1 TIMOTEO 5 - Tuvalu Revised Bible

Ko Tiute o Tino Fakatuanaki

1Sa 'teke ki se toeaina, kae fakatagi atu ki a ia e pela eiloa a ia mo sou tamana. Fai faka'lei ki tamatane e pela eiloa mo ne ou taina,

2kae ki loma'tua e pela mo ne ou matua, ka ko tamafine e pela mo ne ou tuagane, i te loto 'ma katoatoa.

3Ava ki fafine kola ko 'mate tonu olotou avaga, kola e seai ne tino e tausi ki a latou.

4Kae kafai se fafine ko mate tena avaga e isi ne ana tamaliki io me ne mokopuna, e 'tau mo latou o muamua o iloa o fai olotou tiute faka te lotu ki olotou kaiga, kae i te faiga tenei ka toe taui atu ne latou ki olotou matua mo tupuna, me se mea 'lei tena i mua o te Atua.

5A te fafine tela ko mate tena avaga, kae seai foki se tino e tausi ki a ia, ko fakamoemoe tasi eiloa ki te Atua, ka ko 'soko faeloa te 'talo ki a ia i te ao mo te po mō se fesoasoani.

6Ka ko te fafine ko mate tena avaga kae tuku atu tona foitino ki fiafiaga o te foitino, e ui eiloa i a ia e ola, ka ko leva eiloa ia ne mate.

7Tuku atu ki a latou te fakatonuga tenei, ko te mea ke seai se tino e fakamasei ne ia latou.

8Kae kafai e isi se tino e se fia tausi ki sona kaiga, kae maise eiloa tino o tona kaiga tonu, ko tona uiga ko 'teke ne ia te fakatuanaki, kae sili atu tona masei i lo te tino se kelisiano.

9Sa toe fakaopoopo atu se igoa o se fafine ko mate tena avaga ki te fakasologa o igoa o fafine ko 'mate olotou avaga, seiloga ko silia atu i te ono sefulu ona tausaga. Ko te sua feitu, e 'tau eiloa a ia se fafine ko oti ne avaga fakatasi;

10kae 'tau foki o 'lei a tala o ana galuega 'lei ne fai: se fafine ne tausi faka'lei ki ana tamaliki, e fakaafe ne ia fakaalofa ki tona fale, e mulumulu ne ia vae o tino o te Atua, e fesoasoani foki ki tino e maua ne fakalavelave faigata, kae fai foki ne ia a galuega 'lei katoa.

11Ke se faitau a fafine ko 'mate olotou avaga ka koi tamafine, i te fakasologa o igoa o fafine ko 'mate olotou avaga; me e isi ne fafine ko oti ne tauto ki te Ekalesia i a latou ko se toe a'vaga, kae fakamuli ifo ko fia a'vaga latou ona ko manakoga o te foitino, ko te mea eiloa ko 'fuli keatea latou mai i a Keliso.

12Tela la, ko agasala latou i te mea ko ofa ne latou te lotou feagaiga me se toe avaga.

13E se gata i kona, ko fakaakoako foki latou ke fai mo tino paie, kae oloolo sale mai te sua fale ki te isi fale. E se gata fua i te paie, kae gutu fai'tala foki, ne tino e fakalavelave ki galuega a nisi tino, e fai'pati fua ki mea e se 'tau o faipati latou ki ei.

14Tela la, au e loto ko fafine ko 'mate olotou avaga ka koi tamafine ke a'vaga, ke fanau, kae ke atafai foki ki olotou kaiga ke 'lei, ko te mea ke seai se avanoa e maua ne o'tou fili o fakamasei tatou.

15E isi ne fafine ko 'mate olotou avaga, ko leva ne 'fuli keatea o tau'tali i a Satani.

16Kafai e isi se fafine kelisiano e 'nofo nei i a ia mo tona kaiga a fafine ko 'mate olotou avaga, e 'tau mo ia o atafai ki a latou, kae ke se tuku atu ne ia ki te Ekalesia te amoga tenei, ko te mea ke saga eiloa te Ekalesia ki fafine ko 'mate olotou avaga kola e 'nofo eiloa i a latou.

17A toeaina kola ne fai ne latou a galuega 'lei e pela mo ne takitaki, ko 'tau latou o 'togi fakalua, kae sili atu eiloa latou kola e ga'lue malosi i te talai atu kae akoako atu.

18Teu 25.4; Mata 10.10; Luka 10.7Me muna mai a te Tusi, “Tuku eiloa te pulumakau ke kai manafai e lakalaka ne ia a fuaga saito.” Ne toe fai mai te Tusi, “A te tino galue, e 'tau o maua tona 'togi.”

19Teu 17.6; 19.15Sa fakalogo ki se mau e uiga mō se toeaina, seiloga ke 'moli mai ne se tokolua io me se tokotolu.

20Polopoloki atu a tino agasala i mua o tino, ko te mea ke ma'taku a nisi taugasoa o latou.

21Ko fakatonu malosi atu ne au ki a koe i mua o te Atua mo Keliso Iesu mo agelu tapu, ke fakalogo koe ki fakatonuga konei e aunoa mo te fakailoga tino io me ko te manatu fakapito i so se mea e fai ne koe.

22Mafaufau faka'lei ki te faūga ne koe se tino ki te galuega a te Aliki. Sa kau fakatasi ki agasala a nisi tino. Tausi ke 'ma koe.

23Sa inu fua ki vai, kae inu foki ki ne mo uaina ke logo 'lei tou tinae, i te mea i a koe e masaki sale.

24E matea gofie agasala a nisi tino, ka ko muamua atu i a latou olotou agasala ki te fakamasinoga; ka ko agasala a nisi tino ka matea fakamuli ifo.

25E pena foki eiloa a galuega 'lei, e matea gofie fua; e pela foki mo galuega kola e se matea 'lei, e se mafai eiloa o 'galo.