2 NOFOAIGA TUPU 13 - Tuvalu Revised Bible

Ko te Taua a Avia mo Ielopoamo(1Tupu 15.1-8)

1I te sefuluvalu o tausaga o te nofoaiga a te Tupu o Isalaelu ko Ielopoamo, kae fai Avia mo tupu o Iuta.

2Ne fai a ia mo tupu i Ielusalema i tausaga e tolu. A tena matua, ko Mikaio, te tama fafine a Ulielu, mai i te fa'kai o Kipea.

Ne taua a Avia mo Ielopoamo,

3a te kautau a Avia e tusa mo te 400,000 sotia, ka ko te kautau a Ielopoamo e tusa mo te 800,000.

4Ne fetaui te avā kautau kona i te fenua mauga o Efalaima. Ne fanake te Tupu ko Avia ki te Mauga ko Semalaima, kae kalaga atu ki a Ielopoamo mo te kau Isalaelu penei: “Fakalogo mai ki aku pati konei ka fai atu!

5E se iloa ne koutou i te Aliki, te Atua o Isalaelu ne fai tena feagaiga mo Tavita, se feagaiga e se mafai o ofa, me e fakatumau eiloa ne ia a Tavita mo tena gafa i te tulaga tupu i Isalaelu ki te se gata mai?

6A Ielopoamo, te tama tagata a Nepata, ne teke ki tena tupu ko Solomona.

7Fakamuli ifo, ne fakamaopoopo ne ia se potukau se aoga, kae olo atu o lou mai a Leopoamo, te tama tagata a Solomona, ke fai te mea e loto latou ki ei. A Leopoamo i te taimi tena, koi foliki kae e seki lava te malamalama i a ia, o teke atu a te potukau se aoga kona.

8A koutou nei e taumafai o taua mai ki te gafa o Tavita kola ne tuku ne te Aliki ki ei a te pule fakatupu. A te kautau a koutou e lasi, a pulumakau aulo kola ne faite ne Ielopoamo mo fai otou atua kona foki e o'mai mo koutou.

9Ne afuli keatea ne koutou a faitaulaga a te Aliki, ko tino kona i te gafa o Alona; ne afuli keatea foki ne koutou a te kau sa Levi. Ne fili aka ne koutou ne faitaulaga, e pela mo te filiga o faitaulaga a nisi malo, ke fai mo sui o faitaulaga tonu a te Aliki. So se tino e vau mo se pulumakau tagata, io me e fitu mamoe, e mafai faeloa o faū ke fai mo faitaulaga a atua a koutou kona.

10“A matou nei koi tavini atu eiloa ki te Aliki te motou Atua; e seki tiakina eiloa ne matou. A faitaulaga i te gafa o Alona e fai eiloa olotou tiute, ka ko te kau sa Levi e fesoasoani ki a latou.

11I taeao mo afiafi katoa, e ofo atu ne latou ki a ia a mea manogi mo taulaga manu vae fa e sunu kātoa. E ofo atu foki ne latou a te taulaga falaoa i luga i te taipola tela e 'ma i feitu fakatapuakiga kae i afiafi katoa e faka'ka ne latou a moli i luga i te tulagamoli aulo. A matou e tau'tali i fakatonuga a te Aliki, ka ko koutou ko fulitua atu ki a ia.

12A te Atua ko te motou takitaki, ka ko ana faitaulaga konei e nofo atu mo pu, ko toka o fakatagi mai ke olo atu matou o taua ki a koutou. Tino o Isalaelu, sa taumafai o taua ki te Aliki, te Atua o otou tupuga! E se mafai lele eiloa koutou o manumalo!”

13I te taimi tena, ka ko Ielopoamo ko oti ne uga ne ia a nisi kautau a ia, ke olo o alamati te kau Iutaia mai i te feitu ki tua, ka ko te toega o te lotou kautau e nofo i mua o fakasaga ki te kau a Iutaia.

14Ne kilo aka te kau Iutaia ki olotou tua, lavea ei ne latou i a latou ko nikoi ne te fili. Ne tagi atu latou ki te Aliki mō se fesoasoani, kae ne fakatagi ne faitaulaga a pu.

15Ne ka'laga te kau Iutaia, kae tele atu o taua. Ko Avia eiloa ne taki ne ia latou i te taua. Ne fakatakavale ne te Atua a Ielopoamo mo te kautau a Isalaelu

16Ne tele te kau Isalaelu mai i te kau Iuta, tena ne tuku atu ei ne te Atua ke fakatakavale a Isalaelu ne Iuta.

17Ne takavale masei eiloa te kautau a Isalaelu i te kautau a Avia, e tusa mo te afā miliona sotia lei eiloa o Isalaelu ne mate.

18Ne manumalo te kau Iuta i te kau Isalaelu, me ne fakalagolago ki te Aliki, te Atua o olotou tupuga.

19Ne afuli atu eiloa ne Avia a te kautau a Ielopoamo, kae ne puke foki ne ia a nisi o ana fa'kai: ko Peteli, Iesana mo Efelona, mo fa'kai foliki ei i tafatafa o fa'kai kona.

20Ne seki toe sae ake eiloa a Ielopoamo i aso ne tupu ei a Avia. Ne fakamalaia a ia ne te Aliki, tena ne mate ei a ia.

21A te malo o Avia ne gasolosolo aka eiloa o malosi. E tinogafulu mo te tokofa ana avaga, tinolua mo te tokolua ana tama tagata, kae e tinogafulu mo te tokoono ana tama fafine.

22A te katoaga o te tala ki a Avia, ana pati ne fai mo ana mea ne fai, e fakamau i te tusi o Te Tala Tukufakasolo o te Pelofeta ko Ito.