MIKA 2 - Tuvalu Revised Bible

Ko te Ikuga o Latou kola e Fakasaua ki Tino Ma'tiva

1Kalofa i a latou kola e takato i olotou moega kae fai fuafuaga masei! Kafai ko ao, i te taimi eiloa e maua ei ne latou se avanoa, ko te mea eiloa ko fai ne latou te mea masei tela ne mafaufau latou ki ei.

2Kafai e ma'nako latou ki ne fatoaga, e fao malo fua ne latou. Kafai e ma'nako ki ne fale, e puke fua ne latou. E seai eiloa se mea a se kaiga e sao.

3Ona ko te mea tena, ne fai mai ei te Aliki penei, “Au e mafaufau o fakamalaia koutou, kae ka se mafai ne koutou o 'sao mai i ei. Ka maua koutou ne se fakalavelave kae ka se toe sasale fakamata'mata koutou.

4Ka oko ki te taimi tena, a tino ka faipati fakatauemu e uiga ki te malaia tela ne oko atu ki a koutou, kae ka usu ne latou te pese fanoanoa tenei:

Matou ko masei valevale!

Ko oti ne puke keatea ne te Aliki te motou fenua

O ave ki tino kola ne puke fakapagota ne latou matou.”

5Tela la, kafai e oko mai te taimi e toe fakafoki ei te fenua ki tino o te Aliki, ka seai se tino i a koutou e maua sena vaega.

6A tino e fai'pati mai ki a au penei, “Sa lauga mai ki a matou. Sa faipati mai ki mea kona. E se mafai ne te Atua o fakamasiasi matou.

7I tau faka'tau, a tino Isalaelu e malaia? E a, ko galo te loto kufaki o te Aliki? E tonu e mafai ne ia o fai se mea pena? E se faipati mo te alofa a ia ki a latou kola e fai mea tonu?”

8Ne tali mai te Aliki, “Ne fai taua koutou ki oku tino pela me ne fili o koutou. Ne foki mai a tagata mai te taua mo te lotou manatu i a latou ko sao i olotou fale, kae tela la, a koutou e fakatalitali fua o kaisoa olotou mea.

9E tuli keatea ne koutou a fafine o toku fenua mai olotou fale fakapelepele, kae fao malo foki ne koutou mai olotou tamaliki taku fakamanuiaga se gata mai.

10Tu ki luga o olo; ko se toe ai se lafiga lei mō koutou i konei. Ko otou agasala konei ka fakamalaia ei te koga nei.

11“A tino nei e ma'nako ki pelofeta loi, kola e faipati sale penei, ‘Ka tafe te uaina mo mea inu malosi mō koutou.’

12“Ka ko koutou tino Isalaelu kola e toe, ka fakapotopoto ne au koutou pela me ne mamoe ko foki mai ki te lafu. E pela me se malae lausiusi e fonu i mamoe, e pena foki te otou fenua me ka toe fonu i tino.”

13Ka tala ne te Atua se auala mo latou, kae taki latou keatea mai te fenua ne fakatafea latou ki ei. Ka ulu latou ki tua mai mataloa lasi o te fa'kai kae olo saoloto. Ko te Aliki, te lotou tupu ka taki ne ia latou.