FAILAUGA 2 - Tuvalu Revised Bible

1Ne mafaufau au ke saga malosi au o fakafiafia a au, kae ke sukesuke ne au me se a te fiafia. Kae ne iloa aka ne au me e se aoga foki te mea tena.

2Ne iloa aka ne au i te kata se mea valea fua, ka ko te fiafia e seai se mea 'lei e maua ne koe mai i ei.

3Mai i toku loto o sala a te poto, ne mafaufau aka au o kamata taku inu uaina kae fakafiafia toku olaga. Au ne manatu pela me kaati tenei te olaga sili e tau o ola i ei a tino o te lalolagi tenei.

4 1Tupu 10.23-27; 2NTupu 9.22-27 E uke a mea ne faite ne au. Ne faite ne au oku fale kae toki mo togavine.

5Ne toki ne au a fatoaga mo fatoaga e ola i ei a vaega fuaga lakau valevale.

6Ne keli ne au a vai mo fakasusu aku fatoaga kona.

71Tupu 4.23E uke aku pologa ne togi, kae e uke foki a pologa ne fanau eiloa i loto i toku fale. E uke atu aku manu fagai i tino katoa ne nofo i Ielusalema.

81Tupu 10.10,14-22 E uke aku siliva mo aulo ne maua mai potu teu koloa o malo kola e i lalo o taku pulega. Au e fakafiafia ne tagata mo fafine e usu pese o fakafiafia a au, ka ko aku avaga e se faka'tau foki eiloa i te tokouke.

9 1NTupu 29.25 E tonu, e tafasili atu toku takutakua i tino katoa ne nofo i Ielusalema, ka ko au e seki fakase eiloa ne toku poto.

10So se mea e manako au ki ei e maua eiloa ne au. So se mea fakafiafia e manako au ki ei e sala eiloa ne au ke maua. Ko oko eiloa i toku fakamatamata i fua o aku galuega, a mea katoa kona ko te taui o toku fi'ta.

11Tena la, ne mafaufau aka au ki aku mea ne fai, mo toku malosi ne fakamaumau ki te faiga o aku galuega kona, kae iloa aka ne au me e seai eiloa se uiga o aku mea kona ne fai. E pela eiloa me se tino e taumafai o afuli te matagi — e seai eiloa se aoga.

12A te tonuga eiloa, a te tupu e mafai fua ne ia o fai a mea kola ne fai foki ne tupu i ona mua.

Tena la, ne kamata au o mafaufau me se a te uiga o te poto io me ko te valea.

13Tenei ko iloa nei ne au, “A te poto e 'lei atu i te valea, e pela mo te mainaga e 'lei atu i te pouliga.

14A tino poto e iloa ne latou te koga e olo latou ki ei, ka ko tino va'lea e seiloa ne latou.” Kae e iloa foki ne au me i tino poto mo tino va'lea e iku katoa ki te koga e tasi.

15Ne mafaufau aka au penei, “A te ikuga e oko ki tino va'lea ko te ikuga foki tena e oko mai ki a au. Tela la, se a te mea 'lei ne maua ne au i toku poto?” Ne tali atu foki eiloa au penei, “E seai, seai eiloa.”

16E seai se tino e masaua ne ia a tino poto, e seai foki ne tino e masaua ne latou a tino va'lea. I aso fakamuli, e seai se tino e toe manatua ne ia tatou. E tau eiloa tatou katoa, tino poto mo tino valea o na mate atu katoa.

17Tela la, a te olaga tenei ko seai se uiga ki a au, me i mea katoa e aumai ne ia ki au ko te puapuaga faeloa. A mea katoa ne fai ne au e seai katoa ne aoga; au pela me se tino ne fano o afuli a te matagi.

18A mea katoa ne galue au ki ei kae ne maua ne au e seai katoa ne aoga, me e iloa ne au me ka tuku katoa ne au ki te tino e sui ne ia a au,

19kae e se iloa atu me se tino poto io me se tino valea — ko oi e ana iloagina? Ka puke katoa ma ia a mea katoa ne fita au ki ei, mea katoa ne maua ne au i te lalolagi nei i toku poto. E seai se aoga o mea katoa.

20Tela la, ne fanoanoa au i au ne to galue malosi.

21Ne faite ne koe se mea ki tou poto mo tou atamai katoa, kae i te ikuga ka tuku ne koe ki se tino e seki ai eiloa sena tauta ne maumau ki te faiga o te mea tena. Tela la, ko oko eiloa i te se aoga kae se tonu!

22Ne fita tou foitino mo tou mafaufau i au galuega i te olaga nei, kae se a la te mea e maua ne koe mai ei?

23Iopu 5.7; 14.1 A mea e fai ne tatou i tou olaga katoa e fakafi'ta fua ei o'tou mafaufau kae faka'mae ki o'tou loto. Ke oko foki eiloa ki itula o te po, a mafaufau o tatou e se mafai eiloa o manava. Ko oko eiloa i te se aoga o te tou mea e fai.

24 Faila 3.13; 5.18; 9.7; Isa 56.12; Luka 12.19; 1Koli 15.32 A te mea tafasili e tau o fai ne te tino ko te kai, inu kae fakafiafia ki mea ko oti ne maua ne ia i ana galuega. A te mea tena e vau foki mai i te Atua.

25E maua mai i fea au meakai mo mea e fakafiafia ei koe?

26Iopu 32.8; Faata 2.6 A te Atua e tuku ne Ia te poto mo te fiafia ki tino kola e fakafiafia ne latou a Ia, ka ko tino agasala e fai ne ia ke ga'lue, tela la, a mea e maua ne latou e avatu ki tino kola e fiafia te Atua ki ei. Tela la, ko oko eiloa i te se aoga o te olaga nei. E pela me se tino e taumafai o afuli a te matagi.