IOPU 5 - Tuvalu Revised Bible

1Iopu, kalaga ki se tino. Onoono ake manafai e isi se tino e tali mai.

E isi se agelu e mafai o kalaga koe ki ei?

2A tou nofo pena mo tou loto mafatia kae se fiafia,

Se mea valea fua,

E se tau koe o nofo pena.

3E isi ne tino valea ne lavea ne au e ola lei,

Kae ne kalaga au ke fakamalaia olotou fale.

4A olotou tama tagata e se mafai o maua ne latou se filemu;

E seai se tino e puipui ne ia latou i te taimi o te fono fakamasino.

5A tino fiakai ka kai ne latou a lakau kaina a te tino valea — ke oko foki eiloa ki saito kola e ola fakatasi

Mo lakau talatala, ka ko tino fiainu ka lotomasei ki tena maumea.

6A te masei e se tupu aka i te laukele,

A fakalavelave e se tupu aka foki i te laukele.

7Ikai! A te tagata e aumai eiloa ne ia a te fakalavelave ki a ia,

E pela mo te kalokaloafi e eva aka mai i te afi.

8Au moi ko koe, e penei ka saga atu au ki te Atua o fakaasi atu ki a ia a te mea e mafa i toku loto.

9E se mafai tatou o malamalama i ana mea e fai,

E seai foki se gataga o ana mea fakaofoofogia e fai sale.

10E faka'to ne ia te vaiua ki te laukele,

Kae fakasusu ne ia a fatoaga.

11E tonu, ko te Atua e avake ne ia a te tino loto maulalo,

Kae fakafiafia ne ia a tino e tagi fanoanoa.

12-13 1Koli 3.19 E faka'se ne ia a fuafuaga a tino faitogafiti,

Kae fai ne ia a tino poto ke lave i olotou malei ne fai,

Ko te mea ke seai eiloa se mea e fai ne latou ke taunu;

14Ke oko foki eiloa ki te tutonu, ko pela foki me se pouliga ki a latou.

15Ka ko te Atua e fakasao ne ia a tino mativa mai i te mate;

E fakasao ne ia a tino mativa mai i te fakapuapuagagina ne tino.

16E aumai ne ia se fakamoemoega lei ki tino mativa kae e fakaseaoga ne ia a tino masei.

17 Faata 3.11,12 Amutia te tino tela e fakatonu ne te Atua!

Sa ita ki ei manafai e polopoloki ne ia koe.

18 Hose 6.1 E fusi ne te Atua a pakiaga ne fai ne ia;

E fakapakia ne ia koe ki ona lima,

Ko ona lima foki e faka'lei ne ia a koe.

19E fakasao faeloa ne ia a koe i taimi katoa;

20Kafai e oko mai te oge, ko ia e tausi ne ia koe ke ola,

Kae e puipui foki ne ia koe mai i te mate,

I taimi o taua.

21Ka fakasao koe ne te Atua mai i tino fakaloiloi,

Ka fakasao ne ia koe manafai ko oko mai te puapuaga.

22A koe ka kata ki te fakasaua mo te fiakai,

Kae ka se mataku koe i manu fekai.

23A fatoaga kola ka fakamalu ne koe, ka seai ne papa i ei;

A manu fekai ka se mafai o taua atu ki a koe.

24Tena la, ka nofo koe i tou faleie mo te filemu;

Kafai e onoono koe ki au mamoe,

Ka lavea ne koe me e sao lei faeloa.

25Ka tokouke au tamaliki e pela mo te uke o lau o mouku i se laukele moukua.

26A koe ka ola ke oko ki tou toeaina,

E pela eiloa mo te saito tela e 'sulu lei i te taimi o te taukai.

27Iopu, ne iloa ne matou a mea kona ona ko te leva o te motou taulotoga i ei.

Se mea tonu, tela la, ke talia eiloa ne koe.