ESEKIELU 27 - Tuvalu Revised Bible

Ko te Pese o te Mate mo Tulo

1Muna a te Aliki ki a au,

2“Te tagata ola, usu mai se pese o te mate mo Tulo,

3te fa'kai tena e tu i tafa o te tai kae fai mea togi mo tino katoa kola e nofo pili ki te tai. Fai atu ki ei a muna a te Aliki Sili konei:

Tulo, a koe e fakamatamata i tou gali.

4A tou koga nofo ko te tai.

A tino ne faite ne latou a koe,

Ne faite ne latou ke pela me se vakamutu gali;

5Ne fakaaoga ne latou a lakau ko

Mati mai i te Mauga o Helemoni mo fai a laupapa,

Ka ko te alasi mai i Lepanona mo fai tou tila.

6Ne aumai ne latou a laupapa o lakau

Ko oka mai i Pasana mo fai a foe;

Ne faite ne latou a tou fola ki

Laupapa o lakau ko pelosi mai i Kupelu.

Kae faite a koga i loto ki nifo o elefane.

7A ou la ne faite ki lino,

Ne lino ne sui fakagaligali mai i Aikupito,

Kola e iloa gofie manafai e lavea mao atu.

A ou onigi ne faite ki laugatu tafasili i te lei,

Ne laugatu lanu kulakula mai i te fenua o Kupelu.

8A ou tino ālo ne tagata mai i fa'kai o Saitonu mo Avata.

Ko ou tino poto ko kauvaka.

9A kamuta o te vaka

Ne tagata ne akoako fakalei mai i Pipilosi.

A kauvaka mai i vaka katoa kola e folau i te tai

E togi olotou mea i ou fale koloa.

10“A sotia mai i Pelesia, Litia, mo Lipia e kau i tau kautau. E fakatautau olotou talita mo pulou tau i fale o au sotia. Ko latou kona ne fai ne latou a koe ke takutakua.

11Ko sotia mai i Avata e leoleo ne latou ou pui, ka ko tagata mai i Kamata e leoleo ne latou ou taoa. E fakatautau olotou talita i ou pui. Ko latou ne fai ne latou a koe ke gali.

12“E fai mea togi foki koe i Sepania, e aumai ne koe a siliva, fiti, apa mo polo 'mafa mai i ei, kae togi ne koe ki au koloa e uke.

13E fai mea togi foki koe i Eleni, Tupalu, mo Mesepa, kae avatu ne koe au koloa taua o togi mai ki ei ne pologa mo mea ne faite ki palasi.

14E togi atu ne koe au koloa taua ke maua mai i ei a solofanua galue, solofanua tau, mo miula mai i Peta Tokalama.

15E fai mea togi foki koe mo tino Lotesi; a tino i fenua pili ki te tai e avatu ne latou ki a koe a nifo o elefane mo laupapa malosi kae togi ne koe ki au koloa e uke.

16A tino Sulia e togi ne latou au vaega mea togi, mo mea ne faite i tou fenua. E avatu ne latou a fatu taua ko emela, gatu lanu kulakula, laugatu ne sui fakagaligali, laugatu lino gali, kamu, mo lupi, kae e togi ne koe ki mea ne faite i tou fenua.

17A Iuta mo Isalaelu e togi ne latou au koloa ki saito, hani, sinu olive, mo mea fakamanogi.

18-19A tino Tamaseko e togi mai ne latou a koloa mai i tou fenua ki uaina mai i Helepone mo vulu mai i Sahala. E avatu ne latou a fiti malosi mo mea fakamanogi, ke sui ki au koloa e uke.

20A tino o Titana e togi mai ne latou a mea mai i a koe ki laugatu o nofoga.

21A tino Alapi mo takitaki o te fenua o Ketala e togi mai ne latou au koloa ki tama mamoe, mamoe, mo kouti.

22A tino fai mea togi o Seepa mo Lama e togi ne latou au mea togi ki fatu taua, aulo, mo mea fakamanogi gali.

23A fa'kai o Halana, Kane, mo Etena, a tino fai mea togi o Seepa, a fa'kai o Asula mo Kilimata — a latou katoa kona e fai mea togi mo koe.

24E togi mai ne latou ki a koe a laugatu gali, laugatu lanu kulakula, mo mea ne sui fakagaligali, ko kapeti o fale e gali a lanu, mo uka mo lopu ne faite fakalei.

25Faka 18.11-19 A mea togi a koe e ave i fua vaka kako.

A koe e pela me se vaka i te tai

E fonu i kako mafa.

26I te taimi ko aumai ei koe ne ou tagata alo ki te tai,

Kae agi mai te matagi mai i te saegala

O fakamasei koe ka ko koe ko mao mai i te fenua.

27A mea togi katoa a koe,

A kauvaka katoa a koe,

A kamuta o tou vaka mo au tino fai mea togi,

A sotia katoa i luga i te vaka —

A latou katoa kona ne galo i te tai

I te taimi ne masei ei tou vaka.

28A te pakalaga o kauvaka ko malemu

E tuafoki mai eiloa i te tafatai.

29“A vaka katoa ko seai ne tino i ei,

A kauvaka katoa ko oti ne olo ki uta.

30Ko oko eiloa i te tagi fanoanoa ona ko koe

Kae pei a pefu i olotou ulu, kae takafilifili i lalo i te lefu.

31E vele olotou ulu ona ko koe,

Kae pei ki gatu lautaga.

A olotou loto ko oko eiloa i te mae i te taimi e tagi ei latou.

32E usu ne latou te pese o te mate mo koe:

‘Ko oi e mafai o fakatusa ki a Tulo,

Tulo tenei ko filemu i te vasa?

33Kafai ko ave au mea togi ki nisi fenua,

E fakamalie ne koe a mea e manako mai ki ei a malo katoa.

A tupu ko maumea

Ona ko au mea togi.

34A koe ko maofa i te vasa;

Ko goto ifo koe ki koga poko o te moana.

Au koloa, mo latou katoa kola ne galue mo koe

Ko galo fakatasi mo koe i te moana.’

35“A tino katoa kola e nofo pili ki te tai ko poi i te ikuga ko oko ki a koe. Ke oko foki eiloa ki olotou tupu ko oko eiloa i te mataku, a te mataku ko lavea atu eiloa i olotou mata.

36A koe ko galo atu, ko galo atu eiloa ki te se gata mai, ka ko tino fai mea togi i te lalolagi katoa ko mataku, ko mataku i a latou ma iku foki ki te ikuga tena ne oko ki a koe.”