2 TUPU 22 - Tuvalu Revised Bible

Ko Iosia te Tupu o Iuta(2NTupu 34.1-2)

1 Iele 3.6 I te valu o tausaga o Iosia, ne fai ei a ia mo tupu o Iuta, kae ne tupu a ia i Ielusalema i tausaga e tolusefulu tasi. A tena matua ko Ietita, te tama fafine a Ataia, mai te fa'kai o Posikata.

2A Iosia ne fakafiafia ne ia tena Aliki; kae tautali a ia i auala o tena tupuga ko Tavita, kae ne tausi fakamaoni eiloa ne ia a tulafono katoa a te Atua.

Ko Maua te Tusi o te Tulafono(2NTupu 34.8-24)

3I te sefuluvalu o tausaga o te nofoaiga a Iosia, ne uga ei ne ia te failautusi ko Safana, te tama tagata a Asalia kae ko te mokopuna o Mesulama, ke fano ki te Faletapu, kae fai atu mo tena fakatonuga ki ei penei:

4“Fano ki te Faitaulaga Sili ko Hilikia ke maua mai se tala e uiga ki te aofaki o te tupe ko oti ne maua ne faitaulaga kola e tiute i te mataloa o te Faletapu mai tino.

5Fai ki ei ke ave te tupe tena ki tagata kola e pule'pule i te faitega o mea ko ma'sei o te Faletapu.

6Ko tagata kona ka togi ne latou a kamuta, mo tino faite fale, mo tino galue i fatu, kae togi mai foki ne latou a laupapa mo fatu kola e fakaoga i te galuega.

72Tupu 12.15 A tagata kona e pule'pule i te galuega ko latou eiloa ko fakamaoni, tela la, e se tau o sukesuke te tupe ko oti ne fakaaoga ne latou.”

8Ne fakaoko atu ne Safana te fakatonuga tena a te tupu ki a Hilikia, kae fai atu mo Hilikia ki a ia me ko oti ne maua ne ia a te tusi o te Tulafono i te Faletapu. Ne tuku atu ne Hilikia te tusi ki a Safana, faitau ei ne Safana.

9Tena, ne foki atu a ia ki te tupu kae fai atu penei: “Ko oti ne ave ne au tavini a te tupe tela i te Faletapu ki tagata kola e pule'pule i te galuega.”

10Ne toe fai atu ana pati penei, “E isi se tusi tenei ne aumai ne Hilikia ki a au.” Tena, kae faitau atu ei ne ia ki te tupu.

11I te lagonaga ne te tupu a muna mai te tusi tena, tena ne saesae ei ona gatu i te fanoanoa.

12Kae fai atu tena fakatonuga ki a Hilikia te faitaulaga mo Aikamo te tama tagata a Safana, mo Akopa te tama tagata a Mikaio, mo Safana te failautusi, mo te fesoasoani a te tupu ko Asaia penei:

13“A koutou ka fai mo sui o te tupu mo te fenua, ke olo koutou o sili ki te Aliki e uiga ki akoakoga i te tusi tenei. A te Aliki ko kaitaua ki a tatou me i o tou tupuga ne seki tau'tali ki mea konei e fai mai i loto i te tusi tenei.”

14Ne olo atu a Hilikia mo Aikamo, mo Akopa mo Safana mo Asaia ki te fafine e igoa ki a Hulita, se pelofeta tela e nofo i te fa'kai fou o Ielusalema. A tena avaga ko Saluma, te tama tagata a Tikava, kae ko te mokopuna o Halase, te tino e tausi ne ia a gatu 'loa o te Faletapu. Ne fakamatala atu ne latou ki te fafine tena te mea ne o'mai ei latou,

15kae fai mai te fafine tena ke 'foki latou ki te tupu o fai atu ki ei a te fekau tenei mai I te Aliki:

16“Ka fakasala ne au Ielusalema mo tino katoa e nofo i ei, e pela eiloa mo te mea e tusi i te tusi tena ne faitau ne te tupu.

17Ne 'teke mai latou ki a au, kae ne ofo olotou taulaga ki nisi atua fakaatea, tela la, ko oko eiloa i toku kaitaua i mea ko oti ne fai ne latou. Au ko oko eiloa i te kaitaua ki Ielusalema kae ka se mafai o gata toku kaitaua.

18Kae tenei te fekau a te Aliki te Atua o Isalaelu ki te tupu: ne fakalogologo koe ki mea e tusi i te tusi tenei,

19kae ne salamo koe. Ne saesae ou gatu kae tagi mo te fakamaulalo i oku mua, i te lagonaga ne koe me ka fakasala ne au a Ielusalema mo tino e nofo i ei. Ka fakamasei ne au Ielusalema, ko tena igoa ke fakaoga ne tino i muna fakamalaia a latou. Kae 'lei me ko oti ne lagona ne au tau talo,

20tela la, a te fakasalaga tela ka aumai ne au ki luga i Ielusalema ka se oko mai i te taimi nei, kae ka oko mai manafai ko oti koe ne mate atu. E fai ne au pena ko koe ke mate mo te filemu.”

Tena, ne foki atu ei a tagata kona ki te Tupu ko Iosia mo te fekau tena.