2 NOFOAIGA TUPU 29 - Tuvalu Revised Bible

Ko Hesekia te Tupu o Iuta(2Tupu 18.1-3)

1A Hesekia ne fai mo tupu i Iuta, ka ko luasefulu lima ei ona tausaga, kae ne pule ne ia tena malo i tausaga e luasefulu iva, ka ko ia e nofo i Ielusalema. A tena matua ko Avia, te tama fafine a Sakalia.

2Ne tautali a ia i auala o tena tupuga ko Tavita, me ne fai ne ia a mea e fiafia ki ei te Aliki.

Ko te Faka'maga o te Faletapu

3I te masina muamua o te nofoaiga a Hesekia, ne toe tala ne ia a mataloa o te Faletapu, kae toe fakafou ne ia.

4Ne fakamaopoopo ne ia te potukau faitaulaga mo te kau sa Levi i te koga fono o te Faletapu i te feitu ki te saegala, i kona ne faipati ei a ia ki a latou.

5Muna a ia, “Koutou te kau sa Levi ke faka'malu otou foitino, kae faka'ma a te Faletapu o te Aliki, te Atua o otou tupuga. Ave keatea mai i te Faletapu a mea katoa kola e fakalailai ei te Faletapu.

6A 'tou tupuga ne seki fakamaoni ki te Aliki te tou Atua, kae ne fai ne latou a mea e se fiafia ki ei te Aliki. Ne tiaki ne latou a ia, kae fulitua ki te koga tenei e nofo ei a ia.

7Ne pono ne latou a mataloa o te Faletapu, tamate a moli i ei, kae ko se sunu ne mea manogi io me ofo olotou taulaga i te Faletapu o te Atua o Isalaelu

8Ona ko te mea tena, ko kaitaua ei te Aliki ki Iuta mo Ielusalema. A te mea ne fai ne ia ki Iuta mo Ielusalema ko 'poi kae mataku ei a tino katoa. E iloa fakalei ne koutou a te mea tena.

9A 'tou tamana ne mate i te taua, ka ko 'tou avaga mo tamaliki ne ave fakapagota.

10“Ko oti ne tonu i toku loto ke fai se feagaiga mo te Aliki, te Atua o Isalaelu, ko te mea ke se toe ita mai ki a tatou.

11Aku tama, sa fakamaumau se taimi. Ko koutou ko tino ne filifili ne te Aliki ke sunu mea manogi ki a ia kae taki foki a tino ke tapuaki atu ki a ia.”

12-14Konei a tino sa Levi ne nofo i kona:

Mai te kaukaiga o Koate, ko Mahata te tama tagata a Amasai, mo Ioelu te tama tagata a Asalia

Mai te kaukaiga o Melali, ko Kiso te tama tagata a Apiti, mo Asalia te tama tagata a Iehaleli

Mai te kaukaiga o Kelesona: ko Ioa te tama tagata a Simena, mo Etena te tama tagata a Ioa

Mai te kaukaiga o Elisafana: ko Semeli mo Ieueli

Mai te kaukaiga o Asafo: ko Sakalia mo Matania

Mai te kaukaiga o Hemanu: ko Ieuelu mo Simei

Mai te kaukaiga o Ietutunu: ko Semaia mo Usieli.

15Ne fakamaopoopo ne tagata kona a olotou taina sa Levi, tena, faka'ma ei olotou foitino i feitu faka‐tapuakiga. Oti aka, fai ei ne latou a te fakatonuga a te tupu ke faka'ma a te Faletapu, e pela eiloa mo te Tulafono a te Aliki.

16Ne ulu atu a faitaulaga ki loto i te Faletapu o faka'ma i feitu fakatapuakiga, kae ne tali keatea ne latou a mea lailai katoa ki te malae fono o te Faletapu. Ne avatu ne te kau sa Levi a mea kona mai i kona, o ave ki tua o te fa'kai ki te vanu o Kitilona.

17Ne kamata te galuega i te po muamua o te masina muamua, kae i te valu o aso ne palele ei te galuega pela foki te mataloa ki te Faletapu. Tena, ne toe galue foki ei latou i te sua valu aso i te fakatokaga o te Faletapu mō tapuakiga, ke oko eiloa ki te po sefuluono o te masina.

Ko Toe Fakatapu te Faletapu

18Tenei te lipoti ne fakatoka ne te kau sa Levi ki te Tupu ko Hesekia: “Ko oti te galuega a matou i te faka'maga o te Faletapu i feitu fakatapuakiga, e aofia ei te fata-fai-taulaga mō taulaga sunu mo ana mea katoa, te taipola e tuku ei te falaoa tapu mo ana mea katoa.

19Ko oti foki ne fakafoki mai ne matou a mea katoa kola ne ave keatea ne te Tupu ko Aasa i tausaga ne seki fakamaoni ei a ia ki te Atua, kae konei ko oti katoa ne toe fakatapu ne matou. Konei katoa e tuku i mua o te fata-fai-taulaga a te Aliki.”

20Ne fakamaopoopo fakavave ne te Tupu ko Hesekia a takitaki o te fa'kai, olo tasi atu ei latou ki te Faletapu.

21Ne puke ne latou e fitu pulumakau tagata, fitu mamoe, fitu tama mamoe, kae e fitu kouti, mo fai te taulaga e ave keatea ei agasala a te kaigā tupu mo tino o Iuta, kae e faka'ma foki ei te Faletapu i feitu fakatapuakiga. A te tupu ne fai ki faitaulaga i te gafa o Alona, ke ofo a manu vae fa i luga i te fata-fai-taulaga mo fai a taulaga.

22Ne ta muamua ne faitaulaga a pulumakau tagata, tao atu ki ei ko mamoe, tao atu ki ei ko tama mamoe, kae ne ligiligi ne latou a toto o taulaga takitasi ki luga i te fata-fai-taulaga.

23Fakamuli eiloa, ne avatu ne latou a kouti ki te tupu, pela foki ki nisi tino e tapuaki i kona, kola ne na olotou lima ki luga i kouti kona.

24Tena, ne tamate ne faitaulaga a kouti, kae ligi olotou toto ki luga i te fata-fai-taulaga ke fai mo taulaga e ave keatea ei a agasala a tino katoa, me ko te fakatonuga a te tupu ke fai a taulaga sunu mo taulaga mō te fakamagaloga o agasala mo tino katoa o Isalaelu

25Ne tautali eiloa te tupu ki fakatonuga kola ne aumai ne te Aliki ki te Tupu ko Tavita e auala i a Kato, te pelofeta a te tupu, pela foki i a Natano te pelofeta; ne fakatulaga ne ia a te kau sa Levi i te Faletapu mo olotou kitala mo sumepalo,

26mo lakau fakatagitagi e pela mo mea ne fakaaoga sale ne te Tupu ko Tavita. A faitaulaga ne tu foki i kona mo olotou pu.

27Ne fai te fakatonuga a Hesekia ke fai a taulaga sunu. I te taimi ne kamata ei o fai a taulaga, ne usu ne tino a pese o vikiga ki te Aliki, ka ko te kau fakatagitagi ne kamata o ili olotou pu kae fakatagi mo nisi mea fakatagitagi aka.

28A tino katoa i kona ne kau fakatasi i te tapuakiga, ka ko pese mo mea fakatagitagi ne tumau eiloa ke oko ki te taimi ne sunu katoa ei a taulaga.

29Tena, ko te Tupu eiloa ko Hesekia mo tino katoa ko totuli ki lalo kae tapuaki atu ki te Atua.

30A te tupu mo takitaki o te fenua, ne fai atu ki te kau sa Levi ke usu atu ki te Aliki a pese o vikiga kola ne tusi ne Tavita, pela foki mo pese ne fai ne Asafo te pelofeta. Tena la, ne pese katoa a tino mo te fiafia i te taimi ne totuli ei latou kae tapuaki atu ki te Atua.

31Ne fai atu a Hesekia ki te vaitino penei, “A koutou nei ko 'ma i feitu fakatapuakiga, tela la, aumai a taulaga a koutou, e fai mo taulaga fakafetai ki te Aliki.”Ne faka'logo eiloa te vaitino, kae e isi ne tino ne ofo mai olotou manu ke ta mo fai a taulaga sunu.

32Ne aumai ne latou e fitusefulu pulumakau tagata, e selau mamoe, kae e luaselau tama mamoe, ke fai mo taulaga sunu ki te Aliki;

33Ne aumai foki ne latou e onoselau pulumakau tagata kae tolu afe mamoe ke ta mo kai a tino.

34Ona ko faitaulaga e se tokouke, tena ne fesoasoani atu ei a te kau sa Levi ki te taga o manu katoa kona, ke oko eiloa ki te taimi ne palele ei te galuega tena. I te taimi tena, ko tokouke eiloa a faitaulaga ko oti ne faka'ma olotou foitino i feitu fakatapuakiga. E sili atu te fakamaoni o te kau sa Levi i te tausiga o olotou foitino ke 'ma i lo faitaulaga.

35E se gata i te ofoga o taulaga sunu katoa, a faitaulaga e sunu foki ne latou a gako kola e ofo mai i taulaga kola ne kai ne tino, pela foki mo te ligiga o te uaina tela e ofo tasi mo te taulaga sunu.

Tena, ne toe kamata ei a tapuakiga i te Faletapu.

36A te Tupu ko Hesekia mo tino katoa ko oko eiloa i te fiafia, me i te Atua ne fesoasoani atu i te faiga o mea kona ke vave oti.