TEUTELONOME 33 - Tuvalu Revised Bible

Ko Fakamanuia ne Mose a Matakaiga o Isalaelu

1Konei a fakamanuiaga kola ne tuku atu ne Mose, te tagata o te Atua, ki tino Isalaelu koi tuai ei a ia o mate.

2A te Aliki ne vau mai i te Mauga o Sinai;

Ne fanake a ia e pela me se la i luga i Etoma

Kae maina mai ki tena fenua mai i te Mauga o Palana.

E sefulu afe agelu e o'mai mo ia,

Kae e isi se afi e ka i tena lima fakaatamai.

3A te Aliki e alofa ki tena fenua kae puipui ne Ia a tino o tena fenua.

Tena la, ke ifo atu tatou ki a ia,

Kae fakalogo ki ana fakatonuga.

4A tatou e fakalogo ki Tulafono kola ne aumai ne Mose ki a tatou,

Ko te koloa taua tena a te tou malo.

5A te Aliki ne fai mo tupu o tena fenua ko Isalaelu,

I te taimi ne maopoopo a matakaiga mo takitaki o te fenua.

6Konei a muna a Mose e uiga mo te matakaiga o Leupena:

“A Leupena, Kae ka se galo atu eiloa.”

7Konei ana muna e uiga ki te matakaiga o Iuta:

“Te Aliki, fakalogo mai ki te olotou tagi mo se fesoasoani;

Toe fai aka ke fealofani latou mo nisi matakaiga.

Te Aliki, taua mo latou,

Kae fesoasoani atu ki a latou i taimi e taua ei latou mo olotou fili.”

8

E auala i au tavini fakamaoni konei ko te kau sa Levi;

Ne tofotofo ne koe a latou i Masa,

Kae fakatalitonu ne koe te lotou amiotonu i vai o Melipa.

9E sili atu te lotou fakamaoni ki a koe

I lo te lotou fakamaoni ki olotou matua, taina mo tamaliki.

Ne tausi ne latou au fakatonuga

Kae fakamaoni ki tau feagaiga.

10Ka akoako ne latou tau fanau ke fakalogo ki au Tulafono;

Ka ofo olotou taulaga i luga i tou fata-fai-taulaga.

11Te Aliki, fesoasoani atu ki te lotou matakaiga ke gasolo ake o malosi;

Fiafia ki mea e fai ne latou.

Tukipala atu olotou fili;

Kae sa toe fakatugina latou ki luga.”

12Konei ana muna e uiga ki te matakaiga o Peniamina:

“Tenei te matakaiga e alofa ki ei te Aliki, kae e puipui foki ne ia;

E puipui ne ia latou i aso katoa,

Kae e nofo foki i a latou.”

13Konei ana muna e uiga ki te matakaiga o Iosefa:

“A te Aliki ke fakamanuia ne ia te lotou fenua ki vaiua

Mo vai mai i lalo o te laukele.

14Ke fakamanuia te lotou fenua ki fuagā lakau ko sulu gali faka eiloa,

Ke maumea te lotou fenua i fuagā lakau tafasili i te gali i tau takitasi o te tausaga.

15A mauga taumua o te lotou fenua ke fonu i fuaga lakau gali;

16Ke fakafonu aka te lotou fenua ki mea lei katoa,

E pela mo te fakamanuiaga a te Aliki,

Tela ne faipati mai i loto i te vao ne ka.

A fakamanuiaga kona ke maua ne te matakaiga o Iosefa, me i a ia e takitaki i ana taina.

17A Iosefa e malosi pela me se pulumakau tagata, pela mo sau o te pulumakau vao.

A ona sau ko afe o Manase mo sefulu afe o Efalaima.

E fakaaoga ne ia ana sau kona o sua a malo,

Kae afuli atu ne ia ki te gataga o te lalolagi.”

18Konei ana muna e uiga ki matakaiga o Sepulona mo Isakala:

“Ke maumea Sepulona i ana faigā mea togi i te tai,

Ka ko Isakala ke lasi tena koloa i tena fa'kai.

19Ne kami mai ne laua a tino fakaatea ki lotou mauga.

Kae ofo atu a taulaga tau i kona.

E maua te lotou maumea mai i te tai, pela foki mai i te one i te matafaga.”

20Konei ana muna e uiga ki te matakaiga o Kato:

“Viki atu ki te Atua tela ne fakalasi ne ia te lotou fenua

A Kato e fakatalitali pela me se leona,

Ke sae keatea ne ia se lima io me se ulu.

21Ne puke ne latou a mea tafasili i te lei o te laukele ma latou;

Ko te vaega e tau ki se takitaki, ne avatu ma latou.

Ne fakalogo latou ki fakatonuga mo tulafono a te Atua,

I te taimi e maopoopo ei a takitaki o Isalaelu.”

22Konei ana muna e uiga ki te matakaiga o Tanu:

“A Tanu se tama leona:

Ne puna mai a ia mai i Pasana.”

23Konei ana muna e uiga ki te matakaiga o Nafatali:

“A Nafatali e fakamanuia ne te Aliki ke maumea;

A te lotou laukele e fanatu eiloa mai i te Vai o Kalilaia ke oko eiloa ki saute.”

24Konei ana muna e uiga ki te matakaiga o Asela:

“E silia atu te fakamanuiaga o Asela i lo nisi matakaiga:

Ke fai a ia mo fagasele i ana taina,

Kae ke uke a olive e ola i tena laukele.

25A ona fa'kai ke pui ki mataloa fiti,

Kae ke ola faeloa a ia i te saogalemu.”

26Isalaelu, e seai se atua e pau mo te otou Atua,

E vau a ia mai i te lagi, i loto i kaumana,

I tena mana katoatoa, o fesoasoani ki a koutou.

27A te Atua ko te otou pui mai mua eiloa;

A ona lima e tokai ki ei koutou,

Ne afuli keatea ne ia otou fili i te taimi ne o'mai ei koutou,

Kae ne fai atu ke ta fakapalele ne koutou.

28Tena la, a te fanauga a Iakopo ko ola i se olaga filemu,

Kae ola lei i te fenua e fonu i saito mo uaina,

Te fenua e fakasusu ne te sau mai i te lagi.

29Isalaelu, ko oko eiloa i tou fiafia!

E seai se fenua e pau mo koe,

A koe se malo ne fakasao ne te Aliki.

A te Aliki ko tau talita mo tau pelu,

E puipui ne ia koe, kae avatu te manumalo;

A ou fili ka o'mai o fakamolemole mai ke alofa atu koe ki a latou,

Kae ka lakalaka fua ne koe ki lalo.