FAMASINO 19 - Tuvalu Revised Bible

Ko te Tagata sa Levi mo tena Avaga Fakasalasala

1I aso mua, seki ai se tupu o Isalaelu, e isi se tagata Levi e nofo i te feitu ki tua i te fenua maugā o Efalaima. Ne puke mai ne ia se fafine mai Peteleema i Iuta mo fai tena avaga fakasalasala.

2Ne ita te fafine tena ki te tagata Levi, tena toe foki atu ei ki tena tamana i Peteleema, nofo eiloa i kona i masina e fa.

3Ne mafaufau te tagata Levi ke fano a ia o toe taumafai ki te fafine tena ke foki atu ki a ia. Ne malaga atu a ia mo tena tavini mo ana asini e lua. Ne faulu atu a ia ne te fafine ki loto i te fale, kae i te mateaga a ia ne te tamana o te fafine tena, ne talia eiloa a ia mo te fiafia ne te tamana o te fafine tena.

4Ne finau mai te tamana o te fafine ke nofo a ia, tena ne nofo ei a ia i aso e tolu. Ne kai fakatasi kae moe foki i kona a te tagata Levi mo tena avaga fakasalasala.

5I te taeao o te fa o aso, ne pula aka latou, fakatoka eiloa te lotou malaga. Kae ne fai mai te tamana o te fafine ki te tagata Levi penei, “O'mai mua o kai, ke maua te malosi. Fakamuli loa ko olo ei koutou.”

6Tena ne nofo ifo te tokolua tagata kona o kai kae inu fakatasi. Ne fai atu foki te tamana o te fafine penei, “Fakamolemole nofo o moe i konei ma po nei, ke fakafiafia atu koulua.”

7Ne tu aka te tagata Levi o fakatoka te malaga, kae ne fakamolemole atu eiloa te tamana o te fafine ke nofo, tena ne toe nofo ei a ia o moe i kona i te po tena.

8I te taeao o te lima o aso, ne fakatoka te malaga ka fano, kae toe fai mai te tamana o te fafine penei, “Fakamolemole, o'mai o kai. Faka'tali ke tai maluga aka te la.” Tena ne toe kai ei te tokolua tagata kona i kona.

9Ne fakatoka te malaga a te tagata Levi, mo tena avaga fakasalasala, mo tena tavini, kae toe fai mai mo te tamana o te fafine, “Kiloke, ko po; e sili ma na moe koutou i konei i te po nei. Ko pili nei o pouli; nofo mai ke fiafia fakatasi tatou. Taeao ko olo ei koutou i te taeao 'malu.”

10-11Ka ko te tagata Levi ko se toe manako o toe nofo i kona i se po e tasi, tena ne fano eiloa te malaga a ia mo tena avaga fakasalasala, mo tena tavini mo ana asini, mo nofoga i luga i ei. Ne oko atu latou ki tafa o Iepuse, tela ko Ielusalema kae ko pale malie te la, tena ne fai atu ei te tavini ki tena matai penei, “Ai a se ma'nava ei tatou i te fa'kai o Iepuse tenei?”

12-13Kae ne tali atu tena matai penei, “A tatou e se tau o manava i se fa'kai e nofo ei a tino fakaatea, kae se ne tino Isalaelu. A tatou ka mumea atu eiloa o fakamanava i Kipea io me ko Lama.”

14Tena, ne olo atu eiloa latou fakaseke mo Iepuse, kae oko atu latou ki Kipea, i te laukele o te matakaiga o Peniamina, ka ko to ei te la.

15Tena ne olo atu ei latou o faka'manava i kona, i te po tena. Ne olo atu latou ki loto i te fa'kai, sagasaga ei i te malae sautala o te fa'kai, kae seai eiloa se tino ne vau o fai atu ki a latou ke olo latou ki tena fale o moe i ei i te po tena.

16Ka koi nofo eiloa latou i kona, ne ulu mai te toeaina, ko foki mai i tena fatoaga. A te toeaina tena ne nofo sale eiloa i te fenua maugā o Efalaima, kae nei ko nofo i Kipea. A nisi tino i kona, ko tino i te matakaiga o Peniamina.

17Ne matea ne te toeaina a latou kona i te malae sautala, tena fesili atu ei a ia penei, “A koutou ne o'mai mai fea? A koutou nei e olo ki fea?”

18Ne tali atu te tagata Levi penei, “A matou ne olo ki Peteleema i Iuta kae nei matou ko foki atu ki te motou fale i te feitu ki loto i te fenua maugā o Efalaima. E seai eiloa se tino e talia ne ia ke moe matou i tena fale i te po nei,

19me e isi eiloa ne meakai ma omotou asini, e isi foki ne falaoa mo uaina ma taku avaga fakasalasala mo au mo taku tavini.”

20Muna a te toeaina, “O'mai ki toku fale! O'mai ke tausi koutou ne au, e se tau koutou o moe i te malae sautala.”

21Ne avatu latou ne te toeaina ki tena fale, fagai foki ei ne ia olotou asini. Ne mulu a vae o latou, te mea eiloa ko fai te lotou kaiga.

22 Kene 19.5-8 Ko fiafia faka eiloa latou i olotou meakai, kae poi eiloa latou i tino amio masei mai i te fa'kai ko mai o nikoi te fale kae tukituki mai sale i te mataloa. Muna a tino masei kona ki te toeaina, “Aumai ki tua te tagata tena ne aumai ne koe ki tou fale! A matou e ma'nako o moe mo ia!”

23Kae ne ulu atu te toeaina ki tua kae fai atu ki a latou penei, “ikai, oku tagata! Fakamolemole, sa faigina se mea masei pena! A te tagata tenei se malo a aku.

24Kiloke! Tenei tena avaga fakasalasala mo taku tama fafine tela se taupou. Ka avatu ne au laua ki a koutou. Fai so se mea e loto koutou o fai ki te tokolua kona. Kae sa faigina se mea mataga pena ki te tagata tenei!”

25Ka ko tagata kona i tua e se fia saga lele eiloa ki te toeaina tena. Tena ne puke atu ei te tagata Levi ki tena avaga fakasalasala o tuku atu ki tua i a latou. Ne puke malo ne latou kae fai valevale ne latou i te po katoa tena, ke oko eiloa ki te tafataeao.

26I te vaveao ne vau te avaga fakasalasala a te tagata Levi, siga mai fua i te mataloa o te fale o te toeaina tena e nofo ei tena avaga.

27Ne ala aka te tagata Levi tena i te tafataeao, kae i te taimi ne tala atu ei te mataloa o fai o fano i tena malaga, maua atu ei ne ia tena avaga fakasalasala e takato mai i te matafale mo ona lima e taumafai ke oko ki te mataloa.

28Ne fai atu te tagata Levi ki ei penei, “Tu ki luga. Tatou ka olo.” Kae e seki tali mai, tena ne fakasopo aka ei ne ia ki luga i te asini, fanatu eiloa te lotou malaga ki tena fale.

291Samu 11.7 I te okoatuga o latou, ne fanatu a ia ki loto i tena fale o puke mai tena naifi. Ne puke atu a ia ki tena avaga fakasalasala, katikati tena foitino ki potumea e sefulu lua, ave ei ne ia e takitasi potumea ki matakaiga takitasi o Isalaelu.

30A tino kola ne matea ne latou te mea tena ne fai aka penei, “E seki ai eiloa se mea pena kai lagona ne matou! E seki ai foki eiloa se mea pena kai tupu talu mai te taimi ne tiaki ei ne Isalaelu a Aikupito! Ko tau o fai nei ne matou se faiga ki te mea nei! Se a la te faiga ka fai ne tatou?”