ESETA 9 - Tuvalu Revised Bible

Ko Ta Fakapalele ne te Kau Iutaia a olotou Fili

1Ko oko mai nei ki te po sefulu tolu o te masina o Atala, te aso ka fakataunu ei a te fakasalalauga a te tupu, ko te aso ne fakamoemoegina ne fili o te kau Iutaia me ka 'ta ne latou tino Iutaia. Kae tela la, ko tino Iutaia ne manumalo i a latou.

2I koga e nofo ei tino Iutaia i fa'kai takitasi i loto i te malo, a tino Iutaia e fakatoka eiloa o ta se tino e taumafai o 'ta latou. A tino katoa ko ma'taku i tino Iutaia, me ko se maua ne latou o fakatakavale.

3A ofisa o itumalo kesekese, mo kovana mo tino ma'luga, ne fesoasoani ki tino Iutaia me i a latou e ma'taku i a Moletekai.

4Ko iloa 'lei eiloa i loto i te malo kātoa, i a Moletekai se tagata maluga eiloa i te palesi, kae tenei e gasolo aka eiloa ki luga.

5Tena la, a tino Iutaia e pule eiloa i te mea e fai ne latou ki olotou fili. Ne taua atu latou ki olotou fili, kae ne 'ta valevale eiloa ne latou ki pelu.

6E tusa mo te limaselau tino ne 'ta ne te kau Iutaia i loto i te fa'kai o Susa.

7-10E aofia i te kau kona, ko te tino-agafulu tama tagata a Hamanu, te tama tagata a Hametata, te fili o te kau Iutaia: ko Pasanatata, Talafoni, Asipati, Polata, Atalia, Alitata, Palamasita, Alisai, Alitai, Vaisata. E seki ai ne mea ne 'fao ne latou mai olotou fili.

11I te aso foki eiloa tena, ne fakailoa atu foki ki te tupu a te aofaki o tino ne mate i Susa.

12Tena ne fai atu ei a te tupu ki a Eseta penei, “I te fa'kai faeloa o Susa, ko tusa mo te limaselau tagata ne tamate ne te kau Iutaia, e aofia ei te tinogafulu tama tagata a Hamanu. E pefea la nei te mea e fai ne latou i nisi itumalo. Se a nei te mea e manako mai koe ki ei? E talia eiloa ne au. Taku mai te mea e manako mai nei koe ki ei kae ka avatu eiloa ne au.”

13Ne tali atu a Eseta, “Tou Malu, ke talia ne koe ke toe fai ne tino Iutaia i konei i Susa, ma taeao, a te mea tenei ne fai ne latou i te aso nei. Kae fai atu se fakatonuga ke ave a foitino o tama tagata e tino-gafulu a Hamanu o fakatau'tau i te koga sisi tino.”

14Ne fai te fakatonuga a te tupu ke fai te mea tena, tena ne fakailoa atu ei a te fakasalalauga tena i loto i Susa. A foitino o tama tagata a Hamanu e tino-gafulu ne fakatau'tau eiloa ke lavea ne tino i te koga sisi tino.

15I te po sefulu fa o te masina o Atala, ne maopoopo a tino Iutaia i Susa, kae 'ta ne latou e toluselau tagata i te fa'kai tena i te aso tena. Kae e seai ne mea ne puke ne latou mai olotou fili.

16A tino Iutaia i itumalo takitasi ne fakatoka foki olotou potukau o taua atu ki olotou fili. Ne tamate ne latou e tusa mo te fitusefulu lima afe tino kola e takalialia i a latou. E seki ai foki ne mea ne 'fao ne latou.

17A te mea tena, ne tupu i te po sefulu tolu o te masina o Atala. I te sua aso, te po sefulu fa, e seai ne tino ne tamate, kae ne fakaaoga ne latou te aso tena o fai 'kaiga fia'fia a latou.

18A tino Iutaia i Susa ne fai ne latou te po sefulu lima ko te aso malolo o latou, me ne ta ne latou olotou fili i te po sefulu tolu mo te po sefulu fa kae gata i te po sefulu lima.

19Tena te mea e fakamanatu ei ne te kau Iutaia kola e nofo i fa'kai fo'liki a te po sefulu fa o te masina o Atala, se aso fiafia, se aso e fai fakaala ei latou kae fai meaalofa meakai ki olotou taina Iutaia eiloa.

Ko te 'Kaiga Fiafia o te Pulima

20Ne fakamau ne Moletekai a mea kona ne tupu, kae avatu ne ia a tusi ki tino Iutaia katoa i loto i te Malo o Pelesia,

21o fakaasi ki a latou ke fakamanatu ne latou a te po sefulu fa mo te po sefulu lima o te masina o Atala ke fai mo aso malolo i tausaga takitasi.

22A aso kona ko aso ne fakatakavale ei ne te kau Iutaia a olotou fili; ko te masina foki tena ne tau o fanoa'noa ei a tino Iutaia, kae nei ko fai mo masina e lifu kae fia'fia ei latou. A aso kona e tau o fakamanatu i faiga o fakaala mo 'kaiga, kae tuku atu mo meaalofa meakai ki nisi taina pela foki ki tino ma'tiva.

23Tena, ne tau'tali eiloa a tino Iutaia ki te fakatonuga a Moletekai, tena ne fai ei te aso tena se aso e fakamanatu sale i tausaga takitasi.

24 Eseta 3.7 A Hamanu te tama tagata a Hametata, te tino i te gafa o Akako, kae ko te fili o te kau Iutaia, ne fai ne ia te vili (io me ko te “pulima”) ke iloa aka ei te aso e 'tau ei o 'ta fakapalele a te kau Iutaia; a Hamanu ne mafaufau ke 'ta fakapalele katoa.

25Ka ko Eseta ne fano ki te tupu, tena ne fai ne te tupu se fakasalalauga e tusi ki lalo ke taua atu te kau Iutaia ki tino e o'mai o 'ta latou — tena la, a Hamanu ne mate eiloa i te togafiti ne faite ne ia ke 'ta ei te kau Iutaia — ne sisi a ia fakatasi mo ana tama tagata i te koga sisi tino.

26Tena te mea e fakaigoa ei a aso malolo kona ko te Pulima. Mai luga i te tusi a Moletekai, mo mea kona ne tupu ki tino Iutaia,

27ne fai ei ne tino Iutaia ke fai mo tulafono ki a latou mo tino i olotou gafa, mo so se tino e fia fai mo tino Iutaia, me i tausaga takitasi a aso konei e lua e tau faeloa o fakamanatu, e pela eiloa mo te fakatonuga a Moletekai.

28Ne iku aka ei, me i tino Iutaia katoa i so se tupulaga i itumalo katoa mo fa'kai katoa e tau o masaua kae fakamanatu a aso o te Pulima i taimi katoa fakamuli.

29Tena ne tusi ei ne Moletekai mo Eseta, te tama fafine a Apihaila, a te tusi i te igoa o Eseta e uiga ki te fakamautuga o te Pulima, e lago malosi atu ei ki te tusi tela ne tusi ne Moletekai.

30A te tusi e fakatuatusi ki tino Iutaia katoa, mo kopi ne ave ki itumalo katoa e 127 i te Malo o Pelesia. A te tusi tena e fakamanuia atu foki ki tino Iutaia katoa,

31kae fakatonu atu foki ki a latou mo tino o olotou gafa ke fakamanatu a aso o te Pulima i te taimi tonu, e pela eiloa mo tulafono ne tautali latou i ei mō te faiga o te fakalikilikiga mō tapuakiga mo faiga o fanoa'noa. A te mea tena ne fakatonu mai ne Moletekai mo Eseta, te avaga a te tupu.

32A te fakatonuga a Eseta e fakamalosi ei te tulafono o te Pulima, ne tusi ki lalo i te tusi.