2 NOFOAIGA TUPU 12 - Tuvalu Revised Bible

Aikupito ko Faitaua ki Iuta(1Tupu 14.25-28)

1I te taimi ko mautakitaki ei te pule a Leopoamo i tena tulaga ko te tupu, ne fulitua atu ei a ia mo tena fenua ki Tulafono a te Aliki.

2I te lima o tausaga o te nofoaiga a Leopoamo, ne oko mai ei te fakasalaga ki a latou e tusa eiloa mo te se faka'logo o latou ki te Aliki. Ne faitaua mai a te Tupu o Aikupito ko Sesaka ki Ielusalema;

3e afe luaselau ana kaliota, e onosefulu afe sotia i solofanua, mo sotia ei e se maua o lau i te uke, e aofia ei a kautau mai i Lipia, Sukota mo Sutana.

4Ne fakatakavale ne ia a fa'kai fakaolo o Iuta, kae ne oko atu eiloa ki Ielusalema.

5Ne fanatu te pelofeta ko Semaia ki te Tupu ko Leopoamo mo takitaki o Iuta, kola e maopoopo i Ielusalema o taumafai o tele ke sao latou mai i a Sesaka. Muna a Semaia ki a latou penei, “Tenei te fekau a te Aliki ki a koutou: ‘Ne fulitua mai koutou ki a au, tela la, i te taimi nei, ko tuku atu ne au a koutou ke fakatakavale ne Sesaka.’ ”

6Ne talia ne te tupu mo takitaki te lotou mea 'se ne fai, tena ne fai atu ei latou penei, “A te mea ne fai ne te Aliki, e tonu eiloa.”

7I te mateaga ne te Aliki a te mea tena, ne toe faipati atu ei a ia ki a Semaia penei, “Ka se ta fakapalele ne au a latou, me ne talia ne latou te 'se o latou. Kae kafai ko faitaua mai a Sesaka, ka sao amate eiloa latou. Ka se lagona ne Ielusalema a te mafa kātoa o toku kaitaua,

8kae ka takavale eiloa latou i a Sesaka. Ka lavea ei ne latou te kese o te tavini mai ki a au mo te tavini ki pule faka‐te‐lalolagi.”

9 1Tupu 10.16,17; 2NTupu 9.15,16 Ne vau te Tupu ko Sesaka ki Ielusalema, puke ei ne ia a koloa mai i te Faletapu, mo koloa mai i te palesi. Ne puke katoa ne ia a mea i kona, e aofia ei a talita aulo kola ne faite ne te Tupu ko Solomona.

10Ne faite ne Leopoamo a talita palasi mo sui a talita aulo kona ne ave ne Sesaka, tuku ei ne ia ki ofisa kola e tiute te pui.

11I taimi katoa e fano ei te tupu ki loto i te Faletapu, ka ko sotia e aumai ne latou a talita; kafai e oti ko toe olo ei o fakafoki ki te potu teu koloa.

12Ne seki ta fakamasei ne te Aliki a te tupu, me i te tupu ne talia eiloa ne ia tena se, tena la, ne fanofano lei eiloa a mea katoa i Iuta.

Ko te Nofoaiga a Leopoamo

13Ne pule Leopoamo i Ielusalema, kae ne gasolo eiloa o malosi tena pulega. E tusa mo te fasefulu tasi ona tausaga, kae fai a ia mo tupu. Ne pule a ia i Ielusalema i tausaga e sefulufitu, te fa'kai ne filifili ne te Aliki mai i fa'kai katoa o Isalaelu, ke fai mo koga e tapuaki atu ei a tino ki a ia. A te matua o Leopoamo ko Naama, mai i te fenua o Amoni.

14Ne agasala a ia ki te Aliki, me ne seki taumafai o sukesuke te loto o te Aliki.

15A mea a Leopoamo ne fai, mai i te kamataga ke oko ki te fakaotiga, mo tala o tena kaiga, e maua i tusi konei: Te Tala Tukufakasolo o te Pelofeta ko Semaia mo Te Tala Tukufakasolo o te Pelofeta ko Ito. A Leopoamo mo Ielopoamo e masani o taua sale.

16Ne mate Leopoamo, kae ne tanu i tanuga o tupu, i te Fa'kai o Tavita, kae ne sui a ia ne tena tama tagata ko Avia o fai mo tupu.