1Viki atu koutou ki te Aliki!
Se mea lei o usu atu a vikiga ki te tou Atua;
E lei kae tonu te viki atu ki a ia.
2Ko toe atiake ne te Aliki a Ielusalema;
Ko faka'foki mai ne ia latou kola ne ave fakapagota ki fenua fakaatea.
3Ka fakamafanafana ne ia latou kola e loto mafatia,
Kae fusi ne ia olotou pa'kiaga.
4Ko oti ne fuafua ne ia te aofaki o fetu o te lagi,
Kae fakaigoa ne ia a fetu takitasi.
5A te tou Aliki e malosi kae maluga;
E se mafai o fuafuagina tena poto.
6Ka siki aka ne ia a tino loto maulalo;
Kae tuki palapala ne ia ke ii ki lalo i te laukele a tino amio ma'sei.
7Usu atu a pese o vikiga ki te Aliki;
Ta atu a pese ki te 'tou Atua i te kitala.
8Ne fakatofaki ne ia a kaumana i te lagi;
Ne faka'to ne ia a vaiua ki te lalolagi,
Kae fai ne ia a mouku ke ola i luga i mauga.
9Ne tuku ne ia meakai ki manu,
Kae fagai ne ia a tama manu eva e igoa ko leveni, manafai e tagi atu ki a ia.
10E se fiafia a ia ki solofanua malosi,
E se fiafia foki a ia ki sotia 'toa;
11Kae fiafia a ia ki a latou kola e ava ki a ia,
Pela foki mo latou kola e tali'tonu i tena alofa tumau.
12Ielusalema viki atu ki te Aliki!
Siona, viki atu ki tou Atua!
13E tausi ne ia ou mataloa ke malosi;
E fakamanuia foki ne ia ou tino.
14E tausi ne ia a tuakoi o tou fa'kai ke saogalemu,
Kae fagai ne ia koutou ke makona ki saito e sili i te lei.
15E fai tena fakatonuga ki te lalolagi,
Ka ko ana muna kona e fai, e fakataunu fakavave eiloa.
16E fola ne ia te kiona pela me se pulagiketi,
Kae fakasalalau ne ia te sau moko e pela me se pefu.
17Ne faka'to mai ne ia te vaiua aisa e pela me ne kilikili;
E seai se tino e mafai o ola i te 'moko tela ne tuku mai ne ia!
18Ne toe fai mai tena fakatonuga, ko te mea eiloa ko liu vai te aisa;
Ne fakaagi mai ne ia te matagi, ko tafe mai ei te vai.
19E fai tena fakatonuga ki tena fenua,
Ko ana fakatonuga mo tulafono ki a Isalaelu.
20E seki fai ne ia te mea nei mō nisi malo;
Me e se iloa ne latou ana tulafono.
Viki atu koutou ki te Aliki!
Who We AreWhat We EelieveWhat We Do
2025 by iamachristian.org,Inc All rights reserved.
