ISAIA 50 - Tuvalu Revised Bible

1Muna a te Aliki,

“I tau fakatau, ne uga ne au oku tino ke olo keatea

E pela me se tagata tela ko tiakina ne ia tena avaga?

Ko fea la a pepa o te talaga o te fakatasiga?

I te otou fakatau ne togi atu ne au koutou ke ave fakapagota

E pela me se tagata tela e togi atu ana tamaliki ke fai mo pologa?

Ikai, a koutou ne ave fakapagota ona ko otou agasala;

A koutou ne ave keatea ona ko otou amioga masei.

2“Ai a ne seki saga mai ei toku fenua

I te taimi ne fanatu ei au ki a latou o fakasao latou?

Ai a seki tali mai ei latou i te taimi ne kalaga atu ei au?

E se mafai ne au o fakasao latou?

E mafai ne au o faka'masa pakupaku te tai i taku fakatonuga,

Kae fai a vaitafe ke liu toafa,

Ko te mea ke mate a ika i ei me ko seai se vai.

3E mafai ne au o fakapouli a te lagi,

E pela me ko tagi fanoanoa ki se tino mate.”

Ko te Fakalogo o te Tavini a te Aliki

4Ko oti au ne akoako ne te Aliki Sili ki muna e tau o fai ne au,

Ko te mea ke mafai ne au o fakamalosi a loto o tino loto vaivai.

I taeao katoa, e fai ne ia toku loto ke fiafia o fakalogo ki ana akoakoga.

5Ne aumai ne te Aliki ki a au a te malamalama,

Ka ko au e seki 'teke io me fuli keatea mai i a ia.

6 Mata 26.67; Male 14.65 Ne fuli atu toku tua ki a latou kola ne 'kini ne latou a au.

E seki 'vao ne au latou i te oko'maiga o faka'itaita au,

Pela foki i te oko'maiga o futi toku talafa

Kae puaki mai ki oku mata.

7Au se mae i olotou muna faka'itaita

Me i te Aliki Sili e fesoasoani mai ki a au.

Ne fakamalosi eiloa au o kufaki olotou faifaiga se 'lei ki a au.

E iloa ne au i a au e se fakamasiasigina,

8 Loma 8.33,34 Me i te Atua e pili mai,

Kae ka fakamaoni ne ia i a au e se 'se.

E isi se tino e manako o ave ne ia au ki te fono?

O'mai ke olo fakatasi tatou ki te fono!

Fai ki ei ke fakaasi mai tena tagi!

9Ko te Aliki Sili e pulu ne ia a au;

Ko oi la e mafai o fakaasi mai i a au e 'se?

A latou katoa kola ne ave ne latou au

Ki te fono ka galo atu katoa;

Ka galo atu e pela me ne laugatu ne

Kai ne mogamoga.

10A koutou katoa kola e ava ki te Aliki

Kae fakalogo ki muna a tena tavini,

Kafai e sasale koutou i te auala pouli tagataga,

Masaua o talitonu ki te Aliki kae faka'na

Ki te otou Atua.

11A koutou katoa kola e mafaufau o 'ta nisi tino,

Ka malaia eiloa koutou i otou togafiti masei ne fai.

Ko te Aliki eiloa ka fakataunu ne ia a te mea tena;

Ka puapuaga koutou i se ikuga masei.