1Taku tama, sa puli aku akoakoga konei e fai atu ki a koe. Ke masaua faeloa ne koe a mea e fakatonu atu ne au ke fai ne koe.
2Aku akoakoga ka fai ne ia koe ke ola i se olaga loa kae maumea.
3Sa tiaki eiloa ne koe te alofa mo te fakamaoni. Puke o sai ki tou ua, kae tusi ki tou loto.
4Luka 2.52 Kafai e fai ne koe te mea tena, kae ka alofagia koe ne te Atua mo tagata.
5Talitonu ki te Aliki mo tou loto katoa. Sa fakalagolago lele eiloa ki tou iloa.
6Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.
7Loma 12.16 Ke mo a eiloa e talia ne koe ne ou mafaufauga e fai pela i a koe ko gasolo aka o poto; e tasi eiloa te mea e tau o fai ne koe, fakalogo ki te Aliki kae sa fai te mea se.
8Kafai e fai ne koe te mea tena, kae ka pela me se vailakau lei, tela e fakalei ne ia ou pakiaga kae fakalei ne ia tou mae.
9Avatu ki te Aliki te fua tafasili i te lei o au fatoaga, ko te taulaga tena a koe ki a ia, e fakaaloalo atu ei koe ki a ia.
10Kafai e fai ne koe pena, kae ka fonu ou fale teu saito i saito, kae ka se maua o fai te uke o au uaina ko se maua ne koe o teu fakalei.
11 Iopu 5.17 Epe 12.5,6 Taku tama, kafai e fakatonu ne te Aliki se mea se a koe ne fai, e tau mo koe o saga tonu ki ana muna e fai atu, kae tausi ki ei ke fai mo akoakoga ki a koe.
12Faka 3.19 A te Aliki e fakatonu ne ia a mea se a latou kola e alofa a ia ki ei, e pela me se tamana e fakatonu ne ia tena tama tagata tela e fakamatamata a ia ki ei.
13Amutia te tagata e maua ne ia te poto mo te malamalama.
14E lasi atu te lei e maua ne koe i te poto i lo siliva; e lasi atu te aoga o te poto ki a koe i lo te aulo.
15A te poto e taua atu i fatu taua; e seai se mea taua i tou loto e mafai o fakatusa ki ei.
16A te poto e avatu ne ia ki a koe te ola loa, pela foki te maumea mo te fakaaloalogina.
17A te poto e mafai o fai ne ia tou olaga ke tokagamalie, kae saogalemu.
18A latou kola e maua ne latou te poto e fiafia; kae maua foki ne latou te ola.
19A te lalolagi ne faite ne ta Aliki ki tena poto;
Ne fakatulaga ne ia te lagi ki tena malamalama.
20Ko tena poto ne ala ei o tafe a vaitafe kae to mai a vaiua mai i kaumana ki te lalolagi.
21Taku tama, taofi mau ki tou poto mo tou atamai. Ke mo a eiloa e galo keatea mai i a koe.
22Ka avatu ne te poto ki a koe a te ola, se olaga gali kae fiafia.
23Ka fanofano lei eiloa koe i tou auala se mafai koe o siga.
24Ka se mataku foki koe manafai ko fano koe o moe, kae ka moe lei eiloa koe i te po katoa.
25Ka se manavase foki koe ki ne puapuaga fafuasei kola e oko sale fua ki tino amio masei, pela me ne kautaufa.
26Ka fakasaosao tou ola ne te Aliki, kae ka tausi ne Ia koe ke mo a koe e lave i se malei.
27Fai a faiga lei ki tino fakaalofa i so se taimi e toka ei koe.
28Ke mo a eiloa e fai koe ki sou tuakoi ke fakatali ki te aso taeao, manafai e mafai ne koe o fesoasoani ki ei i te taimi nei.
29Ke mo a eiloa e mafaufau koe o fai se mea masei ki tou tuakoi; a ia e nofo i ou tafa, kae talitonu ki a koe.
30Sa sona fakakinau mo so se tino manafai e seki ai eiloa se mea masei kai fai ne ia ki a koe.
31Sa kaisano ki tino amio fakasaua io me mafaufau koe o amio pela mo latou,
32me i te Aliki e takalialia ki tino fai amioga masei, kae e fiafia ki tino amiotonu.
33A te Aliki e fakamalaia ne ia a fale o tino amio masei, kae e fakamanuia ne ia a fale o tino amiotonu.
34Iako 4.6; 1Pete 5.5 E fakaseaoga ne ia a tino fakamatamata, kae e alofa ki tino loto malalo.
35A tagata poto ka fakaaloalogina ne tino, ka ko tino valea ka gasolo eiloa o fakamasiasigina.
Who We AreWhat We EelieveWhat We Do
2025 by iamachristian.org,Inc All rights reserved.
