ESETA 1 - Tuvalu Revised Bible

Vasati ko Teke ki te Tupu ko Asuelu

1-2 Esela 4.6 E silia atu i te 127 itu malō, mai Initia ke oko eiloa ki Sutana, e i lalo o te pulega a te Tupu o Pelesia ko Asuelu, tela e nofo i te fa'kai o Susa, te laumua o Pelesia.

3I te tolu o tausaga o tena nofoaiga, ne fai ne ia se 'kaiga ki ana ofisa mo tino ma'luga katoa. A kautau a Pelesia mo Metai ne fakatasi katoa i kona, pela foki mo kovana mo tino ma'luga o itumalo takitasi.

4E tusa mo masina e ono ne fai sale ne ia a te fakaasiga o koloa tāua a te malo.

5E isi foki se 'kaiga lasi ne fai ne te tupu mai tua ifo, ki tagata katoa, tagata maumea mo tagata ma'tiva kola e nofo i te fa'kai o Susa, te laumua o te malō. E tusa mo te vaiaso e tasi ne fai ei a te kaiga tena, kae ne fai i fatoaga o te palesi o te tupu.

6A te koga tena e fai ei a te 'kaiga ne teu fakagaligali ki laugatu pui kena kae lanu moana, kae sai ki filo lino lanu kulakula ki luga i ligi siliva i luga i pou ne faite ki mapu. E isi ne nofoaga 'loa ne faite ki siliva mo aulo ko oti ne fakatoka ki te koga tena e fai ei a te 'kaiga. A te koga tena ne fola ki mapu lanu kena, mo fatu tāua lanu kula, lanu usi mo fatu lanu valevale.

7A tino e inu i ipu aulo, ka ko ipu e kesekese katoa; ka ko te tupu ne tuku mai eiloa ne ia a te uaina a tupu ke inu ei a tino.

8E seai se gatamaiga o meainu; e isi se fakatonuga a te tupu ne fai ki tavini o te palesi ke inu eiloa a tino ki te mea e mafai ne latou.

9I te taimi foki eiloa tena, a te avaga a te tupu, e igoa ko Vasati e fai foki tena 'kaiga ki fafine i loto i te palesi.

10I te fitu o aso o te 'kaiga a te tupu, ne inu uaina a ia kae ko oko eiloa i ana fiafia, tena ne kalaga atu ei a ia ki te tokofitu eunuka, kola ko ana tavini, ko Meumani, Pisita, Halapono, Piketa, Apakata, Setala, mo Kalakasa.

11Ne fakatonu atu a ia ki a latou ke olo o fai ki a Vasati ke fanatu, kae ke faka'mau mai eiloa tena kalauna fakatupu. A Vasati, se fafine taulekaleka, tela la, a te tupu e manako ke lavea ne ana ofisa mo tino kami a te gali o tena avaga.

12Kae i te oko atuga o tavini kona ki a Vasati mo te fakatonuga a te tupu, ne ita Vasati ma fano. Tena, ne kaitaua ei te tupu i a Vasati e ita ma fanatu.

13Se masani a te tupu o fesili sale ki ana tino fakatonutonu e uiga ki tulafono e tau i vaega mea pena, tena ne fekau atu ei a ia ki ana tino fakatonutonu ke olo atu.

14A tagata kola e masani o fesili sale a ia ki ei e uiga ki mataupu faiga'ta pena, ko Kalasena, Setala, Atamata, Talasisi, Melesa, Malesena, mo Memukana, a latou kona e tokofitu, ne ofisa o Pelesia mo Metai, kae ko toe ofisa ma'luga eiloa i te malo tena.

15Muna a te tupu ki a latou kona penei, “Ko au ko Asuelu, te tupu, ne uga ne au aku tavini ki a Vasati mo te fakatonuga ke vau, kae ne seki fakalogo a ia ki ei. Se a te mea e tau o fai ki ei e pela mo te tulafono?”

16Muna a Memukana ki te tupu mo ana ofisa penei: “A Vasati ko oti ne fai ne ia se mea e se fiafia ki ei a te tupu, pela foki mo ana ofisa mo tagata katoa i te malō tenei!

17A fafine katoa i te malo tenei, kafai ko logo i te mea tena ne fai ne Vasati, ko tena uiga ka fakaseaoga foki ne latou olotou avaga. Ka fai aka olotou muna penei, ‘A te Tupu ko Asuelu ne fakatonu atu ki tena avaga ko Vasati ke fanatu, kae ne ita Vasati ma fano.’

18Kafai ko 'logo a avaga o ofisa ma luga o Pelesia mo Metai i te mea ne fai ne Vasati, e iku e seki to te la ka ko oti ne fakamatala ne latou ki olotou avaga. Ko tena uiga, a fafine ka se toe fakaaloalo ki olotou avaga, ka ko tagata ka kaitaua foki ki olotou avaga.

19E tau o fai se fakatonuga faka te malō, ko Vasati ke se toe fanatu eiloa ki ou mua, mafai e tonu e loto tou malu ki te mea tena. Fakatonu atu ke tusi te mea tena i loto i tulafono o Pelesia mo Metai, ko te mea ke se toe fuli. Tena, kae ke toe aumai se isi fafine lei ke fai mo avaga a te tupu.

20Kafai ko fakasalalau atu tau fakatonuga tena i loto i te malo, kaati a fafine ka fakaaloalo faka'lei ki olotou avaga, faitalia me ne tagata mau'mea io me ne tagata ma'tiva.”

21Ne loto te tupu mo ana ofisa ki te manatu tena, tena ne fai ei ne te tupu te mea tena e fai mai ne Menukana.

22Ne avatu ne ia a te fekau tena ki itumalo takitasi i loto i tena malō, i te gana mo te tusitusiga e malamalama ei a itumalo kona. E penei te fekau, a tagata ko matai i olotou kaiga, ko te tonu e fai ne latou, tena eiloa.