1 Iosu 20.1-9 “Kafai ko oti ne ta fakapalele ne te Aliki te otou Atua a tino kona e o latou te fenua tena ko avatu mo koutou, kae kafai ko maua ne koutou olotou fa'kai mo olotou fale, kae ko nofo foki koutou i ei,
2e tau o vae ne koutou ki fa'kai e tolu a te fenua tela ko oti ne tuku atu ne te Aliki te o tou Atua ke fai mo koutou.
3E tau o fuafua ne koutou a te vasia o fa'kai ko vaevae ei ne koutou ki fa'kai e tolu a te fenua tela ne tuku atu ne te Aliki te otou Atua ke fai mo koutou, me kafai e isi se tino ne tatino, e mafai fua o sola ki se fa'kai o fa'kai kona.
4Kafai se tino ne tamate ne ia sua tino, kae se ko tena loto ke tamate, e mafai o sola ki se fa'kai o fa'kai kona ke sao a ia.
5Kafai ne olo se tokolua tagata o kati lakau i te vao, kae fanatu sua tino o kati te lakau ki lalo ki tena taku, ko te mata eiloa o te taku ko lele, poko i te sua tino, mate eiloa; e tau mo te tino tena e ola o tele ki se fa'kai o fa'kai kona e tolu, ke sao a ia.
6Moi ne tasi te fa'kai, e penei e tai mao eiloa, kae e fui oko foki ki ei a te tino tena, e se taumate e iku o po atu ne se kaiga o te tagata ne mate, ko tamate ei a ia, kae tela la, a ia e se 'se, me e seki fai ne ia mo tena loto. A te tagata tela ne mate, ne mate i se feitu pasala, ka ko ia e seki fai fili foki ki ei.
7Tena te mea e fakatonu atu ei au ke vae fakaatea ne fa'kai e tolu.
8“Kafai ko fakalasi ne te Aliki te otou Atua a te fenua, e pela mo ana muna ki otou tupuga, kae avatu a te fenua katoa tela ne tauto a ia ke avatu mo koutou,
9ka toe filifili aka ne koutou ne fa'kai e toe tolu. Ka avatu ne ia a te fenua tenei, manafai e fakalogo koutou ki mea katoa konei e fakatonu atu ne au i te aso nei, manafai foki e alofa koutou ki te Aliki te otou Atua kae tausi ki ana akoakoga.
10Ke fai ne koutou te mea tena, ko te mea ke mo a e mate tauanoa fua ei a tino e seai ne agasala, kae ke mo a foki koutou e agasala i te tamate ne koutou a tino pena i te fenua tenei ne avatu ne te Aliki mo koutou.
11“Kafai se tino ne tamate ne ia tena fili mo tena loto eiloa o tamate, kae tele ki se fa'kai i fa'kai kona ke sao a ia,
12e tau a ia o puke mai ne takitaki o tena fa'kai o tuku atu ki te kaiga o te tagata ne mate, ko te mea ke tamate foki a ia e taui ei tena mea ne fai.
13Ke mo a e alofa koutou ki a ia, ko te mea ke ave keatea a tino tatino pena mai Isalaelu, ke fanofano lei te olaga o koutou.
Ko Tuakoi Taumua14 Teu 27.17 “Sa siki ne koe a te tuakoi o te tino tela e tuakoi mo koe, tela ne fakamoe i aso mua eiloa, i te fenua ne aumai ne te Aliki te otou Atua mo koutou.
Ko Molimau15 Nume 35.30; Teu 17.6; Mata 18.16; Ioa 8.17; 2Koli 13.1; 1Timo 5.19; Epe 10.28 “A te molimau e tokotasi e se lava o fakase ne ia te tino; e tau o tokolua io me e tokouke atu a molimau, ko mafai ei o fakase te tino agasala.
16Kafai se tino e taumafai o fakamasei te sua tino, o ave ne ia ki te fono i se agasala se tonu,
17e tau mo te tokolua kona o olo ki te koga tapuaki, ki te Aliki, kae ka fakamasino ne faitaulaga mo famasino kola e tu i te aso tena.
18Ka sukesuke fakalei eiloa ne famasino a te mea tena; kae kafai e maua atu i te tagata tela e fakaloiloi fua mo tena mau e uiga ki tena taina Isalaelu,
19ko tena uiga ka fakasala a ia i te fakasalaga tela ne tau o ave ki te tagata tela ne moli ne ia, moi ne fai pela e tonu tena molimau. Ko te faiga tena e ave keatea ei te amioga masei tena.
20Ka logo a tino katoa i te mea ne tupu, tena ka mataku ei latou, ko se toe ai ei se tino e fai ne ia se amioga masei pena.
21Eso 21.23-25; Levi 24.19,20; Mata 5.38 I vaega amioga pena, ke mo a eiloa koutou e alofa ki tino pena; a te fakasalaga ko te ola ki te ola, te mata ki te mata, te nifo ki te nifo, te lima ki te lima, mo te vae ki te vae.
Who We AreWhat We EelieveWhat We Do
2025 by iamachristian.org,Inc All rights reserved.
