nofo tasi mo latou i kona.

2E uke a malo ka fesoasoani ki tino Isalaelu o toe fakafoki atu ki te fenua tela ne aumai ne te Aliki mō latou, kae i kona ka fakagalue ne tino Isalaelu a tino o malo fakaatea o fai mo pologa a latou. A malo kola ne fakatakavale ne latou a Isalaelu, ka fakatakavale nei ne Isalaelu, kae ka pule nei ne Isalaelu a malo kola ne pule fakasaua mua ki a latou.

Ko te Tupu o Papelonia i te Lalolagi o Tino Mate

3Ka fakafilemu ne te Aliki a tino Isalaelu mai i puapuaga kola ne mae fi'ta ei latou, pela foki mai i galuega 'mafa kola ne fakagalue malo ei latou ne nisi malo.

4Kafai ko oti ne fakatoka ne ia te feitu tena, e tau la ei mo tino Isalaelu o fakalili te tupu o Papelonia penei:

“A te tupu masei ko takavale! Ka se toe fakasaua eiloa ne ia se tino!

5Ko oti ne fakagata ne te Aliki a te malosi o takitaki amio masei

6kola ne fakapuapuaga ne latou a tino i olotou kaitaua, kae fakasaua faeloa ne latou a malo kola ne fakatakavale ne latou.

7Nei, ko fatoa filemu te lalolagi katoa, mo tino katoa foki ko usu pese mo te fiafia.

8A lakau ko pelosi mo alasi o Lepanona ko oko eiloa i te fiafia i te takavalega o te tupu, me ko seai nei se tino e toe vau o kati latou ki lalo!

9“A te lalolagi o tino mate ko toka nei o talia ne ia a te tupu o Papelonia. A agaga o tino kola ne takutakua i te lalolagi ko gasuesue valevale. A agaga o tupu ko tu ake mai i olotou nofogaaliki.

10Ne ka'laga atu katoa ki a ia penei, ‘A koe nei ko pau fua mo matou i te vaivai! A koe ko penei mo matou!

11Ne masani koe o fakaaloalogina ki te leo o kitala, kae nei a koe ko i lalo i te lalolagi o tino mate. A koe ko takato i luga i anufe, kae fonu tou foitino i ilo.’ ”

12 Faka 8.10; 9.1 Te tupu o Papelonia, te fetu ao maina, a koe ko oti ne to mai i te lagi! I taimi ko teka, ne fakatakavale sale ne koe a malo, kae nei a koe ko palele ne pei ifo ki lalo i te laukele.

13Mata 11.23; Luka 10.15 A koe ne taumafai o kake ki te lagi o tuku tou nofogaaliki mai i luga atu o te fetu tafasili i te maluga. Ne mafaufau koe ke sagasaga koe pela me se tupu i luga i te mauga tena i matu, te koga e maopoopo ei a atua.

14Ne fai ake koe pela i a koe ka kake aka ki taulu o kaumana ke fai koe pela mo te Atua Malosi.

15Kae tela la, a koe ne iku mai fua ki lalo i te toe koga poko eiloa i te lalolagi o tino mate.

16“A tino mate ka pula 'toka atu ki a koe mo olotou gutu e faka'maga. Ka fesili ake latou penei, ‘Tena te tagata tela ne kosu ne ia te lalolagi kae fai a malo ke polepole?

17Tena te tagata tela ne ta fakamasei ne ia a fa'kai kae fuli te lalolagi ke fai mo toafa? Tena te tagata tela e se mafai o fakasaoloto ne ia ana pagota, io me tuku atu ke foki ki olotou fale? ’ ”

18A tupu katoa o te lalolagi e takato i olotou tanuga gali,

19ka ko koe e seai sou tanuga, a tou foitino mate e pei fua ki tua ke pala. Ka taotaomaki tou foitino ne foitino o sotia kola ne mate i te taua, kae ka pei fakatasi tou foitino mo foitino o sotia kona ki te lua fatufatua, kae lakalakagina.

20Ona ne fakamasei ne koe tou fenua kae 'ta foki eiloa ne koe a tino o tou fenua, tela la, ka se tanu koe pela mo nisi tupu. E seai eiloa se tino i tou kaiga amio masei e ola mai.

21Na kamata o ta a tino! A tama tagata a te tupu tenei ka mate ona ko agasala a olotou tupuga. Ka seai eiloa se tino o latou e toe pule ne ia te lalolagi, io me faite ne fa'kai i ei.”

A Papelonia ka Ta Fakamasei ne te Atua

22Muna a te Aliki Malosi penei, “Ka taua atu au ki Papelonia kae ka ofa fakamasei ne au. E seai eiloa se mea e fakasao ne au — seai ne tamaliki, seai eiloa ne tino e fakaola ne au. Ko au, te Aliki, tena ne faipati atu.

23Ka fuli ne au Papelonia ke pela me se laukele ko sua faeloa ne te vai, kae ka nofo i kona a manu ko lulu. Ka salu ne au Papelonia ki te salu, tela e ave keatea i ei a mea katoa. Ko au, te Aliki Malosi, tena ne faipati atu.”

Asulia ka Ta Fakapalele ne te Atua

24 Isa 10.5-34; Nau 1.1—3.19; Sefa 2.13-15 A te Aliki Malosi ko oti ne fai tena tautoga penei: “A te mea ne fuafua ne au e taunu eiloa. A te mea ne mafaufau au o fai, e fai eiloa.

25Ka ta ne au a tino Asulia i luga i toku fenua ko Isalaelu, kae lakalaka latou i luga i oku mauga. Ka fakasao ne au toku fenua mai i te amoga mafa a Asulia, pela foki mai galuega 'mafa kola e fai ne latou.

26Tena taku fuafuaga mō te lalolagi, ka ko toku lima ko fakaoko atu o fakasala a malo.”

27A te Aliki Malosi ko toka eiloa o fai te mea tena; ko oti ne fakaoko atu tena lima o fakasala, kae e seai eiloa se tino e mafai o taofi ne ia.

Filisitia ka Ta Fakapalele ne te Atua

28 2Tupu 16.20; 2NTupu 28.27 Tenei te fekau tela ne folafola i te tausaga ne mate i ei te Tupu ko Aasa.

29 Iele 47.1-7; Eseki 25.15-17; Ioelu 3.4-8; Amo 1.6-8; Sefa 2.4-7; Saka 9.5-7 Tino Filisitia, a te amo tela ne kini sale ki ei koutou ko fati, kae e se tau mo koutou o fiafia. Kafai ko mate se gata, kae sui mai ne se gata tafasili atu i te masei. A te fua o te gata kafai e mafā, kae to mai i ei se talako fai kapakau.

30A te Aliki ka fai mo tausi mamoe ki tino mativa o tena fenua, kae ka tuku ne ia ke ola mo te saogalemu. Ka ko koutou tino Filisitia, ka aumai ne ia se oge fakamataku ki a koutou, kae ka seai eiloa se tino o koutou e sao mai i ei.

31Koutou fa'kai katoa o Filisitia, tagi kae kalaga mo se fesoasoani! A koutou katoa ke mataku! A te kaumana pefu e vau mai i matu — se kautau e seai eiloa ne tino mata mataku i ei.

32Se a te tali ka fai atu ne matou ki avefekau kola e o'mai ki a matou mai i Filisitia? Ka fai matou ki ei i te Aliki ko oti ne atiake ne ia a Siona, ka ko ana tino kola ne fakapuapuagagina ka maua ne latou se filemu i kona.