IAKOPO 3 - Tuvalu Revised Bible

Ko te Gutu

1Oku taina, e se tokouke o koutou ka fai mo faiakoga, me e iloa ne koutou i a tatou faiakoga, ka sili atu a te faigata te fakamasinogina o tatou.

2A tatou katoa e masani o fai mea 'se. Kafai se tino e seki fai eiloa ne ia se mea 'se i ana pati, a ia se tino e katoatoa i te 'lei, ko mafai foki ne ia o pulea tona foitino katoa.

3E fakamau ne tatou a fagutu ki gutu o solofanua, ko te mea ke faka'logo mai ki a tatou, ko mafai ei ne tatou o fai ke olo ki te koga e ma'nako ei tatou.

4Mafaufau ake foki ki vakamutu: ne mea 'lasi ki, kae faka'tele foki ne matagi malosi, kae uliuli fua ne te tama foeuli, ko fano ei te vaka ki te mea e loto ki ei te kapeni.

5E pena foki eiloa te gutu; se mea foliki o te foitino, kae mafai o fakamatamata i mea 'lasi.

Mafaufau ki te tama kalokalo afi foliki, kae mafai ne ia o fa'ka te togavao lasi.

6A te gutu e pela eiloa mo se afi. A te gutu e pela mo se lalolagi e fonu i te masei i koga katoa o'tou foitino, e fakamasei ne ia te foitino katoa, e fa'ka foki ne ia te fanofanoga o te olaga katoa, mai te afi i Kena.

7A manu vaefa mo manulele katoa, mo manu 'tolo foki mo meaola o te tai e mafai o fakalata ne tino, ka ko oti foki ne fakalata ne latou.

8Kae e seai se tino e mafai ne ia o fakalata te gutu. Se mea masei ki eiloa kae faigata foki o taofiofi, kae 'fonu foki i te poisini e 'mate ei tino.

9Kene 1.26Ko te gutu e 'viki atu ei tatou ki te tou Aliki mo te Tamana, ko te gutu foki e fetu ei ne tatou a tino, kola ne faite ki te fakatusa o te Atua!

10A muna fakamanuia mo muna fakamalaia, mai te gutu eiloa e tasi. Oku taina, e se 'tau o tupu se mea penei.

11E seai se punavai e mafai o maua mai ei te vai magalo mo te vai kona i te mata o te vai e tasi!

12Oku taina, a te mati e se mafai o fua mai ei ne olive; a te vine foki e se mafai o fua mai ei ne mati. E se mafai o maua te vai magalo mai te vai 'kona. E pena tatou, e se 'tau o fai'pati tatou ki ne muna 'lei mo muna masei mai te gutu eiloa e tasi.

Ko te Poto mai i te Lagi

13E isi se tino poto mo te malamalama i a koutou na? Ke fakaasi mai la tona olaga 'lei i ana galuega e tusa mo te loto malalo mo te poto.

14Kae kafai e i a koutou te loto masei mo te faitaua, e se 'tau mo koutou o fakamata'mata io me 'loi ki te munatonu.

15A te vaega poto tenei, e se se poto mai te lagi; se poto faka te lalolagi; e se se poto faka te Agaga, kae se poto fakatemoni.

16Me ko te koga e 'nofo i ei te lotomasei mo te manatu fakapito, e 'nofo foki i ei te fai valevale mo vaega amioga ma'sei katoa.

17Ka ko te poto mai te lagi, se poto e tulaga muamua i te 'ma, e filemu, e loto malalo, e maliegofie; e fonu foki i te alofa kae fakatupu foki ne ia a galuega 'lei e uke; e fuafua 'lei ana mea e fai, e se fakatupu masei foki.

18A te amiotonu ko te fuataga e maua mai i fuaga ne 'toki i te agaga o te filemu ne tino fakatupu filemu.