2 NOFOAIGA TUPU 24 - Tuvalu Revised Bible

Ko Ioasa te Tupu o Iuta(2Tupu 12.1-16)

1A Ioasa ne fai mo tupu o Iuta, ka ko fitu ei ona tausaga, kae ne pule a ia i Ielusalema i tausaga e fasefulu. A tena matua, ko Sipea, mai i te fa'kai o Pelesepa.

2Ne fai ne ia a amioga lei i mua o te Aliki, i aso koi ola ei a te faitaulaga ko Ieoiata.

3Ne fili ne Ieoiata ne avaga e tokolua ma Ioasa, kae ne fanau mai ne laua ne tamaliki tagata mo tamaliki fafine.

4A Ioasa e seki leva nei i tena tulaga ko te tupu, kae ko mafaufau o fakafou a mea o te Faletapu kola ko masei.

5Ne fakatonu ne ia a faitaulaga mo te kau sa Levi ke olo ki fa'kai o Iuta, o tae mai ne tupe mai i tino, ke lava mō te fakafouga o te Faletapu i te tausaga tena. Ne fai atu a ia ki a latou ke fakavavave, ka ko te kau sa Levi ne tai fakatalave,

6Eso 30.11-16 tena ne kalaga atu ei a ia ki te pule o latou ko Ieoiata, kae fai atu penei, “Ai a e seki fai ei koe ki te kau sa Levi ke tae mai a lafoga mai i Iuta mo Ielusalema, ko lafoga ne fakatonu ne Mose, te tavini a te Aliki, ke tae mai i tino mō togi a mea e fakaaoga mō te tausiga o te Faleie o te Aliki?”

7A tino kola e tautali i te fafine masei ko Atalia, ne fakamasei ne latou te Faletapu, kae ne fakaaoga ne latou a mea tapu e uke i ei mō fai a tapuakiga ki a Paala.

8Ne fakatonu ne te tupu a te kau sa Levi ke faite se pokisi ke lafo sale ki ei a lafoga a tino, kae ke tuku i te mataloa o te Faletapu.

9Ne avatu te fekau a latou ki tino katoa i Ielusalema mo Iuta, ke aumai ki te Aliki, a lafoga kola ne tae ne Mose, te tavini a te Atua, i te vao.

10Ne fiafia a tino mo olotou takitaki, tena ne aumai ei ne latou a lafoga tupe a latou, fakafonu ei ne latou te pokisi ki tupe.

11I aso katoa, e ave ne te kau sa Levi a te pokisi ki te tino maluga a te tupu tela e tausi ne ia te pokisi. I te taimi e fonu ei te pokisi, ko o'mai ei a te failautusi a te tupu mo te sui o te Faitaulaga Sili, o tapale a tupe i loto i ei, kae fakafoki atu te pokisi ki te koga ne tuku i ei. Tena la, ko oko eiloa i te lasi o te tupe ne maua ne latou.

12Ko te tupu mo Ieoiata e avatu ne laua a te tupe ki tino kola e pule i te fakafouga o mea o te Faletapu, tena ko togi mai ei ne latou a tino poto i galuega ki fatu, kamuta, mo tino poto i galuega ki fiti, ke fakafou a mea o te Faletapu.

13Ne galue malosi a te kau galue, tena ne toe gali ei te Faletapu e pela eiloa me koi fou, kae ko oko foki eiloa i te makeke.

14I te otiga o mea ne tau o toe fakafou, a te aulo mo te siliva tela e toe, ne tuku atu ki te tupu mo Ieoiata, kae ne fakaaoga ne laua mō faite i ei a pola mo nisi mea fai meakai ake o te Faletapu.

A Tulafono a Ieoiata ko se Fai

I aso ne ola ei a Ieoiata, a taulaga e masani o ofo faeloa i te Faletapu i taimi e masani ei.

15Ne mate a ia, ka ko selau tolusefulu ei ona tausaga.

16Ne tanu ne latou a ia i tanuga o tupu i te Fa'kai o Tavita, e fakailoga ei te galuega ne fai ne ia mō tino Isalaelu, mō te Atua, e pela foki mō te Faletapu.

17I te taimi ne mate atu ei a Ieoiata, ne futi mai ne takitaki o Iuta a te Tupu ko Ioasa ke fakalogo atu ki a latou.

18Tela la, a tino ko se tapuaki i te Faletapu o te Aliki, te Atua o olotou tupuga, kae ko kamata o tapuaki ki tupua mo fakatusa o te atua fafine ko Asaila. Ko te agasala a latou tena, ko ala ei te kaitaua o te Aliki ki Iuta mo Ielusalema

19Ne uga mai ne te Aliki a pelofeta ke faipati ki tino ke foki atu ki a ia, ka ko tino e ita ma fakalogo.

20Mata 23.35; Luka 11.51 Ne oko mai te agaga o te Atua ki a Sakalia, te tama tagata a Ieoiata, tena ne tu ake ei a Sakalia i te koga e lavea mai ei a ia ne tino, kae kalaga atu penei, “A te Aliki te Atua ne fai mai me ai a ko teke ei ne koutou ana fakatonuga, tenei ko aumai ei ne koutou a te puapuaga ki luga i a koutou! Ne tiakina ne koutou a ia, tela la, ko tiakina foki ei ne ia koutou!”

21Ne kau te tupu i te togafiti masei ne fai ki a Sakalia, tena ne fai ei tena fakatonuga ki tino ke peipei a Sakalia ki fatu, i te koga fono o te Faletapu.

22Ne puli i te tupu a te galuega lei a Ieoiata, te tamana o Sakalia, ne fai mō ia, tena ne tamate ei ne ia a Sakalia. I te taimi ka fai ei o mate a Sakalia, ne kalaga atu a ia penei, “A te Aliki ke kilo mai ki tau mea tenei e fai, kae ke fakasala ne ia a koe!”

Ko te Gataga o te Nofoaiga a Ioasa

23I te tau o te uaga muamua i te tausaga tena, ne faitaua atu te kautau a Sulia ki Iuta mo Ielusalema, tamate ne latou a takitaki katoa, kae ave ne latou a mea tāua e uke ki Tamaseko.

24A te kautau a Sulia se kautau foliki fua, kae ne tuku eiloa ne te Atua ke fakatakavale ne latou a te kautau a Iuta tela e tokouke atu me ne fulitua latou ki a ia, te Aliki te Atua o olotou tupuga. I te faiga tena, ko fakasala ei a te Tupu ko Ioasa

25Ne pakia te tupu i te tauaga tena, kae i te fokiatuga o te kau a te fili, kae e isi se tokolua i ana ofisa ne lamalama ki a ia, kae ne tamate eiloa ne laua a te tupu i tena moega, e taui ei te mate o te tama tagata a Ieoiata te faitaulaga. Ne tanu a ia i te Fa'kai o Tavita, kae seki tanu i tanuga o tupu.

26A tino kola ne lamalama ki a ia, ko Sapata, te tama tagata a Simeata te fafine Amoni, mo Ieosapata, te tama tagata a Simelita te fafine Moapi.

27A te tusi tela e fakamatala ei a tala i te Tusi o Tupu, e tusi i ei a tala o tama tagata a Ioasa, e tusi foki i ei a muna fakapelofeta ki a Ioasa, mo te tala o te toe faitega ne ia o te Faletapu. Ne sui a ia ne tena tama tagata ko Amasia o fai mo tupu.