ESETA 4 - Tuvalu Revised Bible

Ko Manako a Moletekai ki se Fesoasoani mai i a Eseta

1I te logoga a Moletekai i te mea tena ne tupu, ne saesae ona gatu me ko oko eiloa i tena fanoanoa. Ne pei a ia ki gatu lautaga, tuku mo lefu ki tena ulu, kae sasale atu i loto i te fa'kai kae tagi pakalaga i te fanoanoa,

2ke oko atu eiloa ki te mataloa o te palesi. E seki ulu a ia ki loto me e tapu se tino e pei ki gatu lautaga e fano ki loto.

3I itumalo takitasi, kafai eiloa ko oko atu te fakasalalauga a te tupu, ka ko tino Iutaia ko oko eiloa i te tagi fanoanoa. Ne fakalikiliki latou mo tapuakiga, kae tagi, ka ko te tokoukega o latou e 'pei ki gatu lautaga kae takato i lalo i lefu.

4I te fakamatalaatuga ne tavini fafine a Eseta mo ana eunuka a te mea ne fai ne Moletekai, tena ko oko eiloa i tena fanoanoa. Ne avatu ne ia a gatu ke pei ki ei a Moletekai kae ke tapale keatea ana gatu lautaga, ka ko Moletekai seki talia ne ia.

5Ne kalaga atu a Eseta ki a Hataka, se eunuka e tokotasi o te palesi tela ne fili ne te tupu ke fai mo tavini a Eseta. Fai atu ei a ia ki ei ke fano ki a Moletekai me se a te mea e tupu, me ai a foki e tupu ei te mea tena.

6Ne fanatu Hataka ki a Moletekai i te malae o te fa'kai i mua o te palesi.

7Ne fakamatala atu ne Moletekai ki a ia a mea katoa ne tupu ki a ia, mo te aofaki o te tupe ne tauto ne Hamanu me ka ave ki loto i te potu teu koloa o te malo mafai e tamate katoa a tino Iutaia.

8Ne tuku atu ne ia ki a Hataka te pepa e tasi tela e tusi ei a te fakasalalauga tela ko oti ne fakasalalau atu i Susa, e fakatonu atu ei ke tamate katoa a tino Iutaia. Ne fai atu Moletekai ki a ia ke ave ne ia te pepa tena ki a Eseta, kae ke fakamalamalama atu foki ki a ia a te mea tenei e tupu, kae ke fakamolemole atu ki ei ke fano o fakamolemole ki te tupu ke alofa ki tino o tena fenua.

9Ne fai eiloa ne Hataka a te mea tena,

10kae ne tuku mai ne Eseta te fekau ki a ia ke fano mo ia ki a Moletekai. E penei te fekau:

11“Kafai se tagata me se fafine e fano ki te potu tafa ki loto o asi ki te tupu kae e seki fekau mai a te tupu ki ei, a te tino tena e tamate. A te mea tena se tulafono; a tino katoa, mai i tino fakatonutonu a te tupu ke oko ki tino i itumalo kesekese e iloa ne latou a te mea tena. E tasi eiloa te feitu e mafai o sao ei se tino i te tulafono tenei: kafai e fakatu aka ne te tupu a tena tokotoko aulo o fakasaga ki se tino, ko tena uiga a te tino tena ko fakasao. Kae nei, ko tusa nei mo te masina e tasi e seki ai eiloa se fekau mai te tupu ke fanatu au.”

12I te mauaga ne Moletekai a te fekau tena mai i a Eseta,

13ne avatu ne ia se muna akoako ki a Eseta penei: “Sa mafaufau eiloa pela i a koe e sili atu i nisi tino Iutaia me i a koe e nofo i te palesi o te tupu.

14Kafai e se fesoasoani koe ki tino Iutaia i te taimi nei, kae ka oko mai eiloa se fesoasoani mai te lagi ki tino Iutaia kae ka fakasao latou, ka ko koe ka mate, mo te kaiga o tou tamana ka se toe ai. Kae ko oi e iloa ne ia, e se taumate a koe ne tuku mai ke fai mo avaga a te tupu i se taimi faigata penei!”

15Ne avatu ne Eseta te tali tenei ki a Moletekai:

16“Fano o fakamaopoopo a tino Iutaia katoa i Susa; fai se fakalikilikiga mo tapuakiga kae 'talo mo oku. Sa 'kai io me inu i ao mo po e tolu. Au mo aku tavini fafine ka fai foki ne matou te mea tena. Ka oti, ko fano ei au ki te tupu e ui eiloa e se tonu mo te tulafono. Kafai e 'tau au o mate i te faiga o te mea tena, e 'lei faeloa.”

17Tena ne fano ei a Moletekai, fai ei ne ia a mea katoa kola ne fai atu ne Eseta ki a ia.