SALAMO 27 - Tuvalu Revised Bible

Ko te Talo Tavae

1A te Aliki ko toku mainaga mo toku fakaolataga;

E seai se tino e mataku au ki ei.

A te Aliki e puipui ne ia a au mai mea faigata katoa;

Ka se mataku lele eiloa a au.

2Kafai e faitaua mai a tino amio ma'sei ki au,

Kae taumafai o tamate au,

Ka takase'se latou kae siga.

3E tusa eiloa me nikoi au ne se kautau lasi,

Au se mataku lele eiloa;

E tusa eiloa me faitaua mai oku fili ki a au,

E tumau eiloa toku fakatuanaki ki te Atua.

4E tasi faeloa te mea ne fakatagi atu ei au ki te Aliki;

E tasi foki eiloa te mea e manako au ki ei:

Ke nofo au i te fale o te Aliki i toku olaga katoa,

Ko te mea ke ofo au i te 'lei katoatoa o te Aliki,

Kae fakatagi atu ki tena takitakiga.

5I taimi o fakalavelave, e fakamalu ne ia a au;

E tausi foki ne ia au ke sao i loto i tena Faletapu,

Kae fakanofo ne ia a au i luga i se kaupapa maluga e sao 'lei ei au.

6Tela, ka manumalo ei au i oku fili kola e nikoi mai au.

E ofo atu ne au a taulaga mo te leo fiafia i loto i tena Faletapu,

Kae ka usu foki ne au a pese e tavae ei ki te Aliki.

7Te Aliki, fakalogo mai ki toku leo ma kalaga atu au ki a koe!

Alofa mai kae tali mai ki a au!

8Ne fai mai koe ki a au penei, “Vau o tapuaki mai ki a au,”

Kae ne tali atu au penei,

“Te Aliki, au ka fanatu ki a koe;

9Sa 'muni mai i a au!”

Mo a koe ma ita mai ki a au;

Sa afuligina keatea tau tavini.

A koe ko toku fesoasoani;

Te Atua, toku fakaola, sa tuku tiakina mai au!

10E mafai ne toku tamana mo toku matua o tiakina au,

Ka ko te Aliki ka tausi ne ia a au.

11Te Aliki, akoako mai ki a au mea kola e loto koe ki ei ke fai ne au,

Takitaki mai ki te auala e sao ei au,

i te mea e tokouke oku fili.

12Sa tuku tiakina atu au ki oku fili kola e kaitaua mai ki a au i muna 'loi mo fakamatakutakuga.

13E mautinoa ne au i a au e ola eiloa ke lavea ne au te aga'lei o te Aliki i te olaga nei.

14Talitonu ki te Aliki.

Fakatuanaki ki a ia kae sa loto vaivai.

Talitonu ki te Aliki.