1I te tolu o tausaga o te nofoaiga a Hosia te tama tagata a Ela i Isalaelu, kae sopo Hesekia, te tama tagata a Aasa o fai mo tupu o Iuta
2ka ko luasefulu lima ei ona tausaga. Ne tupu a ia i Ielusalema i tausaga e luasefulu iva. A tena matua ko Apita, te tama fafine a Sakalia.
3Ne tautali eiloa a ia i auala o Tavita, me ne fakafiafia ne ia a te Aliki ana mea ne fai
4Nume 21.9 Ne ofa ne i a koga tapuaki fa'paupau, mo pou fatu, kae ne ta ne ia ki lalo a fakatusa o te atua fafine ko Asaila. Ne ofa likiliki foki ne ia a te gata palasi tela ne faite ne Mose, tela e fakaigoa ko Neusitana. A tino Isalaelu, ne masani o sunu mea ma'nogi o fakaaloalo ki te gata tena ke oko ki te taimi tena ne ofa ei.
5A Hesekia ne talitonu eiloa ki te Aliki te Atua o Isalaelu; e seki ai eiloa se tupu i Iuta fakamuli ifo e pau mo ia, seai foki se tupu i Iuta mai mua atu e pau mo ia.
6A ia e fakamaoni eiloa ki te Aliki kae e seki teke eiloa ki ei; e tausi faka'lei eiloa a ia ki fakatonuga katoa a te Aliki kola ne tuku ki a Mose.
7Tela la, a te Aliki e fakatasi faeloa ki a ia, kae manuia faeloa a ia i ana mea e fai. Ne teke atu a ia ki te tupu o Asulia, kae ita ma ne fakamala'lalo atu ki ei.
8Ne fakatakavale ne ia te kau Filisitia, kae taua sale atu ki koga e nofo ei latou, mai te fa'kai foliki ke oko ki te fa'kai lasi eiloa, e aofia ei a te fa'kai o Kasa mo te koga laukele i ona tafatafa.
9I te fa o tausaga o te nofoaiga a Hesekia, ko te fitu tena o tausaga o te nofoaiga a Hosia te tupu o Isalaelu, kae vau te Tupu o Asulia ko Salamanesa o taua ki Isalaelu kae taumafai o puke te fa'kai o Samalia.
10I te tolu o tausaga, ko Samalia eiloa ko takavale; ko te ono tenei o tausaga o te nofoaiga a Hesekia, ka ko Hosia ko te iva o tausaga o tena nofoaiga.
11Ne ave fakapagota a te kau Isalaelu ne te tupu o Asulia ki Asulia, kae faka'nofo ne ia a nisi o latou i te fa'kai o Hala, nisi i tafa o te Vaitafe o Hapola i te kogā fenua o Kosana, ka ko nisi i fa'kai o Metai.
12A Samalia ne takavale me i tino Isalaelu ne seki faka'logo ki te Aliki te lotou Atua, kae ofa ne latou a te feagaiga ne fai ne ia mo latou, kae ofa ne latou a tulafono katoa kola ne tuku mai ne Mose, te tavini a te Aliki. Ne seki faka'logo latou ki fakatonuga, seki tausi foki ne latou.
Asulia ko Taumafai o Puke Ielusalema(2NTupu 32.1-19; Isa 36.1-22)13I te sefulufa o tausaga o te nofoaiga a te Tupu ko Hesekia, ne vau ei Sanelivi, te tupu o Asulia, o taua ki fa'kai o Iuta kola e isi ne olo o latou, tena ne fakatakavale eiloa ne ia.
14Ne ave te fekau a Hesekia ki a Sanelivi tela e nofo i Lakisa penei: “Au ko 'se; fakamolemole fakagata tou faitaua mai, kae ka 'togi atu ne au so se mea e manako koe ki ei.” A te tali a te tupu, ke avatu ne Hesekia ki a ia e sefulu afe kilokalame o siliva kae afe kilokalame o aulo.
15Ne avatu ne Hesekia ki a Sanelivi a siliva katoa i potu teu koloa i te Faletapu mo te palesi;
16ne fakataka keatea foki ne ia a te aulo tela e ufi i mataloa o te Faletapu, mo aulo kola ne ufi ne ia ki pou o mataloa, ave katoa ne ia ki a Sanelivi.
17Ne uga ne te tupu o Asulia se kautau lasi eiloa mai Lakisa ke olo o taua atu ki a Hesekia i Ielusalema, a kautau a ia kona, e takitakigia ne ana ofisa maluga eiloa e tokotolu. I te okoatuga a latou ki Ielusalema, ne nofo latou i te auala tela e ga'lue ei a tino faite laugatu, i tafa o te vaitafe tela e tafe mai ei te vai mai te vai tafa ki luga.
18Ne uga te fekau a latou ki a Hesekia, kae uga mai ne Hesekia ana ofisa e tokotolu ke olo atu o fakafetaui kia latou: ko Eliakimo te tama tagata a Hilikia tela e pule i te palesi; ko Sepina te failautusi o te fono; mo Ioa, te tama tagata a Asafo, tela e tausi ne ia a tusi.
19E tokotasi mai ofisa o te kau Sulia ne fai atu ki a latou i te tupu o Asulia e fia iloa ne ia me ai a e se mataku ei Hesekia.
20Ne toe fai mai te ofisa tena penei, “I te otou faka'tau e mafai ne pati o fakatakavale a te poto mo te malosi i te taua? Ko oi i te otou faka'tau ka fesoasoani atu ki a koutou o 'teke mai ki Asulia?
21A koutou e fakamoemoe ki Aikupito ke fesoasoani atu ki a koutou — a Aikupito e pela fua me se tokotoko mouku tela ka fati kae tue mai ki tou lima. E pena eiloa te tupu o Aikupito manafai e isi se tino e fakamoemoe ki ei.”
22Ne faipati eiloa te ofisa Asulia tena, muna a ia, “Me ko koutou na ka fai mai i a koutou e fakalagolago ki te Aliki te Atua? A koga tapuaki mo fata-fai-taulaga kola ne ofa ne Hesekia i te taimi ne fai atu ei a ia ki tino o Iuta mo Ielusalema ke tapuaki fua i te fata-fai-taulaga i Ielusalema, e a te Aliki.
23Ka fai ne au se feagaiga mo koutou i te igoa o te tupu o Asulia. Ka avatu ne au e lua afe solofanua manafai e mafai o 'sala ne koutou lua afe tagata ke sopo i ei!
24A koutou e se taitai eiloa o fetaui mo te 'toe ofisa tafa ki lalo eiloa i Aikupito ne kaliota mo tino sopo i solofanua ma koutou!
25I te otou fakatau au ne taua ki te otou fenua kae fakamasei ne au, kae seki fesoasoani mai te Aliki ki a au? Ko te Aliki ne fai mai ki a au ke taua atu au ki te otou fenua kae ke fakamasei ne au.”
26Tena, kae fai atu a Eliakimo mo Sepina, mo Ioa ki te ofisa tena penei, “Tou 'malu, faipati mai ki te gana Alamaika i a matou e malamalama i ei. Sa faipati faka Epelu me i tino kola e sagasaga mai i luga i te 'pui o te fa'kai e fakalogologo mai katoa.”
27Ne tali mai te ofisa tena, “I te otou fakatau au nei ne uga mai ne toku tupu ke faipati atu ne au a mea konei ki a koutou fua kona e tu mai mo te otou tupu? Ikai, au nei e faipati foki ki tino kona e sagasaga mai i luga i te pui, kola ko se 'mao nei o kai ki olotou fekau kae inu ki olotou mimi, e pena foki te mea ka oko ki a koutou.”
28Tena ne tu fakamakeke aka te ofisa Asulia tena kae kalaga atu faka Epelu penei, “Faka'logo mai ki muna a te tupu o Asulia ki a koutou!
29Ko fai mai ke onoono faka'lei koutou ke mo a koutou e fakaloiloi ne Hesekia. E se mafai ne Hesekia o fakasao koutou.
30Sa faka'logo ki ei manafai e fai mai ke fakalagolago koutou ki te Aliki. Sa mafaufau eiloa pela i a koutou e fakasao ne te Aliki, io me taofi ne ia te kautau Asulia ke se puke te otou fa'kai.
31Sa faka'logo ki a Hesekia. A te tupu o Asulia ko fakatonu mai ke o'mai koutou ki tua mo te fa'kai kae talia te otou takavale. Ka saoloto eiloa koutou o kai ki vine mai otou togā vine, mo mati mai otou togā mati, kae inu ki vai mai otou vaikeli
32ke oko ki te taimi e ave ei koutou ne te motou tupu o fakanofo i se fenua penei eiloa mo te otou fenua, tela e isi ne togā vine e maua ei otou uaina mo saito mo fai otou falaoa; se fenua e uke te olive mo te sinu olive mo hani. Kafai e fai ne koutou te fakatonuga a te tupu o Asulia tena, a koutou e se 'mate, kae e ola. Sa faka'logo ki a Hesekia manafai e fai atu i a koutou e fakasao ne te Aliki.
33E seai eiloa se malo kai fakasao ne tena atua mai lima o te tupu o Asulia.
34Ko fea a atua o Hamata mo Apata? Ko fea a atua o Sefavaima, Hena mo Iva? E isi se tino ne fakasao ne ia a Samalia?
35Kai isi eiloa se atua i atua konei ko oti ne fakasao ne ia tena fenua mai lima o te motou tupu? Se a la te mea e talitonu fua ei koutou i te Aliki e mafai ne ia o fakasao a Ielusalema?”
36A tino Ielusalema ne nofo mu eiloa, seai ne olotou pati ne fai, e tusa eiloa mo te fakatonuga a Hesekia ne fai ki a latou.
37Tena ne saesae ei a gatu o Eliakimo, Sepina mo Ioa i te fanoanoa, olo atu ei o lipoti ki te tupu a pati a te ofisa Asulia kola ne fai.
Who We AreWhat We EelieveWhat We Do
2025 by iamachristian.org,Inc All rights reserved.
