FAMASINO 12 - Tuvalu Revised Bible

Ko lefata mo Tino Efalaima

1Ne fakatoka a tagata Efalaima mo te taua, olo atu ei ki te sua feitu o te Vaitafe o Iolitana ki Safono, kae fai atu ki a Iefata penei, “Ai a ne sopo atu ei koe ki te sua feitu o te tuakoi, o taua atu ki tino Amoni kae seki ka'laga mai koe ke olo tasi tatou? Ka sunu nei ne matou te fale tena e nofo koe i ei!”

2Kae ne fai atu a Iefata ki a latou penei, “E isi se kinauga a oku tino mo tino Amoni. Au ne ka'laga atu ki a koutou, kae ne seki o'mai koutou o fakasao au mai i a latou.

3I te iloaga ne au i a koutou e se mai, tena ne taumafai eiloa au o fanatu ki te sua feitu o te tuakoi o taua atu ki a latou, kae fakafetai me ne tuku mai ne te Aliki ki a au te manumalo i a latou. Ai a la ko o'mai ei nei koutou o taua mai ki a au?”

4Tena, ne fakamaopoopo ne Iefata a tagata Kileata katoa o taua atu ki tagata Efalaima, kae ne fakatakavale eiloa ne latou. A tino Efalaima ne fai olotou pati penei, “A koutou tino Kileata i Efalaima mo Manase, ko tiakina nei ne koutou Efalaima!”

5Ne puke ne tagata Kileata a te koga tela e sopo sale ei a tino ki te sua feitu o te Iolitana ko te mea ke seai se tino Efalaima e sao. Kafai se tino Efalaima e taumafai o sopo atu ki te sua feitu o te Iolitana e muamua eiloa o fakafesili a ia ne tagata Kileata penei, “A koe na se tagata Efalaima?” Kafai e tali mai a ia pela, “ikai,”

6kae ka fai atu latou ke taku mai ne ia te pati tenei, “Sepoleta,” kae taku mai ne ia ko “Sipoleta” me e se mafai ne ia o fakaleo fakalei. Tena, ka puke ei ne latou te tagata o tamate i se auala e tasi ki te sua feitu o te Iolitana i te taimi tena, e tusa mo te fasefulu lua afe tagata Efalaima ne tamate.

7E ono tausaga ne takitaki ei ne Iefata a Isalaelu. Tena, mate atu a ia kae ne tanu i tena fa'kai i Kileata.

Ko Iefata Eloni mo Apatonu

8I te mateatuga a Iefata, ne sui a ia ne Ipisani, se tagata mai i te fa'kai o Peteleema, o fai mo takitaki o Isalaelu.

9E tinotolu ana tama tagata, e tinotolu foki ana tama fafine. Ne tuku atu ne ia ana tama fafine ke avaga ki tagata mai i tua o tena kaukaiga, kae aumai ne ia e tinotolu tamafine mai i tua o tena kaukaiga, ke avaga mo ana tama tagata. E fitu tausaga ne takitaki ei ne Ipisani a te fenua o Isalaelu;

10ne mate atu a ia kae ne tanu i Peteleema.

11A te sui o Ipisani ko Eloni, se tagata mai i te matakaiga o Sepulona. Ne takitaki ne Eloni a te fenua o Isalaelu i tausaga e sefulu.

12Ne mate atu a ia kae ne tanu i Aitialona i te laukele o Sepulona.

13A te sui o Eloni, ko Apatonu, te tama tagata a Hilelu mai i te fa'kai o Pilatonu.

14E tinofa ana tama tagata kae e tinotolu ona mokopuna, kae e sopo katoa i olotou asini e fitusefulu. E valu tausaga ne takitaki ei ne Apatonu a te fenua o Isalaelu.

15Ne mate atu a ia, kae ne tanu i Pilatonu i te koga laukele o Efalaima i te fenua mauga o tino Amaleka.