IONA 2 - Tuvalu Revised Bible

Ko te Talo a Iona

1Ne talo a Iona ki te Aliki tena Atua, mai i loto i te tinae o te ika:

2“Te Aliki, i toku puapuaga ne kalaga atu ei au ki a koe,

Kae ne tali mai koe ki a au.

Mai lalo i te lalolagi o tino mate

Ne tagi au ki se fesoasoani, kae ne lagona ne koe.

3Ne pei au ne koe ki koga poko o te moana,

Ki te takele papa o te tai;

Ne nikoi ei au ne te tai

Kae fati mai ou galu malosi i luga i au.

4Ne manatu au pela i a au ko tiakina ne koe

Ka se toe lavea ne au tou Faletapu malu.

5Ne galo au ki lalo i te tai, tela ne itia ei toku manava;

Ne galo katoatoa au ki lalo i te tai,

Ne kofu toku ulu ne limu o te tai.

6Ne oko ifo eiloa au ki fakavae o mauga

I te fenua tela e pono faeloa ona mataloa.

Ka ko koe te Aliki toku Atua,

Ne fakafoki mai ne koe au mai koga poko mo te ola.

7I te taimi ne lagona ei ne au i toku mate ka oko mai,

Ne talo atu ei au ki a koe e te Aliki,

Ka ne lagona ne koe au i tou Faletapu.

8Latou kola e tapuaki ki tupua se aoga

Ko se fakamaoni ki a koe.

9Ka ko au e usu pese o tavae ki a koe;

Ka ofo atu ne au taulaga ki a koe

Kae fakamaoni foki o fai a mea ne tauto atu ei au.

Te fakaolataga e vau mai te Aliki!”

10Tela fakatonu atu ei te Aliki ki te ika ke luaki atu a Iona ki te matafaga, kae ne fai eiloa pena.