IELEMIA 39 - Tuvalu Revised Bible

Ko Takavale Ielusalema

1I te sefulu o masina i te iva o tausaga o te nofoaiga a Setekaia te tupu o Iuta, ne vau ei a te tupu o Papelonia ko Nepukanesa mo tena kautau katoa o taua ki Ielusalema.

2I te po iva o te fa o masina, i te sefulutasi o tausaga o te nofoaiga a Setekaia, ne to mai ei te fili ki loto i te fa'kai.

3I te taimi ne puke ei Ielusalema, a ofisa maluga katoa a te tupu o Papelonia ne o'mai ki te Mataloa i te kogaloto, e aofia ei a Nekala Salesa, Samakala Nepo, Sasekima, mo te sua Nekala Salesa.

4I te laveaga ne te Tupu ko Setekaia mo ana ofisa katoa a te mea tena ko tupu, ne taumafai ei latou o tele keatea mai i te fa'kai i te po. Ne ui atu latou i te fatoaga o te palesi, ulu atu i te mataloa tela e soko tasi ei a te ava pui, ko te mea eiloa ko sola atu ki te Vanu o Iolitana.

5Ka ko te kautau a Papelonia ne olo o afuli latou, maua atu ei ne latou a Setekaia i te koga laugatasi i tafa o Ieliko. Tena ne avatu ne latou a ia ki te Tupu ko Nepukanesa tela e nofo i te fa'kai o Lipila i te laukele o Hamata. I kona ne fai ei tena ikuga ne Nepukanesa.

6Ne tamate ne Nepukanesa a tama tagata a Setekaia i te fa'kai tena ko Lipila, ka ko Setekaia e pula atu eiloa ona mata. Ne tamate foki ne ia a ofisa o Iuta.

7Oti aka, tapale ei ne ia a kanomata o Setekaia kae saisai a ia ki seni ke ave ki Papelonia.

8Ne sunu ne te kau Papelonia a te palesi mo fale o tino, kae ofa a pui o Ielusalema.

9Ne ave fakapagota ne Nepusalatana, te ofisa pule, a tino e toe i te fa'kai ki Papelonia, fakatasi mo tino kola ne tele keatea mai i a ia.

10Ne tuku ne ia i Iuta a nisi tino mativa kola e seai ne lotou manafa, kae ne tuku ne ia ki a latou a togavine mo laukele.

Ielemia ko Fakasaoloto

11Ne fakatonu ne te Tupu ko Nepukanesa a te ofisa pule ko Nepusalatana, ke fai atu ne ia a te fakatonuga tenei:

12“Olo o sala a Ielemia kae tausi fakalei. Sa fai ne koutou se mea masei ki a ia, kae ke fai ne koutou a te mea e manako a ia ki ei.”

13Tena ne o'mai a Nepusalatana, mo ofisa maluga ko Nepusasapana, mo Nekala Salesa, mo nisi ofisa katoa a te tupu o Papelonia,

14o avatu au mai i te malae fono o te palesi. Ne tuku ne latou au ke tausi ne Ketalia te tama tagata a Aikamo kae ko te mokopuna o Safana, kae ke fakafoki ne ia au ki toku fale mo te saogalemu. Tena, ne nofo tasi ei au mo tino o te fenua.

Ko te Fakamoemoega Lei mo Epetimeleka

15I te taimi koi nofo pagota ei au i te malae fono o te palesi, a te Aliki ne fai mai ki a au

16ke fai atu au ki a Epetimeleka te tagata Sutana, i te Aliki Malosi, te Atua o Isalaelu, ne fai mai penei, “Ka aumai ne au a te malaia ki te fa'kai tenei kae se ko te maumea, e pela eiloa mo aku muna ne fai. Kafai e tupu a te mea tena, a koe e nofo eiloa i kona ke matea ne koe ki ou mata.

17Ka ko au, te Aliki, ka puipui ne au a koe, kae ka se tuku atu koe ki tino kola e mataku koe ki ei.

18Ka tausi fakalei ne au a koe, kae ka se tamate ne latou a koe. Ka fakasao tou ola ona ko koe e fakatuaga mai ki a au. Ko au, te Aliki, tena ne faipati atu.”