IOPU 17 - Tuvalu Revised Bible

1A te gataga o toku ola ko pili mai. Ko tai se maua aka eiloa ne au o manava;

Ko seai eiloa se mea e toe mo oku, na ko te tanuga eiloa.

2Au e onoono fakalei atu eiloa ki te 'kona o te fakalili mai o tino katoa.

3Te Atua, au nei e faipati tonu eiloa.

Talia mai aku pati.

E seai eiloa se tino e lago mai ki aku muna kona ne fai.

4Ko oti ne pono ne koe olotou mafaufau mai i te mea tau;

Sa fakamanumalogina latou i a au.

5E isi te faigāmuna taumua e fakamatala mai ei te tagata ne fakatogafiti ne ia tena taugasoa o puke ana tupe,

Kae ne iku ki te ola puapuaga o ana tamaliki.

6Kae nei, ko fakaaoga ne tino a te faigāmuna tena o teke mai ki a au;

E o'mai latou o puapuaki mai ki oku mata.

7Au ko tai kivi faka eiloa i toku fanoanoa;

A oku lima mo oku vae ko pa'ka faka eiloa pela me ne ata.

8A tino kola e fai pela i a latou e amiotonu e poi,

Kae fakamalaia ne latou a au me e fai pela i a au e se talitonu ki te Atua.

9A tino kola e fai pela i a latou e fakaaloalogina,

E ga'solo ake eiloa o mafaufau pela i a latou e tonu katoatoa.

10Kae kafai e o'mai katoa latou o tu i oku mua,

Kaati e seai eiloa se tino o latou e maua ne au ke tai poto mai.

11A oku aso ko palele atu; aku fuafuaga ko se taunu;

A toku fakamoemoega ko seai.

12Ka ko oku taugasoa e fai mai i te po ko pela fua me se ao; olotou muna i te mainaga ko pili mai,

Kae e iloa ne au i a au koi nofo eiloa i te pouliga.

13A toku fakamoemoega eiloa e tasi, ko te lalolagi o tino mate,

Te koga ka takato ifo ei au o moe i te pouliga.

14Ka taku ne au te tanuga ko toku tamana, ka ko ilo kola e o'mai o kai toku foitino,

Ka taku ne au ko toku matua mo oku tuagaene.

15Tefea te koga e isi ei se fakamoemoega mo oku?

Ko oi te tino e lavea ne ia se fakamoemoega lei mo oku?

16E fakamoemoe ke se olo tasi maua manafai e fanaifo au ki te lalolagi o tino mate.