SALAMO 18 - Tuvalu Revised Bible

Ko te Pese Manumalo a Tavita (2Samu 22.1-51)

1Te Aliki, ko oko eiloa toku alofa ki a koe!

A koe ko toku lafiga.

2A te Aliki ko toku 'pui

A ia foki ko toku olo malosi.

A toku Atua ko toku 'pui e sao ei au.

E puipui ne ia a au e pela me se talita;

E faka'malu ne ia au kae tausi mai foki ke sao au.

3Au e kalaga atu ki te Aliki

Ko fakasao ei ne ia au mai oku fili.

Ke vikia te Aliki!

4A te fakamataku o te mate ko i oku feitu katoa;

A te puapuaga ko 'fati pela me ne galu i luga i a au.

5A te fakamataku o te mate ko nikoi mai i a au;

Mo te tanuga foki ko toka tena malei mo oku.

6I taimi o oku puapuaga ne kalaga ei au ki te Aliki;

Ne kalaga au ki toku Atua ke fesoasoani mai.

Ne lagona ne ia toku leo i loto i tena faletapu;

Ne lagona foki ne ia taku tagi mo se fesoasoani.

7Tela, ne galulu te lalolagi kae gasuesue;

Ne pena foki fakavae o mauga, ne gasue'sue kae ma'taku

Me i te Atua ko kaitaua!

8Ne 'pusa mai te au mai ona puisu,

Ne vau foki te afi mo te malala 'ka mai tena gutu.

9Ne 'vae ne ia a te lagi kae vau ki lalo

Mo te kaumana pouli i lalo i ona vae.

10Ne eva makini a ia i te manu fai kapakau;

Ne malaga a ia i luga i kapakau o te matagi;

11E ufi tena foitino ki te pouliga;

A kaumana matolutolu kae 'fonu i vai, e nikoi ia.

12A vaiua fatu mo uilaafi e o'mai mai te uila i ona mua

Kae ulu i loto i kaumana pouli.

13Tena ne pakalaga mai te Aliki mai te lagi;

Lagona ei ne latou te leo o ia tela e tafasili i te Maluga.

14Ne sana mai ne ia ana matasana, 'tele valevale ei ona fili,

Atuli ei ne ia latou ki lapalapaga o uila.

15Te Aliki, te takele papa o te moana ko takato fakasau,

A fakavae foki o te lalolagi ko 'tu aliali fua mai

i te taimi ne vao ei ne koe ou fili,

Kae kalaga ki ei mo te kaitaua.

16Ne 'kapa ifo a lima o te Aliki mai te lagi o puke ake au;

Ne avake ne ia a au mai te moana 'poko.

17Ne fakasao ne ia au mai oku fili ma'losi,

Pela foki mai tino katoa kola e ita mai ki a au,

Kola e silia atu te olotou ma'losi i a au.

18Ne faitaua mai latou ki a au, i te taimi ne puapuagatia ei au;

Ka ko te Aliki ne puipui ne ia a au.

19Au ne fakasao ne te Aliki i taimi o puapuaga;

Ne fakasao ne ia a au me e fiafia ki a au.

20Ne maua ne au te taui 'lei mai te Aliki me i a au e amiotonu;

Ne fakamanuia ne ia au me i a au se tino e amio 'ma.

21Ne tausi ne au a tulafono a te Aliki;

A au e seki fuli keatea mai i toku Atua.

22Au ne tausi ki ana tulafono katoa;

Ne fakalogo foki au ki ana fakatonuga katoa.

23E iloa ne ia i a au e fai mea tonu,

Kae se fiafia foki ki te masei.

24Tena te mea ko maua ei ne au te taui 'lei e tusa mo taku amiotonu,

Me e iloa ne ia i a au e amio 'ma.

25Te Aliki, a koe a fakamaoni ki a latou kola e fakamaoni ki a koe;

Kae katoatoa foki tou 'lei ki a latou kola e amio'tonu.

26E amio 'ma koe ki a latou kola e amio 'ma,

Kae se fiafia foki koe ki a latou kola e amio ma'sei.

27E faka'sao ne koe a latou kola e loto malalo,

Kae fai ne koe ke malalo a latou kola e loto fakamaualuga.

28Te Aliki, e aumai ne koe te mainaga ki a au,

Kae ave keatea te pouliga mai i a au.

29E tuku mai ne koe te malosi ki a au,

E mafai ei ne au o fakatakavale oku fili,

Ke oko foki ki te pukega olotou olo.

30A te Atua tenei, e 'lei katoatoa ana faiga,

E fakatuagagina ana muna!

A ia e pela me se talita

Mo latou katoa kola e salasala atu ki tena tausiga.

31A te Aliki ko ia eiloa te Atua e tokotasi;

Ko ia foki eiloa te motou lafiga.

32Ko ia ko te Atua tela ne maua mai ei toku malosi,

E fakatoka foki ne ia te auala e sao ei au.

33 Sapa 3.19 E fakama'losi ne ia oku vae pela mo vae o te manu ko te tia;

E tausi ne ia au i luga o mauga.

34E fakaakoako ne ia au ki faiga o taua,

Tena ko mafai ei ne au o fakaaoga te kausana tafasili i te malosi.

35Te Aliki, ne puipui kae fakasao ne koe au;

Ko tau tausiga ko fai ei au mo se tino maluga,

Ka ko tou malosi e maua ei ne au te filemu.

36Ne tausi ne koe ke se puke fakapagota au ne tino,

Kae ne seki maua eiloa au ne latou.

37E atuli ne au oku fili kae ne maua atu latou;

E seki liakina eiloa ne au ke oko eiloa ki te taimi e fakatakavale ei latou ne au.

38E 'ta fatifati ne au latou ki lalo, kae ko se maua ne latou o 'tu ki luga;

Ko taka'vale ka ko tafola fua latou i lalo o oku vae.

39E tuku mai ne koe ki a au te malosi i taimi o te taua mo te manumalo foki i luga i oku fili.

40Ne fai ne koe oku fili ke tele keatea mai i a au;

E fakamasei ne au a latou kola e ita mai ki a au.

41E 'tagi latou mō se fesoasoani,

Kae seai se tino e fakasao ne ia latou;

E ka'laga latou ki te Aliki, kae se tali mai a ia.

42E tukipala ne au a latou,

Ko pau ei latou pela me ne pefu e agina keatea i te matagi.

E lakalaka ne au a latou pela mo ne pela i auala.

43E faka'sao ne koe au mai tino fakakinau,

Kae fai foki au mo pule i luga i fenua;

A tino e seki iloa ne au ko i lalo nei o taku pulega.

44E ifo mai ki a au a tino o fenua fakaatea;

i taimi e lagona ei ne latou toku leo, e faka'logo ki ei.

45Ko seai se malosi i a latou,

Ka ko ma'futa mai latou keatea mai olotou olo mo te ma'taku.

46E ola te Aliki! Tavae atu ki toku lafiga!

Takutaku atu te sili o te Atua tela ne fakasao ne ia a au.

47Ko aumai ne ia ki a au te manumalo i luga i oku fili;

Ko fakaofo foki ne ia a malo mai lalo o taku pulega,

48Kae fakasao ne ia au mai oku fili.

Te Aliki, ko koe eiloa e maua ei ne au te manumalo i oku fili,

Kae puipui foki au mai lima o tino fakasaua.

49 Loma 15.9 Tela la, ka tavae atu au ki a koe i mua o malo;

Ka usu atu foki ne au ou vikiga.

50E tuku atu ne te Atua a te manumalo ki tena tupu;

E fakaasi atu foki tena alofa tumau ki a ia tela ne filifili ne ia,

Ko Tavita mo tena fanau ki te se gata mai.