FAMASINO 20 - Tuvalu Revised Bible

Isalaelu ko Fakatoka mo te Taua

1A tino Isalaelu katoa mai Tanu i matu ke oko ki Pelesepa i saute, e pela foki mai te fenua o Kileata i te saegala, ne talia ne latou te kalaga ke maopoopo latou. Ne maopoopo katoa latou i mua o te Aliki i Mesepa.

2A takitaki katoa o matakaiga o Isalaelu ne maopoopo katoa i te maopoopoga tenei o te fenua o te Atua, kae e faselau afe sotia sasale ne oko atu.

3I te taimi tena, a tino Peniamina ko logo i tino Isalaelu katoa kola e maopoopo i Mesepa.

Ne fesili atu a tino Isalaelu penei, “Taku mai me ne fai pefea te agasala tena?”

4Ne tali atu ei te tagata Levi tela ne mate tena avaga fakasalasala penei, “Maua ne olo mo taku avaga fakasalasala ki Kipea i te laukele o Peniamina o moe i ei i te po tena.

5Ne o'mai a tagata Kipea o nikoi te fale tela e nofo ei maua, i te po tena. Ne taumafai latou o tamate au; ne seki taunu te lotou manatu tena, puke malo faka ei ne latou taku avaga fakasalasala, tena ne mate ei.

6Ne puke mai ne au tena foitino o katikati ki potumea e sefulu lua, tufa atu ei ne au e takitasi potumea i matakaiga takitasi o Isalaelu. A tino kona ko oti ne fai ne latou se amioga masei i te tou fenua.

7A koutou katoa konei ne tino Isalaelu. Se a te mea e tau o fai ne tatou ki te mea tena?”

8Ne 'tu katoa ki luga a tino i kona kae fai aka penei, “E seai eiloa se tino i a tatou e foki atu ki tena fale, faitalia me se faleie io me se fale eiloa.

9Tenei te mea ka fai ne tatou: ka fai ne tatou se vili ke fili ei ne tagata ke olo o taua ki Kipea.

10E tasi vae sefulu tagata i Isalaelu e nofo o fakatoka meakai ma te kautau, ka ko te sua vaega e olo o fakasala a tino Kipea e tusa mo te amioga masei a latou ne fai i te fenua o Isalaelu.”

11Tena la, ne maopoopo katoa ei a tino Isalaelu mo te fakamoemoega e tasi, o taua atu ki te fa'kai o Kipea.

12Ne uga atu ne tino Isalaelu a avefekau a latou ki fa'kai o te matakaiga o Peniamina mo te fekau penei: “Se a te agasala tenei ko oti ne fai ne koutou?

13Tuku mai a tino amio masei kona i Kipea ke tamate ne matou, ke solo keatea atu ei te masei tenei i luga i Isalaelu.” Ka ko tino Peniamina e se fia saga ki te fekau tena a tagata Isalaelu.

14Tena ne maopoopo mai ei te kau Peniamina ki Kipea o taua atu ki nisi tino Isalaelu.

15-16I te aso tena, ne fakamaopoopo ne latou e luasefulu ono afe sotia mai olotou fa'kai. Ka ko tino Kipea ne fakamaopoopo ne latou e fituselau tagata fai eiloa o latou kae e tau katoa ki olotou maui. Ko latou eiloa ko poto i te fakaaogaga o te sana fatu; e mafai ne latou o sana se lāulu e tasi o se tino, kae e se mafai eiloa o seke.

17A te katoaga o Isalaelu e tusa mo te faselau afe sotia.

Ko te Taua mo Tino Peniamina

18Ne olo atu a tino Isalaelu ki te koga tapuaki i Peteli, kae ne fesili atu latou ki te Atua penei, “Ko oi te matakaiga e mua o taua atu ki tino Peniamina?”

Ne tali mai te Aliki, “Ko te matakaiga o Iuta.”

19Tena, ne fanatu ei te malaga a Isalaelu i te taeao o te sua aso, fakamanava ei i tafa o te fa'kai o Kipea.

20Ne olo atu latou o taua ki te kautau a Peniamina, kae fakatu olotou sotia fakafesagai ki te fa'kai.

21Ne ulu mai te kautau a Peniamina mai loto i te fa'kai, kae ne tamate ne latou e luasefulu lua afe sotia o Isalaelu i te aso tena.

22-23Ne toe olo atu te kau Isalaelu ki te koga tapuaki kae tagi i mua o te Aliki ke oko eiloa ki te afiafi. Ne fesili atu latou ki te Aliki penei, “E a, koi tau matou o toe olo atu o taua ki omotou taina kola ko tino Peniamina?”

Ne tali mai te Aliki, “Ao.” Tena, ne loto ma'losi ei te kautau a Isalaelu, kae fakatoka olotou sotia e pela eiloa mo te aso muamua.

24Tena, ne olo atu latou o taua ki te kautau a Peniamina i te lua o taimi.

25Ne ulu mai sotia o Peniamina mai loto i te fa'kai o Kipea, kae i te taimi tenei, ne tamate ne latou e tusa mo te sefuluvalu afe sotia 'lei eiloa o Isalaelu.

26Tena, ne toe olo atu a tino Isalaelu katoa ki Peteli o tagi fanoanoa. Ne sagasaga latou i kona i mua o te Aliki kae seki kai eiloa ke oko ki te afiafi. Ne ofo atu ne latou ne taulaga fakafetai, kae sunu kātoa nisi taulaga, i kona i mua o te Aliki.

27-28A te Pusa o te Feagaiga a te Atua e tuku i kona i Peteli i aso kona, ka ko Fineaso, te tama tagata a Eleasalo kae ko te mokopuna o Alona, e tausi ne ia. Ne fesili atu a tino ki te Aliki, “E a, koi 'tau matou o olo atu o taua ki omotou taina ko tino Peniamina, me ikai?”

Ne tali mai te Aliki, “Olo o taua. Taeao ko tuku atu ei ne au te manumalo ki a koutou.”

29Tena, ne fakamuni ei ne tino Isalaelu a olotou sotia fakatamilo te fa'kai o Kipea.

30Tena la, ko te tolu o taimi tenei ko toe mati atu ei a te kau a Isalaelu o taua ki te kau Peniamina, kae fakatulaga olotou sotia fakasaga ki Kipea, e pela eiloa mo te lotou faiga muamua.

31Ne ulu mai te kautau a Peniamina mai te fa'kai o taua, kae ne taki atu eiloa latou ke tai mao mai te fa'kai. E pela eiloa mo taimi mua, ne kamata te taga a latou i tino Isalaelu i te laufenua ateatea, i te auala ki Peteli, pela foki i te auala ki Kipea. E tusa mo te tinotolu tino Isalaelu ne tamate ne latou.

32Muna a tino Peniamina, “Ko takavale foki i a tatou e pela mo taimi mua.”

Ka ko tino Isalaelu, ne mafaufau eiloa ke tele latou, ko te mea ke taki ne latou te kau Peniamina ki auala, ke mao mai i te fa'kai.

33Tena la, i te teleatuga o te kautau lasi a Isalaelu o toe potopoto i Palatamala, ka ko te kau a latou kola e muni fakatamilo i te fa'kai o Kipea ne tele atu mai i olotou koga muni i koga fatufatua o te fenua i tafatafa o te fa'kai o Kipea.

34E sefulu afe tagata 'lei eiloa o Isalaelu ne filifilia kola ne taua atu ki Kipea, tena ko fai masei eiloa te taua a latou tena. E seiloa eiloa ne tino Peniamina i a latou ko pili o takavale.

35Ne tuku atu ne te Aliki te manumalo ki te kautau a Isalaelu i te kautau a Peniamina. E tusa mo te luasefulu lima afe mo te selau tagata Peniamina ne mate i te aso tena,

36tena, kae fatoa lagona ifo ei ne te kau Peniamina i a latou ko takavale.

Ne Manumalo Pefea Isalaelu

A te kautau lasi a Isalaelu ne tele keatea mai i te kau Peniamina me e fakalagolago ki te kau a latou kola e muni i tafatafa o Kipea.

37A tagata kona ne tele fakavave atu ki Kipea, vaevae te lotou kau i te fa'kai kae tamate a tino katoa i kona.

38A te kautau lasi a Isalaelu mo te kau kola ne fakamuni, e isi se fakailoga a latou ko oti ne fai. Kafai ko matea ne te kautau lasi a Isalaelu te au e fanake mai te fa'kai,

39ko latou eiloa ko tele. I te taimi tena, ka ko oti ei ne mate te tinotolu tagata Isalaelu. Ne mafaufau aka a tino Peniamina penei, “Ko takavale foki a tino Isalaelu i a tatou e pela mo te taimi mua.”

40I te taimi tena, kae fanake mo te fakailoga, tela ko te au ko fanake mai te fa'kai. Ne kilo atu te kau Peniamina ki olotou tua kae poi i te mateaga ne latou te fa'kai ko 'ka valevale.

41Tena, ne toe ma'fuli atu ei te kau Isalaelu, ka ko tino Peniamina ko tele valevale fua i te mataku me ko iloa ne latou i a latou ko pili o takavale.

42Ne tele latou mai te kau Isalaelu, tele atu eiloa ki te koga ateatea, kae ko se mafai eiloa latou o sao. Tena ne 'po atu ei latou i te va o te kautau lasi a Isalaelu mo te kau a latou kola ko 'foki mai i te sunuga o te fa'kai, tena ne ta valevale ei latou i kona.

43Ne po fakalei atu eiloa ne te kau Isalaelu a te fili, tena ne afuli atu eiloa ne latou ke oko ki te kogā koga e tasi i te feitu ki te saegala o Kipea, kae i te lotou auala, ne tamate fakasolosolo atu eiloa ne tino Isalaelu a tino Peniamina.

44E sefuluvalu afe sotia 'lei eiloa a te kau Peniamina ne mate.

45A te sua vaega ne tele atu eiloa ke oko ki te kaupapa o Limoni. E lima afe o te fili ne tamate atu i te auala. Ne afuli atu eiloa latou ne te kau Isalaelu ke oko ki Kitoma, kae e lua afe ne tamate ne latou i te auala.

46Tena, e tusa ei mo te luasefulu lima afe tagata Peniamina ne mate i te aso tena; a latou ne sotia toa katoa.

47Kae e ono selau ne sao atu ki te laukele ateatea, ki te kaupapa o Limoni, kae ne nofo eiloa i kona e fa masina.

48Ne ma'fuli atu te kau Isalaelu, tamate katoa a tino Peniamina; tagata, fafine, tamaliki, ke oko eiloa ki manu. Ne sunu foki ne latou a fa'kai katoa i te koga tena.