1 NOFOAIGA TUPU 19 - Tuvalu Revised Bible

Amoni mo Sulia ko Takavale(2Samu 10.1-19)

1Fakamuli ifo, ne mate te Tupu o Amoni ko Nahasa, kae sui ne tena tama tagata ko Hanuna.

2Muna a te Tupu ko Tavita penei, “E tau o fakaasi ne au toku fakataugasoa ki a Hanuna, e pela mo te mea ne fai ne tena tamana, ko Nahasa ki a au.”Tena, ne uga ei ne Tavita ana avefekau mo te fekau fakamafanafana ki a Hanuna.

I te okoatuga a latou ki Amoni, ne olo atu ki te Tupu ko Hanuna,

3kae fai atu a takitaki o Amoni ki te lotou tupu penei, “I tau fakatau, a tino konei ne uga mai ne Tavita ke fakaasi tena loto fanoanoa i te mate o tou tamana? Ikai! Ne uga mai ne ia ke fai mo sipai o iloilo faka'lei te fenua, ko te mea ke mafai ne ia o fakatakavale te tou fenua!”

4Ne puke mai ne Hanuna a avefekau a Tavita, vele olotou talafa, sae keatea olotou gatu mai olotou taugasulu, kae uga atu ke olo.

5Ko oko eiloa a latou kona i te ma, ko se mafai o 'foki ki te lotou fenua. I te logoga a Tavita i te mea tena ne tupu, ne avatu tena fekau ki a latou ke olo o nofo i ieliko ke oko ki te taimi ko toe 'loa ei olotou talafa.

6Ne iloa ake ne Hanuna mo te kau Amoni me ko oti ne fai ne latou te mea ka fai fili mai ei Tavita ki a latou, tena ne avatu ei ne latou e tolusefulu fa afe kilokalame o siliva ke togi mai ei ne kaliota mo tino fakatele kaliota mai i Mesopotamia i luga, pela foki mai i itumalo o Sulia ko Maaka mo Sopa.

7A te tolusefulu lua afe kaliota kola ne 'togi mai ne latou, mo te kautau a te tupu o Maaka, ne o'mai o ma'nava i tafa o Metepa. A tino Amoni katoa foki, ne o'mai mai olotou fa'kai o fakatoka mo te taua.

8I te logoga a Tavita i te mea tena e tupu, tena, uga ei ne ia a Ioapo mo te kautau katoa.

9Ne olo atu a te kau Amoni o fakatoka te lotou kau i te auala ki te fa'kai ko Lapa, te laumua o latou, ka ko tupu kola ne o'mai o fesoasoani ki a latou, ne fakatoka olotou tulaga i tua o te fa'kai.

10Ne lavea ne Ioapo i te kautau a te fili e iku o taua mai i te feitu ki mua, pela foki mai i te feitu ki tua, tena la, ne fili aka ne ia a sotia poto eiloa o Isalaelu ke fakasaga ki te kau Sulia.

11Ne tuku ne ia te toega o tena kautau ki te pulega a tena taina ko Apisai, tela ne fakasaga ne ia ki te kau Amoni.

12Muna a Ioapo ki a Apisai, “Kafai e lavea ne koe i a au ka takavale i te kau Sulia, ko vau ei koe o fesoasoani mai, kae kafai e lavea ne au i a koe ka takavale i te kau Amoni, ko fanatu ei au o fesoasoani ki a koe.

13Fakamalosi kae toa tou loto! Taua e taua faka'malosi mo te tou fenua, pela foki mo fa'kai o te 'tou Atua. Ko te loto o te Aliki ke taunu.”

14Ne olo atu a Ioapo mo tena kau ki mua o taua, kae 'tele te kau Sulia.

15I te laveaga ne tino Amoni i te kau Sulia ko tele, tena ne tele foki ei latou mai i a Apisai, o tele ki loto i te fa'kai. Tena, foki atu ei a Ioapo ki Ielusalema.

16Ne iloa ake ne te kau Sulia i a latou ko takavale i te kau Isalaelu, tena ne aumai ei ne latou a kautau mai i itumalo o Sulia i te feitu ki te saegala o te Vaitafe ko Eufilate, kae tuku ki te pulega a Sopaka, te takitaki o te kautau a Hatatesa, te tupu o Sopa.

17I te logoga a Tavita i te mea tena, ne fakamaopoopo ne ia te kautau a Isalaelu, sopo atu ki te sua feitu o te Iolitana, kae fakatulaga ne ia tena kau ke 'saga ki te kau Sulia. Ne kamata te taua,

18kae ne afuli te kautau a Sulia ne te kautau a Isalaelu. Ne tamate ne Tavita mo tena kau e tusa mo te fitu afe tagata Sulia kola e fakatele kaliota, kae e fasefulu afe sotia sasale. Ne tamate foki ne latou a Sopaka, te takitaki o te kautau a Sulia.

19I te iloaga ne tupu kola e pule ne Hatatesa, i a latou ko takavale i a Isalaelu, ne fai te fakataugasoa a latou mo Tavita, nofo ei mai i lalo i tena pulega. A te kau Sulia ne seki toe fiafia o fesoasoani ki te kau Amoni.