SALAMO 42 - Tuvalu Revised Bible

KO TE LUA O TUSI(Sala 42—72)Te Talo a te Tino ne Ave Fakapagota

1E pela mo te tia e manako malosi ki se vaipuna 'moko,

E pena foki toku manako malosi ki a koe, e te Atua.

2Te Atua ola, ko oko eiloa toku manako ki a koe;

Ko afea e mafai ei ne au o fanatu o tapuaki i ou mua?

3Au e tagi faeloa i te ao mo te po, ka ko oku loimata ko aku meakai eiloa kona;

i taimi katoa, e fesili mai faeloa oku fili penei:

“Tefea tou Atua?”

4E fatifati toku loto manafai e masaua ne au a aso ko 'teka,

i te taimi ne olo tasi ei matou mo te vaitino ki te fale o te Atua

Kae takitaki ne au a latou i te sasalega a latou;

Se potopotoga fiafia, e pese kae ka'laga ki vikiga o te Atua.

5Ai a e fanoanoa ei au? Ai a e puapuagatia ei au?

Ka tuku atu toku fakamoemoega ki te Atua, kae ka toe viki atu foki au ki a ia.

Toku fakaola mo toku Atua.

6-7E fatifati toku loto i te koga tenei e fakapagota ei matou,

Tela ne fakasaga ei oku mafaufauga ki a ia.

Ne fai ne ia au ke fanoanoa;

Te masei ko oko mai ki a au e pela mese lofiaga,

E pela mo te tafe ki loto i te vai o Iolitana

mai te mauga o Helemoni mo te mauga o Misa.

8Ke fakaasi ne te Aliki tena alofa tumau i te ao, Ke 'pese au ki vikiga o ia i po katoa, Kae talo ki te Atua, tela e maua ei toku ola.

9E faipati atu au kite Atua toku lafiga penei:

“Ai a ko tiakina ei ne koe au? Ai a ko puapuagatia

Faeloa ei au penei, mai te fakasaua o oku fili?”

10Au ko logofiofio i olotou muna ma'sei,

E fesili mai faeloa penei ki a au,

“Tefea tou Atua?”

11Ai a e fanoanoa ei au penei?

Ai a e puapuagatia ei au?

E fakamoemoe au ki te Atua, ka toe viki atu foki au ki a ia,

Ko toku fakaola mo toku Atua.