SALAMO 65 - Tuvalu Revised Bible

Tavaega mo Fakafetai

1Te Atua, e 'tau o tavaea koe ne matou i Siona,

Kae tausi eiloa matou ki mea ne tauto atu ei matou ki a koe

2Me tali mai eiloa koe ki talosaga.

E olo atu ki a koe a tino katoa

3Mo te fakamagaloga o olotou agasala.

Ko manumalo te masei i a matou, kae ne fakamagalo eiloa ne koe.

4Amutia a latou ne filifili ne koe,

Ko latou kola ne aumai ne koe ke 'nofo i tou faletapu.

E ma'lie matou i mea 'lei i tou fale, ko fakamanuiaga i tou Faletapu.

5Te Atua te motou Fakaola, a koe e tali mai ki a matou o tuku mai te manumalo,

Ne fai ne koe mea fakaofoofogia ke fakasao ei matou.

E fakatuaga ki a koe a tino katoa i te lalolagi,

Mo latou kola e 'nofo i vasa 'mao.

6Ko tou malosi e fakatumau ei mauga i olotou tulaga,

E fakaasi ei tou 'mana malosi.

7E fakamau ne koe te sou o te tai mo te 'gana mai o galu;

E fakafilemu foki ne koe a te ua'te o tino.

8Ko ma'taku te lalolagi katoa i mea fakaofoofogia ko oti ne fai ne koe.

Ko mea ne fai ne koe e aumai ei te fiafia,

Mai te sua kapakapalagi ki te sua kapakapalagi.

9Ko fakaasi tou alofa ki te laukele i te faka'to ifo ne koe te vaiua;

E fakamaumea kae fakaola ne koe.

E faka'fonu ne koe a vaitafe ki vai;

E aumai foki ne koe a lakau kaina ki te lalolagi.

Ne fai ne koe penei:

10E faka'to ifo ne koe a vaiua ki luga i fatoaga,

Ko ufi ei ki vai;

E fakamalulu ne koe te laukele ki vaiua ke ola ake ei a tamā lakau koi tupu ake.

11Ko oko eiloa i te lasi o te maumea ne aumai ne tou aga'lei!

So se koga e fano koe ki ei e lasi faeloa te taukai i ei!

12A koga moukua ko fonu i lafu manu e kaikai i ei;

A kautafa o mauga ko 'fonu i te fiafia.

13A malae moukua ko fonu katoa i mamoe;

A vanu ko 'fonu foki i saito,

A mea katoa ko kalaga kae usu pese i te fiafia.