SALAMO 25 - Tuvalu Revised Bible

Ko te Talo mō te Takitakiga mo te Puipuiga

1Te Aliki, au e talo atu ki a koe;

2A koe ko toku Atua e fakatuaga au ki ei.

Fakasao mai au mai te masiasi o te takavale;

Sa faigina oku fili ke katakata mai ki a au!

3A latou kola e talitonu ki a koe,

E se mafai o oko ki a latou te takavale,

Kae oko fua ki a latou kola e 'teke ki a koe.

4Te Aliki, akoako mai ki a au ou auala;

Fakaasi mai foki ke iloa 'lei ne au.

5Akoako mai au ke ola i tau munatonu;

Me i a koe ko toku Atua, tela e fakasao ne ia au.

Au e talitonu faeloa ki a koe.

6Te Aliki, ke manatua tou aga'lei mo tou alofa tumau,

Tela ne fakaasi ne koe i aso taumua.

7Fakamagalo mai aku agasala mo aku mea 'se ne fai i aso koi tamataene ei au.

Te Aliki, ke manatua mai au i tou alofa tumau mo tou atafai!

8A te Aliki e amiotonu kae 'lei,

E akoako ne ia a tino agasala ki te auala e 'tau o tautali i ei.

9E takitaki ne ia a tino loto maulalo ki te auala tonu

Kae akoako foki ne ia a latou ki tena kanoloto.

10E takitaki ne ia ki te alofa mo te fakamaoni a latou katoa kola e tausi ki tena feagaiga mo ana fakatonuga.

11Te Aliki, tausi ki tau tautoga kae fakamagalo mai aku agasala me ko oko eiloa i te uke.

12A latou kola e faka'logo ki te Aliki ka iloa ne latou mai

i a ia te auala e 'tau o tau'tali latou i ei.

13Ka maua ne latou te olaga maumea,

Ka ko olotou fanau foki ka fai mo latou te fenua.

14A te Aliki ko te taugasoa o tino kola e faka'logo ki a ia,

Kae fakamautakitaki foki ne ia tena feagaiga mo latou.

15E fakasaga oku mata ki te Aliki mō se fesoasoani i taimi katoa,

Kae fakasao ne ia au mai fakalavelave.

16Te Aliki, saga mai ki a au, kae alofa mai foki ki a au,

i a au e tokotasi kae vaivai.

17Ave keatea a mea katoa e fakalavelave i toku loto,

Kae fakasao mai au i oku puapuaga katoa.

18Mafaufau mai ki oku fi'taga mo oku puapuaga

Kae fakamagalo mai aku agasala katoa.

19Kilo mai ki te tokouke oku fili;

Ko oko eiloa i te takalialia mai ki a au.

20Puipui mai kae fakasao mai au;

Tausi mai ke moa e takavale au.

Au e fanatu ki a koe mō se fakaolataga.

21Ko toku lei mo toku fakamaoni e ola ei au,

i a au e talitonu ki a koe.

22Te Atua, fakaola tou fenua ko Isalaelu mai olotou puapuaga katoa!