ESETA 5 - Tuvalu Revised Bible

Ko Kami ne Eseta a te Tupu mo Hamanu ki tena 'Kaiga

1I te tolu o aso o te fakalikilikiga a Eseta e tusa mo te mea ne tupu, ne pei ei a ia ki ana gatu fakatupu, fanatu ei a ia ki te potu tafa ki loto o te palesi, i mua o te potu e tu ei a te nofogaaliki. A te tupu e nofo mai i kona, e sagasaga mai i tena nofogaaliki, kae fakasaga ki te mataloa.

2I te laveaga ne te tupu a Eseta e tu mai i tua, ne puke aka a ia o sisi aka tena tokotoko aulo o fakasaga atu ki ei, me i a ia e alofa i a Eseta, kae ke mo a foki e tamate. Ne fanatu Eseta, fakapatele atu ei ki te mata o te tokotoko aulo tena.

3Ne fesili atu te tupu penei, “Eseta, e isi sau fekau? Fai mai te mea e manako koe ki ei me e tuku atu eiloa ne au, faitalia manafai ko te afā o toku malo.”

4Ne tali atu a Eseta, “Tou Malu, au e manako ke fakatasi mai koulua mo Hamanu i te afiafi nei ki te kaiga ne fakatoka ne au mō koulua.”

5Tena, ne fai ei a te fakatonuga a te tupu ki a Hamanu ke fakavave atu ke olo laua ki te 'kamiga a Eseta. Tena ne olo eiloa a te tupu mo Hamanu ki te kaiga a Eseta.

6I te taimi ne inu uaina ei latou, ne fesili atu ei a te tupu ki a Eseta penei, ‘Taku mai te mea e manako koe ki ei, me e avatu eiloa ne au. E talia eiloa ne au a te mea e manako koe ki ei, faitalia foki eiloa manafai ko te afā o toku malo e manako mai koe ki ei.

7Ne tali atu a Eseta,

8“Kafai e talia eiloa ne Tou Malu a te mea e manako au ki ei, e toe kami ne au koulua mo Hamanu ki te sua 'kaiga a aku e fai taeao ki a koulua. I te taimi tena, ko fakaasi atu ei ne au a te mea e manako au ki ei.”

Ko te Togafiti a Hamanu ke Tamate Moletekai

9I te fanatuga a Hamanu mai te 'kaiga, ko oko eiloa i tena fiafia. Kae i te laveaga ne ia a Moletekai i te mataloa o te palesi, ka ko Moletekai e seki tu o fakaaloalo atu ki a ia i tena fakasili atuga i ona tafa, tena ko oko eiloa i tena kaitaua ki a Moletekai.

10Kae ne taumafai eiloa a ia o taofi tena kaitaua, fano eiloa a ia ki tena fale. Ne kami atu ne ia a ona takaga ki tena fale kae fai atu foki ki tena avaga ko Selesa ke fakatasi atu ki a latou.

11Ne fai ana muna fakamatamata ki a latou i a ia e maumea, kae tokouke ana tama tagata, ka ko ia foki ne siki aka ne te tupu ki se tulaga maluga, ka ko ia ko te toe ofisa taua kae maluga i ofisa katoa a te tupu.

12Ne fano eiloa te faipatiga a Hamanu, muna a ia penei,“Kae tafasili atu foki la, a te avaga a te tupu ko Eseta ne fai tena kaiga ki a maua tokolua eiloa mo te tupu; a maua e toe kami foki ki te 'kaiga taeao a ia.

13Kae kafai eiloa e lavea ne au a te tagata Iutaia tela ko Moletekai e sagasaga mai i te mataloa o te palesi, galo eiloa toku fiafia.”

14Tena ne fai ei te taofi o tena avaga mo ona taugasoa katoa penei, “Ai a e se fai ei ne koe ke faite se koga sisi tino e luasefulu lua mita te maluga? Taeao, i te tafataeao ko fai ei koe ki te tupu ke ave Moletekai o sisi i luga i te koga sisi tena, ko mafai ei koe o fano mo te fiafia ki te 'kaiga taeao.” Ne fiafia Hamanu ki te manatu tena, tena ne fakatonu atu ei a ia ke faite a te mea sisi tino.