SALAMO 38 - Tuvalu Revised Bible

Te Talo a te Tino Puapuagatia

1Te Aliki, sa fakasala mai au manafai e kaitaua koe!

2Ko oti ne fakapakia ne koe au ki au matasana;

Ko oti foki ne ta ne koe au.

3A koe ne ita mai ki a au tela ko mae valevale ei toku foitino;

Ko masaki toku foitino katoa e mafua mai aku agasala.

4Au ko malemu i te lofiaga o aku agasala;

Se amoga mafa, ko se mafai ne au o amo.

5Ko toku valea, tela ko pala kae manogi masei ei oku matakili.

6Ko makau toku tua, ko vaivai foki toku foitino;

E tagi fanoanoa au i te aso katoa.

7Ko oko eiloa i te malosi o toku fiva,

Ko pili eiloa au o mate.

8Au ko vaivai ka ko takavale masei foki;

Ko fi'ta toku fatu, kae tagi foki au i te 'mae.

9Te Aliki, e iloa ne koe te mea e manako au ki ei;

E lagona foki ne koe toku tagi fi'ta.

10A toku fatu ko tuki valevale fua, a toku malosi ko seai,

Ka ko teka keatea foki te mainaga mai oku mata.

11Ka se fakapilipili mai oku taugasoa mo oku tuakoi,

Me fai ne oku matakili;

Ke oko foki eiloa ki toku kaiga ko nofo faka'mao mo au.

12A latou kola e ma'nako o tamate au, ko 'tao ne latou a malei ke lave au i ei,

Ka ko latou kola e ma'nako o fakamasei au,

E fai olotou pati ke fakaseaoga au;

E se gata eiloa te lotou lamalama ke ta a au.

13Au ko pela mo se tino taliga 'tuli, e se lagona se mea,

E pela foki au mo se tino gūgū e se mafai o faipati.

14Au ko pela me se tino ko se mafai o tali ki fesili me ko se lagona ne ia se mea.

15Ka ko au e talitonu ki a koe, te Aliki;

Ko koe, te Aliki toku Atua, ka tali mai ki a au.

16Sa faigina oku fili ke fakatauemu mai ki oku puapuaga;

Sa faigina foki latou ke fakamata'mata i toku takavale!

17Ko pili nei au o siga ki lalo, kae tumau faeloa te 'mae i a au.

18Ko fakaasi atu ne au aku agasala,

Me e fakalavelave mai faeloa ki toku loto.

19A oku fili e olaola lei kae ma'losi;

E tokouke tino e takalia'lia fua ki a au kae seai se pogai 'tau.

20A latou kola e taui atu te masei ki te lei,

E teke mai ki a au, me i a au e taumafai o fai te mea tonu.

21Te Aliki, sa tiakina mai au,

Toku Atua, sa fakamao keatea mo au!

22Te Aliki toku fakaola, fesoasoani mai nei ki a au!