1I te vaitaimi foki eiloa tena, ne masaki malosi a Hesekia, toe itiiti eiloa kae mate. Ne fanatu te pelofeta ko Isaia, te tama tagata a Amota o asi ki a ia, kae fai atu penei, “A te Aliki ko fai mai ki a koe ke fakatoka fakalei a mea katoa ke toka, me i a koe e se 'lei tou masaki. Fakatoka i a koe e mate.”
2Ne fuli atu Hesekia ki te pui kae talo penei:
3“Te Aliki, au ne tavini atu eiloa ki a koe mo te fakamaoni, kae ne taumafai faeloa a au o fai te mea e manako koe ke fai ne au.” Tena, kae tagi a ia i te fanoanoa.
4Ne tiakina ne Isaia a te tupu, kae koituai o to atu a ia ki tua mo te koga ateatea o te palesi, kae faipati atu mo te Aliki ki a ia ke foki atu ki a Hesekia, te takitaki o te fenua o te Aliki, o fai atu ki a ia penei,
5“Au, te Aliki te Atua o tou tupuga ko Tavita, ko oti ne lagona ne au tau talo kae ko oti foki ne lavea ne au ou loimata. Ka faka'lei ne au tou masaki, kae masaua o fano ki te Faletapu i te tolu o aso.
6Ka tuku atu ne au e toe sefululima tausaga e ola ei koe. Ka fakasao ne au a koe mo te fa'kai tenei o Ielusalema mai te tupu o Asulia. Ka puipui faka'lei ne au a te fa'kai tenei, i toku igoa ma takuvalea; e fai ne au te mea tena e tusa foki mo taku tautoga ne fai ki taku tavini ko Tavita.”
7Tena ne fai atu a Isaia ki tino fesoasoani a te tupu ke tuku atu te sua o te mati ki luga o te fakafoa o te tupu, kae ka lei a ia.
8Ne fesili atu te Tupu ko Hesekia, “Se a te fakailoga e fakatalitonu ei i te Aliki ka faka'lei ne ia a au, kae ka mafai foki ne au o fano ki te Faletapu e tolu aso mai tua ifo?”
9Ne tali atu Isaia, “Ka tuku atu ne te Aliki se fakailoga e fakatalitonu ei me ka tausi eiloa a ia ki tena tautoga ne fai. Kiloke, a koe e manako ke fano ki mua a te ata tela i te kakega e sefulu sitepu io me fano ki tua e sefulu sitepu foki?”
10Ne tali atu Hesekia, “E faigofie o fai te ata tena ke fano ki mua e sefulu sitepu! Fai ke fano ki tua e sefulu sitepu.”
11Ne talo Isaia ki te Aliki, tena ne fai ei ne te Aliki te ata tena i luga i te kakega i luga o te kakega ne faite ne te Tupu ko Aasa, ke foki ki ona tua e sefulu sitepu.
Ko Avefekau mai Papelonia(Isa 39.1-8)12I te vaitaimi foki eiloa tena, a te tupu o Papelonia ko Melotaka Palatana, te tama tagata a Palatana, ne logo i te Tupu ko Hesekia ne masaki, tela ne avatu ei ne ia ki ei se meaalofa mo tena tusi ki ei.
13Ne fakatalofa atu a Hesekia ki avefekau mai Papelonia, kae fakaasi atu ne ia ki a latou a siliva mo aulo a ia, pela foki mo ana mea fakamanogi mo sausau, pela foki mo ana meatau katoa. E seai eiloa se mea i ana potu teu koloa mo koga katoa i tena malō e seki fakaasi ne ia ki a latou.
14Tena, ne fanatu te pelofeta ko Isaia ki te Tupu ko Hesekia kae fesili atu ki ei penei, “Ne o'mai i fea a tino kona, kae ne a olotou pati ne fai atu ki a koe?”
Ne tali atu Hesekia, “Ne o'mai mai te fenua mao ko Papelonia.”
15“Ne a mea ne lavea ne latou i te palesi?”
“Ne lavea ne latou a mea katoa. E seai eiloa se mea i potu teu koloa e seki fakaasi ne au ki a latou.”
16Tena, kae fai atu a Isaia ki te tupu penei, “A te Aliki Malosi ne fai mai
172Tupu 24.13; 2NTupu 36.10 me ka oko mai te taimi e ave katoa ei a mea i tou palesi, mo mea katoa kola ne teu ne ou tupuga ke oko mai ki te aso nei, ki Papelonia. E seai eiloa se mea e tuku.
182Tupu 24.14,15; Tani 1.1-7 Ka isi ne tino tonu o tou gafa ka ave o fai pela me ne eunuka, ke galue i te palesi o te tupu o Papelonia.”
19A te Tupu ko Hesekia e leake eiloa nei i te uiga o pati a Isaia me ka maua te filemu mo te tokagamalie i aso o tena olaga, tela la, ne tali atu ei a ia penei, “A te fekau tena ko fakaoko mai ne koe mai te Aliki ko oko eiloa i te gali.”
Ko te Gataga o te Nofoaiga a Hesekia(2NTupu 32.32-33)20A nisi tala e uiga ki te Tupu ko Hesekia, e pela mo ana mea ne fai e iloga ei tena loto toa, mo te tala o te faitega ne ia o te koga e tausi ei a vai, mo te keliga ne ia o te ana e aumai ei te vai ki loto i te fa'kai, e fakamau katoa i te tusi o Te Tala Tuku Fakasolo o Tupu o Iuta.
21Ne mate atu Hesekia, kae sui ne tena tama tagata ko Manase o fai mo tupu.
Who We AreWhat We EelieveWhat We Do
2025 by iamachristian.org,Inc All rights reserved.
