FAATAOTO 1 - Tuvalu Revised Bible

Ko te Aogā o Muna o te Poto

1 A tino valea e se saga ki te poto, kae e se fia tauloto foki.

8Taku tama, saga tonu ki muna a tou tamana mo tou matua.

9A akoakoga a laua e fakaopoopo atu ei te lei ki ou uiga, e pela mo te pulou io me ko te malele tela e fakaopoopo ne ia te gali o koe.

10Taku tama, kafai ko fakaosooso koe ne tino agasala, sa saga ki ei.

11Kafai e fai atu penei, “Vau ke olo tatou o sala se tino ke tamate! Tatou ka olo o ta a tino amiotonu kona ke fakalogotonu ei 'tou lima

12Kafai e maua atu ne tatou e ola kae fiafia, kae kafai ko 'ta ne tatou ko mate valevale ei!

13Ka olo tatou o sala vaega koloa valevale o fakafonu ei 'tou fale!

14O'mai ke kau fakatasi tatou, kae ka tufa katoa tatou i mea konei ne kaisoa ne matou.”

15Taku tama, sa tautali koe i tino pena. Fakamao keatea mai i a latou.

16E se mafai o fakatalave i se faiga o se mea masei. E toka faeloa latou o tatino.

17E seai se aoga e fakatoka ei tou tili, manafai te manu tela e taumafai koe o pei ki te tili e kilokilo mai ki a koe,

18ka ko tino pena e tao eiloa ne latou te malei mo lavelave ei latou, ko te malei tela ka mate foki eiloa i ei latou.

19A tino kaisoa kae fakasaua e isi foki eiloa ne aso e mate ei latou i olotou amioga kaisoa kona. Tena te mea ka tupu ki tino e ola i se olaga fakasaua pena.

Te Poto ko Kalaga mai

20 Faata 8.1-3 Fakalogo mai! A te poto ko kalaga i auala mo maketi,

21ko kalaga malosi i mataloa o fa'kai, pela foki i koga e maopoopo ei a tino:

22“Tino valea! E pefea te leva e manako ei koutou ke valea koutou pena? E a, ka tumau faeloa te fai o muna valea a koutou ki te poto? E a, e se mafai koutou o tauloto?

23Fakalogo mai manafai e kote ne au koutou; ka tuku atu ne au ne manatu fakatonutonu lei, kae fakaasi atu ne au toku poto ki a koutou.

24Au ne kalaga sale atu ki a koutou, o fai atu ki a koutou ke o'mai, ka ko koutou e se fia fakalogo. E se saga mai lele eiloa koutou ki a au.

25Ne fakaseaoga ne koutou oku manatu fakatonutonu katoa, kae se talia foki ne koutou ke fakatonu ne au otou uiga se tonu.

26Tela la, kafai e maua koutou ne fakalavelave kae ka kata atu au ki a koutou. Ka fakalili ne au koutou manafai ko oko atu te mea fakamataku ki a koutou,

27manafai ko oko mai pela me se kautaufa, o aumai a matagi o fakalavelave, kae ka mae kae puapuaga foki koutou i ei.

28Tena la, ka kalaga mai koutou ki te poto, kae ka se tali atu eiloa au. Ka sala mai koutou ki a au i so se koga, kae ka se maua eiloa ne koutou a au.

29Ne seki saga eiloa koutou o sala te poto, kae ne teke faeloa koutou ki te Aliki.

30E seki manako eiloa koutou ki se manatu fesoasoani mai i a au, io me saga tonu mai manafai ko fakatonu atu ne au koutou.

31Tela la, ka maua eiloa ne koutou te ikuga o otou faiga, ka salamo koutou i amioga a koutou ne fai.

32A tino e foliki te lotou iloa ka mate me ne 'teke ne latou te poto. A tino valea e ta fakapalelegina me e se saga tonu ki mea tonu.

33Kae so se tino e saga tonu mai ki a au ka maua ne ia te saogalemu. Ka tokagamalie tena olaga, kae seai se mea e mataku ki ei.”